1 Sam 24 - BAEBOLO ANZƐƐ BULUKU NWUANZANWUANZA

Devidi nwu Sɔɔlo awunvɔne

¹ Mɔɔ Sɔɔlo nee Filisitiama wiele ko na ɔziale ɔrale la, bɛhanle bɛhilele ye kɛ Devidi wɔ Ɛngidae fienemgbole ne anu.

² Sɔɔlo yele Yizilayɛ ɛlɔnema ne anu apenle nsa mɔɔ ze ko kpalɛ la na ɔ nee bɛ hɔle Devidi ɛkpondɛlɛ wɔ ɛleka bie mɔɔ bɛfɛlɛ ye Ɛbɔnu Mbɔnkye Awolɛ nu la.

³ Ɔdwule mboane tunli bie anwo wɔ adehane ne la, ɔnwunle bolɛ bɔne bie wɔ ɛkɛ, na Sɔɔlo makyile ɛkɛ ne kɛ ɔkayɛ ɔ nwo boɛ. Ɔrale kɛ, bɔne zɔhane anu ala, na ɔkunlu nehane yɛɛ Devidi nee ye ɛlɔnema ne vea a.

⁴ Na Devidi ɛlɔnema ne zele ye kɛ, “Ɛnɛ kenle ye le wɔ kenle. Ɛdɛnkɛma ɛze wɔ kɛ, ‘Mebaye wɔ kpɔvolɛ ne meawula ɛ sa nu, na wɔayɛ ye debie biala mɔɔ ɛdawɔ ɛkulo la.’ ” Devidi dwazole yɛle nyaa hɔpɛle Sɔɔlo tɛladeɛ ne mɔɔ ɔwula la sinli mɔɔ Sɔɔlo annwu ye a.

⁵ Akee Devidi adwenle bɔle ɔ bo kɛ ɔgyegye ye, kɛ yepɛ Sɔɔlo tɛladeɛ ne sinli a.

⁶ Na ɔzele ye ɛlɔnema ne kɛ, “Ɛdɛnkɛma ɛkpa ɛgua kɛ menwɔboda me menle mɔɔ Ɛdɛnkɛma ɛkpokpa ye nwole kɛ ɔle belemgbunli la. Ɔnle kɛ mefa me sa meka ye fee, ɔboalekɛ yemɔ a ɔle belemgbunli mɔɔ Ɛdɛnkɛma ɛkpa nu ɛye ye a.”

⁷ Na Devidi gogole ye menli ne ahonle kɛ bɛmmayɛ Sɔɔlo ɛhwee. Sɔɔlo vile bɔne ne anu vindele, na ɔzanle ye zo kɛ ɔkɔ.

⁸ Devidi noko vindele doale ye na ɔvɛlɛle ye kɛ, “Me menle, me belemgbunli.” Sɔɔlo dole ɔ nye ɔ nzi. Devidi vale enililɛ bɔle ɔ ti aze manle ye,

⁹ na ɔzele ye kɛ, “Duzu ati a ɛtie menli mɔɔ se wɔ kɛ ‘Devidi kpondɛ wɔ ahu wɔ’ la anloa ɛ?

¹⁰ Nea, ɛnɛ demua ye, wɔ bɔne ye anu, Ɛdɛnkɛma yele wɔ manle me. Me ɛlɔnema ne bie mɔ zele me kɛ mengu wɔ, noko menzele wɔ anwunvɔne. Menzele kɛ, ‘Menrɛhu wɔ, ɔluakɛ wɔmɔ yɛɛ Ɛdɛnkɛma ɛkpa nu ɛye wɔ kɛ ɛle belemgbunli a.’

¹¹ Nana, nea, wɔ tɛladeɛ ne sinli a melɛ ye me sa nu la. Sumunli kenle ala mɔɔ mempɛle wɔ tɛladeɛ ne sinli na meangu wɔ la le sɛkɛlɛneɛ kpole kile kɛ menlɛ ɛ nwo adwenle ɛtane biala, yɛɛ metɛtele ɛ nwo atua. Metɛyɛle ɛtane biala metɛtiale wɔ, noko wɔyele ɛ nwo ɛsesebɛ ala kɛ ɛkpondɛ me wɔahu me.

¹² Yɛ mu nwiɔ, Ɛdɛnkɛma ɛbua mɔɔ di fɔlɛ la. Ɛdɛnkɛma badua wɔ kakɛ wɔ nyɛleɛ mɔɔ wɔva wɔyɛ me la anwo. Mame, menrɛva me sa menrɛha wɔ yɛɛ menrɛyɛ wɔ ɛhwee.

¹³ Ɛdawɔ ɛze tete ɛrɛlɛ ne mɔɔ se, ‘Ɛtu ayidane a, bie ka ɛ nloa’ la, na mame, menrɛlie me sa anwo ɛzonle ɛlɛ.

¹⁴ Na nwane a Yizilayɛ belemgbunli ne ɛlɛbɔ mɔdenle kɛ ɔku ye a? Na nwane bɔbɔ yɛɛ ɛlɛfoa ye ndinlizo a? Twea funli ɔ, ɛzozoa ɔ!

¹⁵ Ɛdɛnkɛma babua yɛ mu nwiɔ ndɛne yeanwu nuhua mɔɔ di fɔlɛ la. Ɔnleɛnlea edwɛkɛ ne anu, ɔlie me ti na ɔlie me ɔvi ɛ sa nu.”

¹⁶ Mɔɔ Devidi wiele tendɛ la, Sɔɔlo zele kɛ, “Asoo ɔle nɔhalɛ kɛ me ra Devidi ɛ?”

¹⁷ Na Sɔɔlo dukuele nu zunle. Ɔzele Devidi kɛ, “Ɛle tenlenenli bɔkɔɔ ɛtɛla me. Wɔyɛ me boɛ, na mame, meva ɛtane medua wɔ kakɛ.

¹⁸ Ɛnɛ kenle ko ye, wɔhile kɛ ɛkulo me, ɔluakɛ Ɛdɛnkɛma yele me manle wɔ bɔkɔɔ, na wɔangu me.

¹⁹ Fane nyɛ yɛɛ saa sonla sa ka ye kpɔvolɛ a ɔkɛgyakyi ye ɔkɛmaa ɔkɛva ɔ nwo dwɔɔ a? Ɛdɛnkɛma ɛyila wɔ wɔ mɔɔ wɔyɛ wɔmaa me ɛnɛ la anwo.

²⁰ Kɛkala, menwu kɛ ɛbali belemgbunli, yɛɛ Yizilayɛ belemgbunli maanle ne le wɔ ɛdeɛ.

²¹ Yemɔti fa Ɛdɛnkɛma bɔ me ɛwɔkɛ kɛ ɛnrɛbɔ me bo zo amra abo zo, amaa me duma nee me abusua ne duma amminli.”

²² Devidi bɔle Sɔɔlo ɛwɔkɛ ne. Sɔɔlo ziale hɔle sua nu, na Devidi nee ye ɛlɔnema ne ziale hɔveale bɛ bo zo ne.