1 Sam 26 - BAEBOLO ANZƐƐ BULUKU NWUANZANWUANZA

Devidi nwu Sɔɔlo anwunvɔne bieko

¹ Menli bie vi Zefe rale Sɔɔlo anwo ɛkɛ ne wɔ Gebɛya rahanle hilele ye kɛ Devidi vea Hakaela Boka wɔ Dwuda fienemgbole ne anloa.

² Yemɔti ɛkɛ ne ala Sɔɔlo vale ɛlɔnema mɔɔ ze konle nye zo kpalɛ kpalɛ wɔ Yizilayɛ la apenle nsa hɔle Zefe fienemgbole ne anu kɛ bɛkakpondɛ Devidi.

³ Bɛhɔyɛle azokoɛleɛ wɔ ademgbole ne mɔɔ la Hakaela Boka la foa ko. Ɛnee Devidi wɔ fienemgbole ne anu; na mɔɔ ɔdele kɛ Sɔɔlo ɛra bakpondɛ ye la,

⁴ ɔzoanle menli ɔmanle bɛhɔnleanle na bɛnwunle kɛ amgba Sɔɔlo wɔ ɛkɛ.

⁵ Ɛkɛ ne ala Devidi hɔle Sɔɔlo azokoɛleɛ ɛkɛ ne hɔnleanle ɛleka fɔɔnwo mɔɔ Sɔɔlo nee Nɛɛ ara Abenɛɛ mɔɔ nea Sɔɔlo ɛlɔnema ne anwo zo la da la. Ɔnwunle kɛ Sɔɔlo la azokoɛleɛ ne avinli na ye ɛlɔnema ɛbɔ ye mgbɔlɔka ɛyia.

⁶ Akee Devidi bizale Ahemɛlɛke, Hɛtenli ne nee Dwowabe adiema nrenya Abehyae (Bɛ nli a le Zɛluaya) kɛ, “Bɛ nuhua boni a nee me kɛhɔ Sɔɔlo azokoɛleɛ ne a?” Na Abehyae zele kɛ, “Medame a me nee wɔ kɔ a.”

⁷ Yemɔti Devidi nee Abehyae hɔle ɛlɔnema azokoɛleɛ ɛkɛ ne nɔe ne, na bɛhɔnwunle kɛ Sɔɔlo ɛlafe botoo na ye atwɛ ne kpɔnla ɔ ti sɔlɔ; Abenɛɛ nee ɛlɔnema ne noko ɛbɔ ɛyia ye na bɛdabɛ bɛlafe.

⁸ Na Abehyae zele Devidi kɛ, “Ɛnɛ demua ye, Nyamenle ɛye wɔ kpɔvolɛ ne ɛwula ɛ sa nu, maa menwɔ ye atwɛ na membɔ ye pemgbɛne azɛlɛ ne anwo; mewɔ ye kokye ala, menrɛdia zolɛ nwiɔ.”

⁹ Na Devidi zele ye kɛ, “Mmafa ɛ sa ɛka ye, ɔluakɛ awie biala mɔɔ kɛva ɔ sa kɛha sonla mɔɔ Ɛdɛnkɛma ɛzie ye belemgbunli la ɛnrɛva ɔ nwo dwɔɔ.”

¹⁰ Devidi hanle zɔle zolɛ kɛ, “Meka tease Ɛdɛnkɛma kɛ, Ɛdɛnkɛma ɔdaye ɔbahu ye; saa konle nu o anzɛɛ ye ewule mekɛ nu o.

¹¹ Ɛdɛnkɛma ɛkpa ɛgua kɛ menwɔva me sa menwɔha sonla mɔɔ ɔdaye yeye ye yezie ye belemgbunli la. Maa yɛdu ye atwɛ ne mɔɔ gyi ɔ ti sɔlɔ la na yɛva ye nzule dwora ne yɛhɔ.”

¹² Yemɔti Devidi vale atwɛ ne nee nzule dwora ne wɔ Sɔɔlo ati sɔlɔ ɛkɛ ne, na ɔ nee Abehyae bɛhɔle. Awie biala annwu bɛ yɛɛ awie biala ɛnze mɔɔ zile la yɛɛ bɛ nuhua ko bɔbɔ ambɔ mgbatike andunwue, ɔboalekɛ ɛnee Ɛdɛnkɛma ɛye nafelɛ ɛdo bɛ nwo ɛmaa bɛlafe bubotoo.

