1 Tem 5 - BAEBOLO ANZƐƐ BULUKU NWUANZANWUANZA

Diedima anwo ɛzonlelilɛ

¹ Mmatwi kpanyinli biala anyunlu. Dielie bɛ kɛ ɛ ze mɔ la. Yɛ mgbavolɛ ne mɔ kɛ ɛ mediema mrenya;

² mraalɛ mgbanyinli ne mɔ, tendɛ kile bɛ kɛ ɛ nli mɔ, yɛɛ mbɛlɛra ne mɔ noko, yɛ bɛ kɛ ɛ mediema mraalɛ, wɔ adenle mɔɔ nuhua te la anu.

³ Di ahunlanvolɛ mɔɔ ɛnlɛ neavolɛ la eni.

⁴ Na saa kunlanvolɛ bie wɔ ɛkɛ ne mɔɔ lɛ mralɛ anzɛɛ nlɔnra a, maa ngakula zɔhane mɔ ɛzukoa bɛ nyamenlezonlenlɛ gyima ne mɔɔ ɔwɔ kɛ bɛdi bɛmaa bɛ awovolɛ la, bɛva bɛdua bɛ awovolɛ kakɛ, ɔluakɛ ɛhye a sɔ Nyamenle anye a.

⁵ Kunlanvolɛ mɔɔ ɛnlɛ awie ɛnnea ye la, ɛva ɔ nye ɛdo Nyamenle anwo zo, na ɔhɔ zolɛ ɔbodo ɔzɛlɛ na ɔbiza moalɛ aledwolɛ nee alehyenlɛ.

⁶ Na kunlanvolɛ mɔɔ ɛlɛdi ɔ ti la, kanzɛ ɔde ngoane nu bɔbɔ a yewu dɛbadɛba.

⁷ Fa folɛdulɛ ɛhye maa bɛ, amaa awie annyia edwɛkɛ ɛtane biala anga wɔ bɛ nwo.

⁸ Saa awie ɛngola ye mbusua nea, bɔbɔ ɔngola ye awovolɛ boɛ nea a, ɛnee yekpo diedi ne na yezɛkye yedɛla sonla mɔɔ ɛnlɛ diedi la.

⁹ Mmakɛlɛ kunlanvolɛ biala duma ɛboka ahunlanvolɛ ne mɔ anwo kyesɛ yeli ɛvolɛ abulasia nee ɔ nzi, na eza ɔhɔle agyalɛ ko ala,

¹⁰ yɛɛ ye nyɛleɛ kpalɛ ti bɛbɔ ye duma kpalɛ kɛ ɔle raalɛ mɔɔ tetele ɔ mra kpalɛ, ɔliele nyɛvolɛ, ɔwowole anwondelɛma agyakɛ anwo, ɔboale bɛdabɛ mɔɔ bɛ nwo hyelele bɛ, na ɔdule ɔ nwo ɔmanle gyima kpalɛ biala ɛyɛlɛ la.

¹¹ Mmafa kunlanvolɛ bɛlɛra biala ɛboka kunlanvolɛma aluma ne anwo, ɔluakɛ saa bɛ atiakunluwɔzo ne dwazo a, ɛnee bɛkulo kɛ bɛkɔ agyalɛ na bɛtwe bɛ nwo bɛfi Kelaese anwo,

¹² na bɛdi bɛ ɛwɔkɛ ne mɔɔ bɛlumuale bɛbɔle la anwo fɔlɛ.

¹³ Eza bɛsɛkye mekɛ bɛduolua ye mgbovonle nu bɛwolowolo azua nu, yɛɛ tɛ ɛhye angome, bɛbɔ nzekue, bɛfa bɛ nloa bɛwulowula awie mɔ edwɛkɛ nu, na bɛkeha edwɛkɛ mɔɔ ɔnle kɛ bɛka la.

¹⁴ Zɔhane ati menwɔhulo kɛ ahunlanvolɛ mbɛlɛra ne mɔ kɛhɔ agyalɛ, bɛkɛwo mralɛ, na bɛkɛbu bɛ awuke, amaa yɛ kpɔvolɛma annyia adenle anga edwɛkɛ ɛtane antia yɛ.

¹⁵ Ɔluakɛ ahunlanvolɛ ne bie mɔ kɛkala angome ɛpɛ bɛ nwo ɛhɔ kali Seetan anzi.

¹⁶ Saa diedinli raalɛ bie lɛ ahunlanvolɛ wɔ ye abusua nu a, ɔboa bɛ, na ɔmmafa bɛ nwo ɛzonle ɔsoa asɔne ne, amaa asɔne ne ahola aboa ahunlanvolɛ mɔɔ ɛnlɛ bɛ awie mɔ la.

¹⁷ Nwu ye kɛ mgbanyinli mɔɔ yɛ gyima kpalɛ la fɛta ahatualɛ mɔnwo, titile, bɛdabɛ mɔɔ bɛbɔ Edwɛkpa ne nolo na eza bɛkilehile la;

¹⁸ ɔluakɛ Nyamenle Edwɛkɛ ne se, “Bɛmmakyekye ɛnlankɛ ne mɔɔ wozo awule la anloa,” yɛɛ “Sonla yɛ gyima die ahatualɛ.”

¹⁹ Saa awie toa asɔne kpanyinli bie kile wɔ a, mmadie ɛto nu ɛkɛ ne ala kyesɛ wɔde ye wɔ alasevolɛ nwiɔ anzɛɛ nsa anloa.

²⁰ Twi bɛdabɛ mɔɔ ɛtane ala a bɛyɛ la anyunlu wɔ bagua nu, amaa menli mɔɔ ɛha la azulo.

²¹ Megyi Nyamenle nee Kelaese Gyisɛse nee anwuma soanvolɛma nwuanzanwuanza ne mɔ anyunlu meka meahile wɔ kɛ, di ngyehyɛlɛ ɛhye mɔ azo, na mmanea menli nyunlu anzɛɛ ɛdi mɔguazo wɔ debie biala anu.

²² Mmapele ndɛ ɛfa ɛ sa ɛgua awie biala ati zo kɛ ɔrayɛ Awulae gyima. Mmafa ɛ nwo ɛdielie awie mɔ nyɛleɛ ɛtane ɛtane nu; nea maa ɛ nwo ɛde.

²³ Mmano nzule ngome ala, ɛ ko ne nee ɛ nwo ne mɔɔ toto wɔ wazowazo la ati, anrɛɛ no nwanye ekyi.

²⁴ Menli ne bie mɔ ɛtane ne mɔ la ali wienyi, na ɔdi bɛ nyunlu ɔ nee bɛ kɔ ndɛnebualɛ nu, na bie mɔ ɛtane ɛdeɛ kyɛ na yeavinde.

²⁵ Zɔhane ala yɛɛ nyɛleɛ kpalɛ biala la ali wienyi a, yɛɛ mɔɔ ɛnla ali bɔbɔ la, bɛngola bɛnvea zolɛ.