1 Sam 19 - BAEBOLO ANZƐƐ BULUKU NWUANZANWUANZA

Sɔɔlo yɛ Devidi kpɔdekpɔde

¹ Sɔɔlo zele ɔ ra Dwɔnatan nee ye sonvolɛma kɔsɔɔti kɛ bɛhu Devidi. Dwɔnatan ɛnee kulo Devidi edwɛkɛ kpalɛ.

² Yemɔti ɔzele Devidi kɛ, “Egya kpondɛ wɔ ahu wɔ, yemɔti nea ɛ nwo boɛ. Ɛhyema nwonlomɔ kɔkpondɛ ɛleka bie fea.

³ Mebahɔ egya anwo ɛkɛ na meahɔha wɔ edwɛkɛ meahile ye; na edwɛkɛ biala mɔɔ ɔkɛha la mebaraha meahile wɔ.”

⁴ Dwɔnatan hanvole Devidi hilele ɔ ze kɛ, “Nana, mmafa ɛ sa ɛka wɔ sonvolɛ Devidi, ɔboalekɛ ɔtɛyɛle ɛtane biala ɔtɛtiale wɔ. Debie biala mɔɔ ɔyɛle la, ɔvale ɔzonlenle wɔ.

⁵ Ɔvale ye ngoane ɔdole nzeleba ɔhunle Golayate, na Ɛdɛnkɛma lile konim manle Yizilayɛma kɔsɔɔti. Ɛnwunle ye la, ɛlile fɛlɛko, na duzu ati bɔbɔ yɛɛ akee ɛkpondɛ kɛ ɛku Devidi mgbane gyɛne ne ala, ɛka mogya mɔɔ ɛnli fɔlɛ la ɛgua ɛ?”

⁶ Sɔɔlo diele Dwɔnatan na ɔhanle ndane kɛ, “Sumunli kenle ala mɔɔ Ɛdɛnkɛma de aze la, bɛnrɛhu Devidi ɛlɛ.”

⁷ Dwɔnatan vɛlɛle Devidi na ɔhanle edwɛkɛ ne kɔsɔɔti ɔhilele ye. Ɔvale Devidi ɔhɔle ɔ ze anyunlu, na Sɔɔlo nee ye dɛnlanle, na Devidi zonlenle belemgbunli ne kɛ dɛba ne ala la.

⁸ Konle zile Yizilayɛma nee Filisitiama avinli bieko. Devidi nee ye ɛlɔnema ne lile Filisitiama anwo zo konim bɔkɔɔ. Bɛhunle Filisitiama dɔɔnwo kpalɛ, na mɔɔ hale la guale ɛbɔ nu.

⁹ Ɛdɛnkɛma manle sunsum ɛtane ne dwule Sɔɔlo anwo zo bieko. Ɛnee ɔde ye sua ne anu na ɔlɛ ye atwɛ ne ɔ sa nu; Devidi noko ɛlɛbɔ ye sanwule ne.

¹⁰ Sɔɔlo dole ye atwɛ ne kɛ ɔbɛtɛ Devidi wɔ bane ne anwo. Devidi yele ɔ nwo ɛkɛ, na atwɛ ne hɔminle bane ne anu. Devidi nriandile vindele na ɔyele ɔ nwo zo.

¹¹ Kenle ko ne nɔsolɛ, Sɔɔlo zoanle menli kɛ bɛhɔzinza Devidi sua ne na nwonlomɔ bɛ sa aha ye bɛahu ye. Na Devidi aye Maekale hwenle Devidi anzo kɛ, “Saa ɛnɛ nɔe wɔanye ɛ nwo zo a, nwonlomɔ mangyee ne bɛbahu wɔ.”

¹² Yemɔti Maekale dwulale Devidi aze wɔ nvɛnzɛlɛ nu manle ɔnriandile.

¹³ Akee Maekale vale ananze dedale ye kɛ sonla la wɔ ɛsokpa ne azo. Ɔvale esumi mɔɔ bɛva abɔnkye enrinli bɛwula la ɔzɔle ɔ ti, na ɔdule ɛdanlɛ ɔguale ɔ nwo.

