1 Sam 28 - BAEBOLO ANZƐƐ BULUKU NWUANZANWUANZA

¹ Mekɛ ne hɔle bie la Filisitiama boɔboale bɛ nwo kɛ bɛ nee Yizilayɛma kaho. Ekehye zele Devidi kɛ, “Te ɔ bo kɛ ɛ nee wɔ ɛlɔnema ne kɔsɔɔti bali aboa me.”

² Devidi zele Ekehye kɛ, “Ɛhɛe, mele wɔ sonvolɛ, ɛdawɔ ɛbanwu moalɛ mɔɔ wɔ sonvolɛ bava aboa wɔ a.” Ekehye zele Devidi kɛ, “Mo! Mebayɛ wɔ me sinzavolɛ wɔ mekɛ mɔɔ mede ngoane nu la.”

Sɔɔlo kɔ nwomenle abisa

³ Akee Samoɛle ɛwu. Yizilayɛma kɔsɔɔti ɛzu ye na bɛzie ye wɔ ye sua zo Releema. Sɔɔlo ɛdu menli mɔɔ bɔ menli munzule nee bɛdabɛ mɔɔ bɛtendɛ nwomenle nloa zo la kɔsɔɔti wɔ Yizilayɛ maanle ne anu.

⁴ Filisitiama boɔboale bɛ nwo na bɛrayɛle azokoɛleɛ wɔ Hyunɛm. Sɔɔlo ɔdaye ɔboɔboale Yizilayɛ ɛlɔnema ne anloa na ɔrayɛle azokoɛleɛ wɔ Gelebowa Boka.

⁵ Mɔɔ Sɔɔlo nwunle Filisitia ɛlɔnema ne somaa la, ɔ nwo mɔra dule,

⁶ na ɔbizale Ɛdɛnkɛma nwolɛ bie. Na Ɛdɛnkɛma ambua ye fee; yeanga ye ɛlalɛ bɔbɔ yɛɛ yeangile sɛkɛlɛneɛ biala na yeayɛ Nyamenle kpɔmanvolɛma nrɛlaleɛ.

⁷ Akee Sɔɔlo zele ye sonvolɛma ne kɛ, “Bɛkpondɛ raalɛ mɔɔ tendɛ nwomenle nloa zo la bɛmaa mengɔ ɔ nwo abisa.” Sonvolɛma ne buale ye kɛ, “Raalɛ bie wɔ Ɛndɔ mɔɔ ɔbɔ mɔdenle a.”

⁸ Yemɔti Sɔɔlo hakyile ɔ nwo, ɔwulale adɛladeɛ ngakyile, ɔvale awozinli ɔwale ɔ nye na ɔ nee ye mgbanyima ne mɔ nwiɔ hɔle raalɛ ne ɛkɛ hɔzele ye kɛ, “Biza mɔwuamra na ka edwɛkɛ mɔɔ bazi la kile me. Fɛlɛ sonla ne mɔɔ menwɔbɔ ye duma la nwomenle maa me nee ye ɛdendɛ.”

⁹ Raalɛ ne zele ye kɛ, “Nɔhalɛ, ɛze debie mɔɔ Belemgbunli Sɔɔlo ɛyɛ la, yedu menli mɔɔ bɔ menli munzule nee menli mɔɔ tendɛ nwomenle nloa zo la wɔ maanle ye anu. Duzu ati a ɛkulo kɛ ɛto me agyiba na ɛmaa bɛku me ɛ?”

¹⁰ Na Sɔɔlo vale Ɛdɛnkɛma lile amonle kɛ, “Meka tease Ɛdɛnkɛma kɛ ɛnrɛnyia ɛhye anwo ndeanlɛ biala.”

¹¹ Raalɛ ne bizale ye kɛ, “Nwane a menvɛlɛ ye memaa wɔ a?” Sɔɔlo zele kɛ, “Fɛlɛ Samoɛle.”

¹² Raalɛ ne nwunle Samoɛle la, ɔdeanle nu kpole bie na ɔzele Sɔɔlo kɛ, “Duzu ati a wɔbɛlɛbɛla me zɛhae a? Se wɔmɔ a ɛle Belemgbunli Sɔɔlo!”

