2 Kɔl 10 - BAEBOLO ANZƐƐ BULUKU NWUANZANWUANZA

Pɔɔlo die ye ɛzonlenlɛ ne ati

¹ Medame Pɔɔlo, mesɛlɛ bɛ, bɛse mewɔ bɛ nwo lɔ a menle awie, na saa menle bɛ nwo lɔ a, ɛnee me nloa yɛ se wɔ bɛ nwo. Kelaese ati, melɛ bɛtɛɛyɛlɛ nee atiakunlukɛnlɛma mebodo bɛ,

² bɛmmayɛ bɛmaa saa meba bɛ nwo lɔ a me nee bɛ bie badi ye ɛsesebɛ, ɔboalekɛ medie me nwo medi kɛ mekola mekile bɛdabɛ mɔɔ bɛse yɛfa ewiade adwenle a yɛbɔ yɛ ɛbɛla la kɛ meyɛ se.

³ Ɔle nɔhalɛ kɛ yɛde ewiade ye anu ɛdeɛ, noko tɛ ewiade ye konle a yɛlɛko a.

⁴ Tɛ ewiade konle ninyɛne a yɛfa yɛko a; Nyamenle konle ninyɛne mɔɔ tumi wɔ nu la a yɛfa yɛbubu aranemgbole ne mɔ a. Yɛsɛkye kpolerazulɛ mgbane mgbane;

⁵ yɛgologolo debie biala mɔɔ bɛkɛmaa ye zo adubɛnwo nu bɛkɛtia Nyamenle anwo adwenlenubukelɛ la, yɛɛ yɛkye adwenle biala nuokɛ yɛbele ye yɛmaa ɔtie Kelaese.

⁶ Na saa akee bɛkile kɛ bɛva bɛ nwo bɛmaa Kelaese bɔkɔɔ a, yɛadua awie biala mɔɔ anwo yɛ se la kakɛ wɔ ye nyɛleɛ nwo.

⁷ Anrɛɛ bɛnlea ye boɛ na bɛabua. Awie wɔ ɛkɛ ne mɔɔ ɔbu ɔ nwo kɛ ɔle Kelaese ɛdeɛ a, ɛnee bɛmaa ɔdwenle nwolɛ ɔhakye kɛ saa ɔle Kelaese ɛdeɛ a, ɛnee yɛdayɛ noko yɛle Kelaese ɛdeɛ.

⁸ Ɔnyɛ me nyiane kɛ metu me nwo somaa wɔ tumi ne mɔɔ Awulae ɛva ɛmaa yɛ la anwo a, ɔluakɛ Awulae anva ammaa yɛ kɛ yɛva yɛzɛkye bɛ, ɔse yɛva yɛnlea yɛmaa bɛkpazi.

⁹ Mengulo kɛ ɔyɛ kɛ asɛɛ mefa me ngɛlata ne mɔ meanwunlonwunla bɛ.

¹⁰ Ɔluakɛ bie baha kɛ, “Pɔɔlo yɛ se wɔ ngɛlata zo, na saa ɔwɔ ɛke a, ɔnle awie, yɛɛ ye edwɛkɛ ɛngyinla kpɔkɛ zo!”

¹¹ Bɛmaa menli zɔhane mɔ ɛde ɔ bo kɛ mɔɔ yɛkɛlɛ ye wɔ ngɛlata ne mɔ anu, wɔ mekɛ mɔɔ yɛnle bɛ nwo lɔ la, yemɔ ala yɛɛ anrɛɛ yɛkɛha wɔ mekɛ mɔɔ yɛwɔ bɛ nwo lɔ la a.

¹² Yɛnzi yɛ kɛnra yɛmbu yɛ nwo bie anzɛɛ yɛnva yɛ nwo yɛndo menli mɔɔ bɛdabɛ bɛ ngome bɛkanvo bɛ nwo la anwo. Bɛdabɛ mɔɔ bɛfa bɛ nwo bɛto awie mɔ anwo, na bɛnea awie mɔ bɛfa bɛ bɛto bɛ nwo la ɛnze nrɛlɛbɛ.

¹³ Na yɛmɛ, yɛnrɛmemaa yɛ nwo zo yɛnrɛmaa ɔnrɛbo zolɛ. Yɛmemaa yɛ nwo zo a, yɛmemaa ye wɔ gyima ne mɔɔ Nyamenle ɛva ɛzie yɛ nyunlu la anwo, kɛ yɛrali ye gyima wɔ bɛ nu.

¹⁴ Yɛdayɛ a yɛlumuale yɛvale Kelaese anwo Edwɛkpa ne yɛrɛlɛle bɛ a, yemɔti saa yɛfa bɛ yɛtu yɛ nwo a, ɛnee yɛtɛyɛle yɛtɛmanle ɔtɛbole zolɛ.

¹⁵ Yɛnva awie mɔ gyima mɔɔ bɛyɛ wɔ ɛleka mɔɔ Nyamenle anva ammaa yɛ la yɛndu yɛ nwo. Yɛ nye la kɛ saa bɛ diedi nyi a yɛɛ yɛ gyimayɛlɛ ne badɛlɛ kpole kpalɛ wɔ bɛ avinli a,

¹⁶ amaa yɛahola yɛahɔbɔ Edwɛkpa ne nolo wɔ maanle maanle fofolɛ zo na yɛanva awie gyima mɔɔ yeyɛ ye dɛba la yɛandu yɛ nwo.

¹⁷ Nyamenle Edwɛkɛ ne se, “Awie biala mɔɔ kpondɛ kɛ ɔmemaa ɔ nwo zo la ɛyɛ ye zɔ wɔ debie mɔɔ Awulae ɛyɛ la anwo.”

¹⁸ Ɔluakɛ tɛ sonla mɔɔ kanvo ɔ ngome ɔ nwo la a sɔ Nyamenle anye a, na sonla mɔɔ Awulae kanvo ye la a sɔ Nyamenle anye a.