1 Sam 8 - BAEBOLO ANZƐƐ BULUKU NWUANZANWUANZA

Yizilayɛma kpondɛ belemgbunli

¹ Mɔɔ Samoɛle yɛle ɛrelera la, ɔyɛle ɔ mra mrenya ne mɔ maanlebuvoma wɔ Yizilayɛ.

² Bɛfɛlɛ ɔ ra nrenya kpanyinli ne Dwowɛle yɛɛ bɛfɛlɛ ekyi ne Abaegya; bɛyɛle maanlebuvoma wɔ Biyɛhyiba.

³ Noko bɛanva bɛ ze agyakɛ. Bɛ nye bolole ezukoa, bɛliele ndoloboa na bɛbule bɛ nye bɛguale pɛlepɛlelilɛ zo.

⁴ Yizilayɛ mgbanyinli yiale; bɛhɔnwunle Samoɛle wɔ Releema.

⁵ Na bɛzele ye kɛ, “Nea, wɔyɛ kpanyinli yɛɛ ɛ mra ne mɔ noko anva ɛ gyakɛ. Yemɔti ye sonla maa ɔli yɛ belemgbunli, kɛmɔ maanle gyɛne gyɛne ne mɔ yɛ ye la.”

⁶ Bɛhanle ɛhye la, yeanyɛ Samoɛle fɛ. Yemɔti ɔzɛlɛle Ɛdɛnkɛma,

⁷ na Ɛdɛnkɛma zele Samoɛle kɛ, “Edwɛkɛ biala mɔɔ menli ne kɛha kɛhile wɔ la, tie. Tɛ wɔmɔ yɛɛ bɛkpo wɔ a; mame yɛɛ bɛkpo me kɛ ɛnɛ menle bɛ belemgbunli bieko a.

⁸ Sumunli kɛ menyele bɛ menvile Yigyibiti la, bɛhakyi bɛ nzi bɛzi me na bɛzonle nyamenle ngakyile ngakyile; mɔɔ bɛyɛle bɛmanle me la, zɔhane ala yɛɛ bɛlɛyɛ bɛamaa wɔ a.

⁹ Yemɔti, wɔmɔ tie bɛ. Noko bɔ bɛ kɔkɔ ɛsesebɛ, na maa bɛnwu adenle mɔɔ bɛ belemgbunli ne balua nu azie bɛ la.”

¹⁰ Samoɛle hanle edwɛkɛ biala mɔɔ Ɛdɛnkɛma hanle la hilele menli mɔɔ se bɛkpondɛ belemgbunli la.

¹¹ Samoɛle hilele nuhua hilele bɛ kɛ, “Kɛ bɛ belemgbunli ne bazi azie bɛ la ɛne. Ɔbayɛ bɛ mra mrenya ne mɔ ye ɛlɔnema mɔɔ bie mɔ baha ye konle ehwili ne mɔ, bie mɔ baha ye mgbɔnwɔ, na bie mɔ noko anriandi ali ye konle ehwili ne mɔ anyunlu.

¹² Ɔbayɛ bie mɔ ɛlɔnema apenle nwo zo safohyenlema, yɛɛ bie mɔ noko bayɛ ɛlɔnema abulanlu nwo zo safohyenlema. Bɛ mra mrenya ne mɔ bayɛ ye ɛyazonlɛma, bie mɔ babu ye ɛya ne mɔ anu bɛyɔba ne, na bie mɔ ayɛ ye konle ehwili ne mɔ anwo ninyɛne nee adu.

¹³ Bɛ mra mraalɛ ne bie mɔ bayɛ sakyeɛ evuanlɛ amaa ye, bie mɔ bado ye aleɛ na bie mɔ ado ye kpanwo.

¹⁴ Ɔbava bɛ ɛya avule, bɛ vanye ɛya avule, yɛɛ bɛ ɔlivi ɛya avule kpalɛ ne mɔ yeamaa ye sonvolɛma.

¹⁵ Ɔbahyɛ awie biala abɛlɛ nee ye vanye ma ne mɔ anu bulu yeadu ɛkpɔ ngoko yeamaa ye suakunlu mgbanyima nee ye sonvolɛma.

¹⁶ Ɔbamaa bɛ sonvolɛ mrenya nee mraalɛ kpalɛ ne mɔ, bɛ nlankɛ nee bɛ asoaso kpalɛ ne mɔ ayɛ gyima amaa ye.

¹⁷ Ɔbahyɛ awie biala nyɛmoa ne mɔ anu bulu yeadu ɛkpɔ ko, na bɛdabɛ mumua ne, ɔbayɛ bɛ ye ahanra.

¹⁸ Kɛmɔ bɛdabɛ bɛzie bɛ belemgbunli la saa mekɛ zɔhane dwu a bɛbahwi monle, noko Ɛdɛnkɛma ɛnrɛdie bɛ ɛzunlɛ.”

¹⁹ Menli ne mɔ andie Samoɛle ane na bɛzele kɛ, “Kyɛkyɛ; yɛkpondɛ belemgbunli,

²⁰ amaa yeayɛ kɛ maanle maanle mɔɔ ɛha la, na yeazie yɛ, yeali yɛ nyunlu ɔ nee yɛ ahɔ konle.”

²¹ Samoɛle diele bɛ edwɛkɛ ne amuala na ɔbɔle Ɛdɛnkɛma amaneɛ.

²² Ɛdɛnkɛma zele Samoɛle kɛ, “Kɛmɔ bɛdabɛ bɛbiza la, yɛ ye zɔhane na ye belemgbunli maa bɛ.” Akee Samoɛle zele Yizilayɛma kɔsɔɔti kɛ awie biala ɛhɔ ye sua zo.