¹³ Belemgbunli ne zele ye kɛ, “Mmasulo; duzu a wɔnwu ye a?” Raalɛ ne buale ye kɛ, “Menwu kɛ sunsum bie vi azɛlɛ ne anu ɛlɛfinde.”

¹⁴ Belemgbunli ne bizale ye kɛ, “Kɛ ɔsi ɔde ɛ?” Raalɛ ne buale kɛ, “Nrenya akpanyima bie; ɔwula tɛladeɛ kpole bie.” Na Sɔɔlo nwunle kɛ Samoɛle ɔ, na ɔvale enililɛ ɔbɔle ɔ ti aze ɔmanle ye.

¹⁵ Akee Samoɛle zele Sɔɔlo kɛ, “Duzu ati yɛɛ wɔgyegye me zɛhae wɔmaa mezia mera ɛke bieko ɛ?” Sɔɔlo buale ye kɛ, “Kɛkala, edwɛkɛ ɛdo me, ɔluakɛ Filisitiama ɛlɛfa konle aradoa me. Mebiza Nyamenle nwolɛ bie, na yeanga me ɛlalɛ yɛɛ yeammaa Nyamenle kpɔmanvolɛ bie ambua nwolɛ fee. Yemɔti yɛɛ mevɛlɛ wɔ a, amaa wɔaha mɔɔ ɔwɔ kɛ meyɛ la wɔahile me.”

¹⁶ Na Samoɛle zele kɛ, “Duzu ati a ɔwɔ kɛ ɛfɛlɛ me, wɔ mekɛ mɔɔ Ɛdɛnkɛma mumua ne ɛhakyi ɔ nzi ɛzi wɔ na yeyɛ wɔ kpɔvolɛ la a?

¹⁷ Ɛdɛnkɛma ɛyɛ mɔɔ ɔluale me nwo zo ɔhanle ɔhilele wɔ la. Ɛdɛnkɛma ɛlie belemgbunlililɛ ne ɛ sa nu yeva yemaa Devidi.

¹⁸ Kɛmɔ wɔandie Ɛdɛnkɛma ane, wɔambɔ Amalɛke maanle ne, wɔanzɛkye nuhua debie biala la, yemɔti a ɛnɛ Ɛdɛnkɛma ɛyɛ wɔ zɛhae a.

¹⁹ Ɛdɛnkɛma baye ɛdawɔ nee Yizilayɛ maanlema awula Filisitiama asa anu. Ɛhyema, ɛdawɔ nee ɛ mra mrenya ne mɔ baraboka me nwo. Ɛdɛnkɛma eza baye Yizilayɛ ɛlɔnema ne awula Filisitiama asa anu.”

²⁰ Mɔɔ Sɔɔlo dele Samoɛle edwɛkɛ ne la, ɛzulolɛ hanle ye na ɔpɛle ɔfinle; ɔ nwo golole ye, ɔluakɛ ɛnee alehyenlɛ ne nee aledwolɛ ne anu amuala ɔtɛdile ɛhwee.

²¹ Raalɛ ne hɔle Sɔɔlo anwo ɛkɛ ne na ɔnwunle kɛ ɛzulolɛ kpole ɛha ye, yemɔti ɔzele kɛ, “Nana, menvale me ngoane mendole nzeleba yɛɛ menyɛle mɔɔ ɛbizale me la a.

²² Yemɔti mɔɔ mebiza wɔ la, ɛdawɔ noko yɛ maa me. Maa membɔ akposi ekyi memaa wɔ na di debie maa ɛ nwo ɛgyinla wɔ na wɔahɔ.”

²³ Sɔɔlo hɔsɔle ɔ ti na ɔzele kɛ, “Menrɛli debie.” Na ye sonvolɛma ne nee raalɛ ne kponle ye toonwo manle ɔkponlenle. Yemɔti ɔvi azɛlɛ ne anwo ɔdwazole ɔdɛnlanle ɛsokpa ne azo.

²⁴ Raalɛ ne lɛ ɛnlankɛ kyenlera ko. Ɔhunle ye ndɛndɛ, ɔvale esamo ɔfetele ye ndɛndɛ na ɔvale ɔdonle kpanwo mɔɔ mgbɔvonle ɛnle nu la.

²⁵ Ɔvale ɔmanle Sɔɔlo nee ye mgbanyima ne mɔ lile, na nɔe ne ala bɛhɔle.