2 Kɔl 9 - BAEBOLO ANZƐƐ BULUKU NWUANZANWUANZA

Keleseɛnema boa bɛ nwo

¹ Ɔngyia biala kɛ menwɔhɛlɛ bɛ wɔ moalɛ mɔɔ bɛlɛ bɛkamaa Nyamenle menli ne la anwo.

² Meze kɛ bɛkulo kɛ bɛboa, yɛɛ meva bɛ medu me nloa anu mehile Masidoneama. Menganle kɛ, “Sumunli ɛkenle ɛvolɛ ne yɛɛ mediema mɔɔ wɔ Akaya (Giliki) maanzinli nu la boɔboale bɛ nwo kɛ bɛboa a.” Zɛhae mɔdenlebɔlɛ ne ɛmaa menli dɔɔnwo ne ala akee anye ɛbolo.

³ Kɛkala melɛsoa mediema ɛhye mɔ, amaa yɛ nloa anu mɔɔ yɛvale bɛ yɛdule wɔ edwɛkɛ ɛhye anwo la anyɛ mgbane, na kɛmɔ menganle la bɛaboɔboa bɛ nwo pɛneko.

⁴ Yeamba ye zɔ na saa Masidoneama bie mɔ nee me ba na bɛbanwu kɛ bɛtɛboɔboale bɛ nwo a, yɛ nee bɛ yɛ muala yɛ nyunlu bagua aze kpole kɛ yɛvale yɛ nye yɛdole bɛ nwo zo a.

⁵ Zɔhane ati medwenle nwolɛ kɛ ɔhyia kɛ metu mediema ɛhye mɔ kɛ bɛlumua me nyunlu wɔ bɛ nwo lɔ, na bɛaboɔboa ahyɛlɛdeɛ ne mɔ mɔɔ bɛvale bɛbɔle ɛwɔkɛ la anloa bɛado ɛkɛ, amaa saa meba a yeanyɛ kɛ asɛɛ awie yɛɛ ɛhye bɛ mialeranu kɛ bɛyɛ a, na bɛdabɛ bɛkulo kɛ bɛboa la ati ɔ.

⁶ Bɛhakye ɛhye: sonla mɔɔ dua ma ekyi la bu ekyi, yɛɛ mɔɔ dua dɔɔnwo la bu dɔɔnwo.

⁷ Awie biala ɛva mɔɔ yezuzu nwo wɔ ye ahonle nu la ɛmaa. Ɔmmatwenlehwenle ɔ bo aze anzɛɛ ɔyɛ ye kɛ asɛɛ yemia la ati ɔ, ɔluakɛ Nyamenle kulo sonla mɔɔ te ɔ nyunlu kyɛ debie la.

⁸ Nyamenle kola maa bɛ ninyɛne mɔɔ bɛhyia nwolɛ la maa ɔbo zolɛ, amaa dahuu bɛanyia mɔɔ sa bɛ la na bɛava bie bɛayɛ nyele.

⁹ Nyamenle edwɛkɛ ne se, “Ɔ sa dwu ehyianvolɛma anwo zo, ye atiakunlukpalɛ ne wɔ ɛkɛ dahuu.”

¹⁰ Nyamenle mɔɔ maa ɛyazonlɛnli ma maa ɔdua na ɔmaa ye aleɛ ɔdi la, kɛmaa bɛ ɛbɛlabɔlɛ nu ma mɔɔ bɛhyia nwolɛ la dɔɔnwo bɛkɛlua, na bɛ atiakunlukɛnlɛmayɛlɛ bɛyɔba ne azo dɔɔnwo.

¹¹ Wɔ debie biala anu, Nyamenle bamaa bɛanyia bie, amaa bɛ ti akunlu ayɛ kɛnlɛma na menli dɔɔnwo ayɛ Nyamenle mo kɛ ɔlua yɛ nwo zo bɛnyia ahyɛlɛdeɛ bɛvi bɛ ɛkɛ ne a.

¹² Ɔluakɛ bɛ ɛzonlenlɛ gyima ɛhye ɛmmaa Nyamenle menli ne ɛnnyia mɔɔ bɛkpondɛ la angome, na eza ɔmaa menli buke bɛ ahonle nu yɛ Nyamenle mo.

¹³ Bɛ ɛzonlenlɛ gyima ɛhye kile bɛ diedi mɔɔ bɛlɛ la. Ɔlua zo menli dɔɔnwo ye Nyamenle ayɛlɛ kɛ bɛdi Kelaese anwo Edwɛkpa ne mɔɔ bɛlie bɛdo bɛ nwo zo la azo, na bɛ nee awie biala kyɛ nyilalɛ mɔɔ bɛnyia ye la.

¹⁴ Zɔhane ati bɛbava anwolɔlɛ ɛhulolɛ kpalɛ bɛazɛlɛ bɛamaa bɛ wɔ ɛlolɛ molozo ne mɔɔ Nyamenle ɛva ɛlo bɛ la ati.

¹⁵ Bɛmaa yɛyɛ Nyamenle mo wɔ ye nwanwane ahyɛlɛdeɛ ne ati.