1 Sam 9 - BAEBOLO ANZƐƐ BULUKU NWUANZANWUANZA

Sɔɔlo yia Samoɛle

¹ Nrenya sukoavolɛ bie wɔ ɛkɛ. Bɛfɛlɛ ye Kehye, ɔvi Bɛngyaman abusua ekpunli ne anu. Ɔ ze a le Abayɛle. Abayɛle ɔ ze a le Zilɔ, Zilɔ ɔ ze a le Bɛkɔla, yɛɛ Bɛkɔla ɔ ze a le Afaya.

² Kehye wole ralɛ nrenya na ɔdonle ye Sɔɔlo. Wɔ Yizilayɛ maanle ne anu, nrenya biala anwo ɛnyɛ fɛ nee Sɔɔlo ɛnzɛ. Ɔle nrenya tendenle ɔtɛla awie biala.

³ Sɔɔlo ɔ ze Kehye asoaso ne bie mɔ minlinle. Yemɔti Kehye zele Sɔɔlo kɛ, “Fa sonvolɛma ne mɔ ko na ɛ nee ye ɛhɔ bɛhɔkpondɛ asoaso ne mɔ.”

⁴ Bɛhɔluoluale Yifelaem awoka ne mɔ azo nee mbɔnza ne mɔ anu nee Hyalehya maanzinli ne anu, na bɛannwu bɛ. Bɛhɔkpondɛle bɛ wɔ Hyeeyalem azɛlɛ zo, na bɛannwu bɛ. Eza bɛhɔkpondɛle bɛ wɔ Bɛngyaman azɛlɛ zo, na bɛannwu bɛ.

⁵ Mɔɔ bɛdwule Zɛfe maanle nu la, Sɔɔlo zele ye sonvolɛ ne mɔɔ ɔ nee ye lua la kɛ, “Maa yɛzia yɛhɔ sua nu na anrɛɛ egya akee kɛdwenle yɛ nwo kɛdɛla asoaso ne mɔ.”

⁶ Na sonvolɛ ne zele ye kɛ, “Nyamenle sonla bie wɔ suakpole ɛhye azo. Awie biala di ye eni, ɔluakɛ edwɛkɛ biala mɔɔ ɔkɛha la yɛ zɔhane. Maa yɛhɔ ɔ nwo ɛkɛ, wɔannea a ɔkɛhola ɔkɛhile yɛ ɛleka mɔɔ yɛkɛnwu asoaso ne mɔ la.”

⁷ Sɔɔlo bizale ye kɛ, “Saa yɛkɔ a, duzu debie yɛɛ yɛbava yɛamaa ye a? Yɛnlɛ aleɛ biala wɔ yɛ bɔlɛ nu, yɛɛ yɛnlɛ debie biala mɔɔ yɛfa yɛamaa ye a.”

⁸ Sonvolɛ ne buale ye kɛ, “Melɛ dwɛtɛ fufule ekyi ko; mebava meamaa ye, na yeahile yɛ ɛleka mɔɔ yɛkɛnwu asoaso ne mɔ la.”

^9-11 Sɔɔlo buale ye kɛ, “Wɔ adwenle ne le kpalɛ, maa yɛhɔ.” Yemɔti bɛhɔle suakpole ne mɔɔ Nyamenle sonla ne wɔ zolɛ la azo. Mɔɔ bɛfo boka ne bɛahɔ sua ne azo la, bɛ nee mbɛlɛra bie mɔɔ ɛlɛkɔ azule la yiale. Bɛbizale mbɛlɛra ne mɔ kɛ, “Sonla ne mɔɔ nwu Nyamenle ɛhulolɛdeɛ la wɔ ɛkɛ ɔ?” (Mekɛ ne anu, wɔ Yizilayɛ maanle nu ɛnee bɛfɛlɛ Nyamenle kpɔmanvolɛma “Sonla mɔɔ nwu Nyamenle ɛhulolɛdeɛ la.” Yemɔti mekɛ biala mɔɔ awie kpondɛ abiza Nyamenle edwɛkɛ la ɛnee ɔse, “Maa yɛhɔ sonla ne mɔɔ nwu Nyamenle ɛhulolɛdeɛ la” ɛkɛ.)

^12-13 Mbɛlɛra ne mɔ buale bɛ kɛ, “Ɛhɛe, ɔwɔ ɛkɛ; kɛ ɔdwu suakpole ye azo ala la ɛne. Bɛsa bɛ gyakɛ anu ekyii a bɛbado ye. Saa bɛdwu sua ne azo ala a, bɛbanwu ye kolaa na yeahɔ azubɔlɛ ne, ɔboalekɛ menli ne babɔ azu wɔ azukponle ne mɔɔ wɔ boka ne azo la azo. Menli mɔɔ bɛdo ɛsalɛ bɛvɛlɛ bɛ la bahendɛ toonwo kɔkpula mekɛ mɔɔ ɔkɛyila aleɛ ne azo la na bɛali. Saa bɛka bɛ nwo a, bɛbado ye yeahyɛ kolaa na yeahɔ boka ne azo kɛ ɔkali debie.”