¹³ Akee Devidi pɛle bɔnza ne hɔle ɔ nzi na ɔhɔvole boka ne mɔɔ nee bɛ avinli twe la azo,

¹⁴ na ɔdeanle nu ɔzele Sɔɔlo ɛlɔnema ne nee Abenɛɛ kɛ, “Abenɛɛ, ɛte me ne ɔ?” Abenɛɛ bizale kɛ, “Nwane a ɛlɛteɛdea nu adunwue belemgbunli la?”

¹⁵ Devidi zele Abenɛɛ kɛ, “Na ɛnle nrenya ɔ? Yizilayɛ maanle ye anu, nwane a nee wɔ sɛ a? Duzu ati a wɔangola wɔanzinza wɔ belemgbunli ne a? Mekɛ ɛhye ala anu, awie rale bɛ azokoɛleɛ ɛkɛ ne kɛ ɔbahu wɔ belemgbunli ne.

¹⁶ Nyɛleɛ ɛhye mɔɔ wɔyɛ la ɛnle kpalɛ, ɔluakɛ wɔanli wɔ gyima ne. Abenɛɛ, meka tease Ɛdɛnkɛma kɛ, bɛ kɔsɔɔti bɛfɛta ewule, ɔboalekɛ bɛangola bɛanzinza bɛ belemgbunli ne mɔɔ Ɛdɛnkɛma ɛzie ye ɛmaa bɛ la. Nea, belemgbunli ne atwɛ ne wɔ nienwu?”

¹⁷ Sɔɔlo ze Devidi ane, yemɔti ɔbizale ye kɛ, “Me ra Devidi, ɛnee ɛ ne a mete la ɔ?” Devidi zele ye kɛ, “Ɛhɛe, Nana, me ne ɔ.”

¹⁸ Na ɔvale ɔzɔle zolɛ kɛ, “Duzu ati yɛɛ ɛnɛ nee ɛnɛ ala ɛtɛfoa wɔ sonvolɛ ɛ? Duzu a meyɛ a? Duzu munzule a mebɔ a?

¹⁹ Nana, yɛ ɛnzolɛ tie me. Saa Ɛdɛnkɛma yɛɛ ɛmaa ɛlɛtu me mgbaliko ɛhye a, ɛnee azubɔlɛ bamaa yeahakyi ye adwenle; na saa ɔle menli ngyehyɛlɛ ɛdeɛ a, ɛnee Ɛdɛnkɛma ɛdua bɛ kakɛ, ɔluakɛ bɛvoa me bɛvi Ɛdɛnkɛma ɛzonlenlɛ ne anwo, na bɛmaa mehɔ ɛleka mɔɔ bɛnzonle Nyamenle la.

²⁰ Mmamaa mekpɔkye me nwo mefi Ɛdɛnkɛma anwo, na mewu maanle gyɛne nu. Duzu ati yɛɛ Yizilayɛ belemgbunli ne kɛdu medame, mɔɔ membɔnle nzule la mgbaliko zɛhae a? Duzu ati a ɔlɛtɛ me kɛ bɛtɛ anloma bɛahye ye la ɛ?”

²¹ Na Sɔɔlo zele kɛ, “Meyɛ ɛtane, me ra Devidi, sia bɛla. Menrɛdu wɔ mgbaliko bieko, ɔboalekɛ wɔnwu me anwunvɔne, wɔangu me ɛnɛ nɔe. Meyɛ koasea na meyɛ ɛtane.”

²² Devidi buale ye kɛ, “Nana, wɔ atwɛ ne ɛne. Maa wɔ menli ne mɔ ko ɛralie.

²³ Ɛdɛnkɛma yila awie biala mɔɔ di pɛlepɛle nee nɔhalɛ la. Ɛdɛnkɛma yele wɔ manle me ɛnɛ nɔe, noko meanyɛ wɔ ɛhwee, ɔluakɛ Ɛdɛnkɛma ɛzie wɔ belemgbunli.

²⁴ Kɛmɔ ɛnɛ meangu wɔ la, zɔhane ala yɛɛ Ɛdɛnkɛma ɛyɛ ɛmaa me na ɔye me ɔvi ngyegyelɛ biala anu a.”

²⁵ Sɔɔlo zele Devidi kɛ, “Me ra Devidi, Nyamenle ɛyila wɔ. Ɛbayɛ ninyɛne dɔɔnwo na biala anu ɛbali konim.” Yemɔti Devidi hɔle ye ɛleka bie, yɛɛ Sɔɔlo noko ziale hɔle sua nu.