1 Sam 31 - BAEBOLO ANZƐƐ BULUKU NWUANZANWUANZA

Sɔɔlo nee ɔ mra mrenya ne mɔ ewule

¹ Filisitiama nee Yizilayɛma honle wɔ Gelebowa Boka. Bɛhunle Yizilayɛma somaa ne ala wɔ ɛkɛ. Mɔɔ hale la nee Belemgbunli Sɔɔlo nee ɔ mra mrenya ne mɔ nriandile.

² Filisitiama voanle bɛ hɔhyele bɛ na bɛhunle Sɔɔlo amra mrenya nsa ne, Dwɔnatan, Abenadabe, yɛɛ Malekehyua.

³ Konle ne hyelele Sɔɔlo anwo zo, na ɛda wɔle ye manle ɔbodale kpole bie.

⁴ Yemɔti ɔzele kpavolɛ ne mɔɔ soa ye konle ninyɛne ne la kɛ, “Twe wɔ dadeɛ ne ku me, amaa Filisitiama mɔɔ ɛnze Nyamenle la ambangolo me nwo, angu me.” Ɛzulolɛ hanle kpavolɛ ne, yemɔti yeangola ye ku. Sɔɔlo yele ye dadeɛ ne na ɔdaye ɔ ngome ɔdɔle zolɛ ɔhunle ɔ nwo.

⁵ Mɔɔ kpavolɛ ne nwunle kɛ Sɔɔlo ɛwu la, ɔdaye noko ɔyele ye dadeɛ ne ɔdɔle zolɛ ɔ nee Sɔɔlo wule.

⁶ Ɛnee kɛ Sɔɔlo, ɔ mra mrenya nsa ne nee kpavolɛ ne mɔɔ soa Sɔɔlo konle ninyɛne ne la zile wule la ɛne. Sɔɔlo ɛlɔnema ne kɔsɔɔti wule konle ne anu kenle ko ne.

⁷ Mɔɔ Yizilayɛma mɔɔ wɔ Gyɛzɛli Bɔnza ne anzi lɔ mɔɔ di kɔ Azule Dwɔdan aduduleɛ la dele kɛ Yizilayɛ ɛlɔnema ne ɛgua ɛbɔ nu na bɛhu Sɔɔlo nee ɔ mra ne mɔ la, bɛvile bɛ azua ne mɔ azo bɛguale ɛbɔ nu. Na Filisitiama radɛnlanle azua ne mɔ azo.

⁸ Bɛhonle bɛwiele na ye alehyenlɛ nu, Filisitiama hɔle kɛ bɛkawua avunli ne mɔ anwo ninyɛne. Bɛnwunle Sɔɔlo nee ɔ mra nsa ne mɔ avunli wɔ Gelebowa Boka.

⁹ Bɛpɛle Sɔɔlo ati, bɛyele ye konle tɛladeɛ ne, na bɛzoanle menli bɛmanle bɛhɔkpɔsale Filisitia maanle ne anu kɔsɔɔti kɛ bɛva amaneɛ fɛlɛko ɛhye bɛhɔbɔ bɛ menli ne nee bɛ mmonle ne mɔ.

¹⁰ Akee bɛvale ye konle ninyɛne ne mɔ bɛhɔguale bɛ bozonle raalɛ Asetate ɛzonlenlɛ sua ne anu. Bɛbɔle ye sonlabaka ne pɛlɛko bɛmetanle Bɛte Hyan suakpole bane ne anwo.

¹¹ Gyeebɛhyema mɔɔ wɔ Geleade la dele mɔɔ Filisitiama ɛva ɛyɛ Sɔɔlo la,

¹² bɛ nuhua mrenya katakyiema zile nu nɔɔzo hɔle Bɛte Hyan. Bɛyeyele Sɔɔlo nee ɔ mra ne mɔ avunli wɔ bane ne anwo, bɛ nee bɛ rale Gyeebɛhye na bɛyelale bɛ ɛkɛ ne.

¹³ Akee bɛsesale bɛ mbowule ne mɔ na bɛziele bɛ wɔ “tamaleseke” baka bie mɔɔ gyi sua ne azo la abo, na bɛhyele ɛhɔne kenle nsuu.