1 Sam 27 - BAEBOLO ANZƐƐ BULUKU NWUANZANWUANZA

Devidi wɔ Filisitiama avinli

¹ Devidi hanle ye ɔ ti anu kɛ, “Kɛ ɔkɛyɛ biala la, kenle ko Sɔɔlo asa baha me yeahu me. Mɔɔ ɔwɔ kɛ meyɛ la a le kɛ, meye me nwo zo meahɔ Filisitiama maanle nu. Na saa ɔba ye zɛhae a Sɔɔlo asa anu bado, ɔbagyakyi me ɛkpondɛlɛ wɔ Yizilayɛ maanle ye anu, na meanyia me ti.”

² Yemɔti Devidi nee ye ɛlɔnema ɛya nsia ne hɔle Meeyɔko ara Ekehye, mɔɔ le Gate belemgbunli ne anwo lɔ.

³ Devidi nee ye ɛlɔnema ne nee bɛ awuke nu amra nee Ekehye dɛnlanle Gate. Devidi nee ye mraalɛ nwiɔ ne, Ahenoam mɔɔ vi Gyɛzɛli nee Abegeli mɔɔ vi Kamɛle mɔɔ Neebale mɔɔ ɛha ɛleka bie la gyale ye bie la noko hɔle.

⁴ Sɔɔlo dele kɛ Devidi ɛnriandi ɛhɔ Gate la, yeamkpo ye bieko.

⁵ Akee Devidi zele Ekehye kɛ, “Saa wɔnyia me nwo ɛhulolɛ a ɛnee maa me azɛlɛ wɔ azua ngyikyi ne mɔ bie azo maa mengɔndɛnla lɔ tɛla kɛ me nee wɔ kɛdɛnla wɔ dehelɛ suakpole ye azo la.”

⁶ Yemɔti Ekehye vale Zekelage manle Devidi. Ɛhye ati yɛɛ ɛnɛ Zekelage le Dwuda arelemgbunli ɛdeɛ la.

⁷ Devidi dɛnlanle Filisitia maanle nu ɛvolɛ ko siane nna.

⁸ Mekɛ ɛhye anu, ɔyɛ a ɛnee Devidi nee ye ɛlɔnema ne ɛva konle ɛhɔdoa Gɛhyɛma, Gɛzaema yɛɛ Amalɛkema mɔɔ de maanzinli ne anu dɛba la. Bɛwuale bɛ azɛlɛ ne azo ninyɛne bɛvi Hyulu toonwo bɛdwule Yigyibiti ɛweɛne zo.

⁹ Devidi hunle awie biala, mraalɛ nee mrenya na bɛvenle bɛ mboane, nlankɛ, asoaso, afunlumu, yɛɛ bɛ nwo ndanlɛ bɔbɔ. Na saa ɔsia ɔba, na Ekehye

¹⁰ biza ye kɛ, “Nienwu a ɛnɛ bɛwuale bɛdwule a?” Devidi bua ye kɛ bɛhɔle Dwuda nyiakɛ nee Gyɛlamile abusua ne azɛlɛ zo anzɛɛ azɛlɛ ne mɔɔ Kinama de zolɛ la azo.

¹¹ Devidi angyakyi nrenya ko anzɛɛ raalɛ ko bɔbɔ anyewɔzo. Saa tɛ ye zɔhane a anrɛɛ bɛ bie kɛzia kɛhɔ Gate kɛhɔbɔ Ekehye amaneɛ na bɛkɛha debie mɔɔ Devidi nee ye ɛlɔnema ne ɛyɛ la. Mekɛ tendenle ne mɔɔ Devidi lile wɔ Filisitia la ɛbɛla mɔɔ ɔbɔle la ɛne.

¹² Ekehye nyianle diedi wɔ Devidi anu na ɔhanle ɔhilele ɔ nwo kɛ, “Ɔdaye ye menli Yizilayɛma kyi ye kɔkɔ, yemɔti ɔbazonle me toonwo yeawu.”