¹⁴ Mɔɔ Sɔɔlo soanvolɛma mɔɔ hɔle kɛ bɛkahye Devidi la dwule sua nu ɛkɛ ne la, ɔ ye zele bɛ kɛ, “Devidi ɛnde kpɔkɛ.”

¹⁵ Sonvolɛma ne hɔbɔle Sɔɔlo amaneɛ, na ɔzele bɛ kɛ, “Bɛhɔdwu ye nee ye ɛsokpa ne amuala bɛrɛlɛ me bɛmaa mengu ye.”

¹⁶ Mɔɔ sonvolɛma ne hɔle la, bɛnwunle kɛ ananze a la ɛsokpa ne azo na abɔnkye enrinli esumi zɔ ɔ ti a.

¹⁷ Sɔɔlo bizale Maekale kɛ, “Duzu ati yɛɛ wɔbɛlɛbɛla me zɛhae wɔmaa me kpɔvolɛ ɛvi me sa ɛ?” Maekale buale Sɔɔlo kɛ, “Ɔnwunlonwunlanle me kɛ saa meamboa ye meammaa yeanriandi a, ɔkɛhu me.”

¹⁸ Devidi nriandile hɔle Samoɛle anwo lɔ wɔ Releema na ɔvale nyɛleɛ mɔɔ Sɔɔlo ɛyɛ ye la amuala ɔbɔle ye amaneɛ. Na ɔ nee Samoɛle hɔdɛnlanle Naeyo.

¹⁹ Bɛhɔbɔle Sɔɔlo amaneɛ kɛ Devidi wɔ Naeyo mɔɔ wɔ Releema la.

²⁰ Yemɔti Sɔɔlo zoanle menli kɛ bɛhɔhye ye, na mɔɔ bɛnwunle Nyamenle kpɔmanvolɛma ekpunli ne mɔɔ Samoɛle li bɛ ti, na bɛlɛsi agole bɛka Nyamenle nrɛlaleɛ la, Ɛdɛnkɛma Sunsum ne dwule Sɔɔlo soanvolɛma ne anwo zo, na bɛdabɛ noko bɛzile agole bɛhanle Nyamenle nrɛlaleɛ.

²¹ Bɛrahanle edwɛkɛ ne bɛhilele Sɔɔlo na ɔzoanle menli fofolɛ, na bɛdabɛ noko bɛhɔbokale Nyamenle kpɔmanvolɛma ekpunli ne anwo. Eza Sɔɔlo zoanle menli bieko, ɛhye tɔ zolɛ fane nsa, na bɛdabɛ noko bɛhɔbokale Nyamenle kpɔmanvolɛma ekpunli ne anwo.

²² Akee ɔdaye mumua ne ɔzile nu kɛ ɔkɔ Releema. Ɔradwule bula kpole ne mɔɔ wɔ Siku la anwo la, ɔbizale kɛ, “Samoɛle nee Devidi, nienwu yɛɛ bɛwɔ a?” Bɛzele ye kɛ, “Bɛwɔ Naeyo mɔɔ wɔ Releema la.”

²³ Ɔvi ɛkɛ ne ɔhɔle Naeyo mɔɔ wɔ Releema la, na ye ɛhɔlɛ nu, Nyamenle Sunsum ne dwule ɔdaye noko ɔ nwo zo, na mɔɔ ɔlɛkɔ la ɛnee ɔlɛka Nyamenle nrɛlaleɛ ne toonwo ɔhɔdwule Naeyo mɔɔ wɔ Releema la.

²⁴ Ɔdaye noko ɔyeyele ye adɛladeɛ ne mɔ na ɔhanle Nyamenle nrɛlaleɛ ne wɔ Samoɛle anyunlu ɛkɛ ne. Kenle ko ne ewia ne nee nɔe ne ɔlɛle ɔ nwo zɔ. (Nyɛleɛ ɛhye a manle ɛrɛlɛ ne mɔɔ se, “Na Sɔɔlo ɔdaye ɔboka Nyamenle kpɔmanvolɛma ne mɔ anwo ɔ?” la rale a.)