1 Sam 21 - BAEBOLO ANZƐƐ BULUKU NWUANZANWUANZA

Devidi nriandi Sɔɔlo

¹ Devidi hɔle Sɛlɛvolɛ Ahemɛlɛke anwo lɔ wɔ Nɔɔbo. Ahemɛlɛke vale anwowozolɛ ngome rayiale ye adenle na ɔbizale ye kɛ, “Duzu ati a ɛ ngomekye ala a wɔra na awie ɛmboka ɛ nwo ɛ?”

² Devidi buale ye kɛ, “Belemgbunli ɛzoa me, na ɔse, ‘Ɛzoanlɛ mɔɔ mezoa wɔ la, mmamaa awie biala te nwolɛ bie fee.’ Na me mgbavolɛ ne mɔ, mehile bɛ ɛleka mɔɔ bɛyia me la.

³ Duzu aleɛ a wɔ ɛke a? Maa me kpanwo ahunguma nnu anzɛɛ debie biala mɔɔ ɛlɛ la bie.”

⁴ Sɛlɛvolɛ ne zele Devidi kɛ, “Menlɛ kpanwo biala wɔ ɛke kɛ kpanwo nwuanzanwuanza ne mɔ ala. Debie mɔɔ hyia la a le kɛ saa wɔ mgbavolɛ ne mɔ ɛtɛfale bɛ nwo ɛtɛkanle mraalɛ kenle nsa ye ala ɛdeɛ a.”

⁵ Devidi buale kɛ, “Nɔhalɛ, bɛtɛfale bɛ nwo bɛtɛkanle mraalɛ. Saa yɛtu adenle gyɛne bɔbɔ a, yɛ nee mraalɛ ɛnli ngitanwo biala, na akee mɔɔ yɛlɛtu adenle mɔɔ hyia kpole zɛhae la.”

⁶ Yemɔti sɛlɛvolɛ ne manle Devidi kpanwo nwuanzanwuanza ne bie, ɔluakɛ ɛnee kpanwo mɔɔ wɔ ɛkɛ ne la ala a le mɔɔ bɛva bɛbɔ azu bɛmaa Ɛdɛnkɛma na bɛva bɛzie Ɛdɛnkɛma anyunlu la. Saa bɛye bɛfi azukponle ne azo a, ɔwɔ kɛ bɛfa fofolɛ wuluwulu bɛsie ɔ bo zo ne.

⁷ (Kenle ko ne ɛnee Sɔɔlo mboaneneavolɛ kpanyinli ne wɔ ɛkɛ, bɛfɛlɛ ye Dowɛge, ɔvi Yidɔm. Ɔhɔle kɛ ɔkayɛ gyima bie wɔ Ɛdɛnkɛma duma nu.)

⁸ Na Devidi zele Ahemɛlɛke kɛ, “Ɛkɛnyia atwɛ anzɛɛ dadeɛ bie ɛkɛmaa me ɔ? Belemgbunli ɛzoanlɛ ne yɛle mgbemgbene nu, na kɛmɔ ɔwɔ kɛ meka me nwo ndɛndɛ la ati me rɛle vile, meanva bie.”

⁹ Sɛlɛvolɛ ne zele kɛ, “Filisitianli Golayate mɔɔ ɛhunle ye wɔ Yila Bɔnza la dadeɛ ne kyekye ɛdanlɛ nu gyi ɛleka mɔɔ sɛlɛvolɛma tɛladeɛ Yifɔdo ne henda la. Saa ɛkulo a, fa yemɔ, ɔluakɛ dadeɛ gyɛne biala ɛnle ɛke.” Devidi zele kɛ, “Dadeɛ biala nee ye ɛnzɛ; fa maa me.”

¹⁰ Yemɔti Devidi vile ɛkɛ ne, ɔnriandile Sɔɔlo na ɔhɔle Gate Belemgbunli Ekehye anwo lɔ.

¹¹ Ekehye mgbanyima ne mɔ zele bɛ belemgbunli ne kɛ, “Na tɛ Devidi ɛhye a le ye maanle ne anu belemgbunli a? Nrenya ne mɔɔ mraalɛ ne mɔ dole ɔ nwo edwɛne, zile agole la ɛne. Bɛ edwɛne ne se, ‘Sɔɔlo hunle apenle apenle, na Devidi hunle apenle apenle bulu.’ ”

¹² Edwɛkɛ ɛhye gyegyele Devidi adwenle kpole na ɔmanle ɔzulole Belemgbunli Ekehye.

¹³ Yemɔti ɔhakyile ye subane bɔkɔɔ wɔ menli ne anyunlu na ɔyɛle ɔ nwo kɛ asɛɛ sɛnvolɛ bie la. Ɔhɛlɛhɛlɛle suakunlu ɛkɛ ne nlenkɛ ne mɔ anwo na ɔhwinle nyɛlɛ ɔguale ɔ kɛsa anu nee ye ɛbolɛ zo.

¹⁴ Na Ekehye zele kɛ, “Bɛze kɛ sonla ne ɛzɛ, duzu ati a bɛva ye bɛrɛlɛ me ɛ?

¹⁵ Na meze bɛ kɛ mehyia bɔnavolɛ nwo mɔɔ yemɔti bɛva ye bɛra bɛmaa yearayɛ mgbane mgbane yeahile me wɔ me suakunlu ɛke a?”