¹⁴ Yemɔti Sɔɔlo nee ye sonvolɛ ne hɔle sua ne azo. Mɔɔ bɛfo suakpole ne azo ala la, bɛ nee Samoɛle yiale kɛ ɔlɛkɔ boka ne azo, ɛleka mɔɔ bɛkazonle la.

¹⁵ Kenle mɔɔ aleɛ kye a Sɔɔlo kɛra la, Ɛdɛnkɛma yele hilele Samoɛle kɛ,

¹⁶ “Ɛhyema, bekezɛ ala, mebamaa nrenya bie mɔɔ vi Bɛngyaman abusua ekpunli ne anu la ara ɛ nwo ɛke. Kpokpa ye nwole kɛ ɔli belemgbunli ɔzie me menli Yizilayɛma. Ɔbalie bɛ yeavi Filisitiama asa anu. Menwu bɛ amaneɛnwunlɛ ne amuala yɛɛ mede bɛ ɛzunlɛ ne mɔɔ bɛlɛsu bɛabiza moalɛ la.”

¹⁷ Mɔɔ Samoɛle anye bobɔle Sɔɔlo la, Ɛdɛnkɛma zele ye kɛ, “Nrenya ne mɔɔ menganle ye edwɛkɛ la, yemɔ ɛne. Yemɔ yɛɛ ɔbazie me menli Yizilayɛma a.”

¹⁸ Na Sɔɔlo bikyele Samoɛle wɔ suakpole ne anuhɔlɛ kpole ne anloa na ɔbizale ye kɛ, “Nienwu a sonla ne mɔɔ nwu Nyamenle ɛhulolɛdeɛ la wɔ a?”

¹⁹ Samoɛle buale ye kɛ, “Mame a mele sonla ne mɔɔ nwu Nyamenle ɛhulolɛdeɛ la a. Dumua me nyunlu wɔ ɛleka mɔɔ bɛlɛbɔ azu ne la, ɔluakɛ ɛnɛ bɛ nee me bado ɛsalɛ, na aleɛ kye a wɔ edwɛkɛ biala mɔɔ ɛ nee ye rale la mebabua wɔ nwolɛ na meamaa wɔahɔ.

²⁰ Wɔ asoaso ne mɔ mɔɔ ɛnɛ kenle nsa minlinle la, mmadwenle nwolɛ na bɛnwu bɛ. Na nwane yɛɛ Yizilayɛma ɛlɛkpondɛ ye ɛsesebɛ a? Ɛdawɔ ɔ, wɔmɔ nee ɛ ze sua nu amra.”

²¹ Sɔɔlo buale kɛ, “Mevi Bɛngyaman abusua ekpunli ne anu. Abusua ɛhye a le Yizilayɛ mbusua ekpunli ne mɔ kɔsɔɔti anu ekyi kpalɛ a, yɛɛ me sua nu amra fɔɔnwo ne noko ɛnlɛ duma fee wɔ Bɛngyaman abusua ekpunli ne anu. Duzu ati a ɛkɛva amaneɛ ɛhye ɛkɛbɔ me ɛ?”

²² Akee Samoɛle vale Sɔɔlo nee ye sonvolɛ ne wolole sua ne anu, ɛleka mɔɔ menli kɛyɛ abulasa mɔɔ bɛdo ɛsalɛ bɛvɛlɛ bɛ la ɛyia la. Ɔmanle bɛdɛnlanle menli ne anyunlu wɔ ɛkponle ne ati.

²³ Samoɛle zele ahenle mɔɔ donle aleɛ ne la kɛ, “Fa nane ne mɔɔ menvale memanle wɔ kɛ ɛva ɛzie ahane la bɛla.”

²⁴ Yemɔti mɔɔ donle aleɛ ne la vale ndwɛlɛ ne mɔ nee ɔ kɔme zo nanenvoka ne mɔ bie raziele Sɔɔlo anyunlu, na Samoɛle zele kɛ, “Nea, mɔɔ bɛvale bɛziele wɔ la ɛne. Di, menvale menziele wɔ, amaa mekɛ ne dwu a ɛ nee menli mɔɔ bɛdole ɛsalɛ bɛvɛlɛle bɛ la ali.” Yemɔti Sɔɔlo nee Samoɛle dole ɛsalɛ kenle ko ne.

²⁵ Mɔɔ bɛvi ɛzonlenlɛ ɛleka ne bɛhɔle sua nu la, bɛzieziele dabelɛ wɔ sua ne ati zo bɛmanle Sɔɔlo,

²⁶ na ɔlale ɛkɛ ne. Aleɛbahye ne Samoɛle vɛlɛle Sɔɔlo na ɔzele ye kɛ, “Dwazo; maa mengɔgua wɔ adenle.” Sɔɔlo dwazole na ɔ nee Samoɛle vindele gua ne azo.

Samoɛle kpokpa Sɔɔlo nwole ahile kɛ ɔle belemgbunli

²⁷ Mɔɔ bɛdwule sua ne kandiba la, Samoɛle zele Sɔɔlo kɛ, “Ka kile wɔ sonvolɛ ne kɛ ɔlumua yɛ nyunlu.” Sonvolɛ ne lumuale na Samoɛle zele Sɔɔlo kɛ, “Kendɛ ekyii maa menga edwɛkɛ mɔɔ Nyamenle ɛha la mengile wɔ.”