1 Sam 3 - BAEBOLO ANZƐƐ BULUKU NWUANZANWUANZA

Ɛdɛnkɛma ye ɔ nwo ahile Samoɛle

¹ Mekɛ mɔɔ kakula Samoɛle wɔ Ɛdɛnkɛma ɛzonlenlɛ ndetelɛ bo wɔ Yilae ɛkɛ ne la, ɛnee nrɛlaleɛ mɔɔ vi Ɛdɛnkɛma ɛkɛ ne ba, nee ɛnyelɛzodeɛnwunlɛ anzo biala.

² Kenle ko nɔɔzo, Yilae mɔɔ ɛnee anye ɛyɛ la, la ye sua ne anu;

³ ɛnee bɛtɛnuanle Nyamenle kɛnlaneɛ ne na Samoɛle la Ɛdɛnkɛma Ɛzonlenlɛ Sua ne anu, ɛleka mɔɔ Nyamenle Ngyekyeleɛ Ɛlɛka ne gyi la.

⁴ Na Ɛdɛnkɛma vɛlɛle Samoɛle kɛ, “Samoɛle, Samoɛle!” Samoɛle liele zolɛ, “Yɛmenle! Mewɔ ɛke!”

⁵ Ɔnriandile ɔhɔle Yilae anwo ɛkɛ ne na ɔhanle kɛ, “Ɛvɛlɛle me, mera.” Na Yilae zele ye kɛ, “Metɛfɛlɛle wɔ na kɔla.” Yemɔti Samoɛle ziale hɔlale.

^6-7 Ɛdɛnkɛma vɛlɛle Samoɛle bieko. Ɛnee Samoɛle ɛtɛnwunle Ɛdɛnkɛma deɛ holɛ, ɔboalekɛ ɛnee Ɛdɛnkɛma ɛtɛtendɛle ɛtɛkilele ye ɛlɛ. Yemɔti ɔdwazole ɔhɔle Yilae ɛkɛ na ɔhanle kɛ, “Ɛvɛlɛle me, mame ɛne!” Na Yilae buale ye kɛ, “Me ra, metɛfɛlɛle wɔ, sia kɔla.”

⁸ Ye fane nsa ne azo Ɛdɛnkɛma vɛlɛle Samoɛle. Eza ɔdwazole ɔhɔle Yilae anwo ɛkɛ ne na ɔhanle kɛ, “Ɛlɛfɛlɛ me, mera.” Na Yilae nwunle kɛ Ɛdɛnkɛma yɛɛ ɛlɛfɛlɛ kakula ne a.

⁹ Yemɔti Yilae zele Samoɛle kɛ, “Kɔ kɔla na saa ɔfɛlɛ wɔ a ka kɛ, ‘Ɛdɛnkɛma, tendɛ, wɔ sonvolɛ ɛlɛtie.’ ” Yemɔti Samoɛle ziale hɔlale.

¹⁰ Ɛdɛnkɛma ragyinlanle ɛkɛ ne na kɛmɔ ɔyɛ ye dɛba ne ala la, ɔvɛlɛle Samoɛle bieko, “Samoɛle, Samoɛle!” Samoɛle liele zolɛ, “Tendɛ, wɔ sonvolɛ ɛlɛtie.”

¹¹ Akee Ɛdɛnkɛma zele Samoɛle kɛ, “Mebahile Yizilayɛma debie na awie biala mɔɔ kɛde la anwo bawozo ye.

¹² Kenle zɔhane, edwɛkɛ biala mɔɔ meha ye wɔ Yilae abusua ne anwo la bayɛ zɔhane, ɔvi ɔ bo yeahɔ ye awieleɛ.

¹³ Melumua meha mehile ye kɛ mebadea ye abusua ne ndeanlɛ mɔɔ ɛnlɛ awieleɛ la, ɔboalekɛ ɔ mra ne mɔ dendɛle ɛtane tiale Nyamenle mɔɔ ɔdaye Yilae ɔze a, noko yeandua bɛ.

¹⁴ Zɔhane ati meka meka kɛ, Yilae abusua ne, azubɔlɛ anzɛɛ azubɔdeɛ biala ɛnrɛmaa ndeanlɛ mɔɔ la bɛ nwo zo la ɛnrɛzi aze ɛlɛ.”

¹⁵ Samoɛle lale; ɔdwazole nwonlomɔ ne la ɔdukuedukuele Ɛdɛnkɛma Ɛzonlenlɛ Sua ne nlenkɛ ne mɔ. Ɛnee Samoɛle sulo kɛ ɔkɛha mɔɔ ɔnwunle ye la ɔkɛhile Yilae.

¹⁶ Yilae vɛlɛle Samoɛle kɛ, “Me ra Samoɛle!” Samoɛle liele zolɛ, “Mewɔ ɛke.”

¹⁷ Yilae bizale ye kɛ, “Duzu edwɛkɛ a Ɛdɛnkɛma hanle hilele wɔ a? Mmafa ɛfea me. Debie biala mɔɔ wɔde la saa ɛfa ɛfea me a Nyamenle badua wɔ kakɛ yeagua wɔ bie zolɛ”

¹⁸ Yemɔti Samoɛle anva debie biala anvea ye; ɔhanle debie biala mɔɔ ɔnwunle ye nee mɔɔ ɔdele la ɔhilele ye. Na Yilae zele ye kɛ, “Ɔdaye a ɔle Ɛdɛnkɛma a; ɔyɛ debie biala mɔɔ ɔdaye ɔnea a ɔle kpalɛ la.”

¹⁹ Samoɛle dule zolɛ; Ɛdɛnkɛma nee ye luale na ɔmanle edwɛkɛ biala mɔɔ Samoɛle hanle la yɛle nɔhalɛ.

²⁰ Yemɔti Yizilayɛma kɔsɔɔti, ɔvi maanle ne ati mɔɔ kɔdwu ɔ bo la nwunle kɛ amgba Samoɛle le Ɛdɛnkɛma kpɔmanvolɛ.

²¹ Ɛdɛnkɛma hɔle zolɛ yele ɔ nwo hilele wɔ Hyaelo; ɛkɛ ne a ɔyele ɔ nwo ɔhilele Samoɛle na ɔdendɛle ɔhilele ye a. Na mɔɔ Samoɛle hanle la, Yizilayɛma kɔsɔɔti diele.