1 Sam 12 - BAEBOLO ANZƐƐ BULUKU NWUANZANWUANZA

Samoɛle nrɛlaleɛ ne

¹ Akee Samoɛle zele Yizilayɛma kɔsɔɔti kɛ, “Mɔɔ bɛzele me kɛ menyɛ la, meyɛ mewie. Memaa bɛ belemgbunli kɛ ɔzie bɛ.

² Kɛkala, bɛnyia belemgbunli mɔɔ bali bɛ ti a. Akee meyɛ kpanyinli; me ti zo ɛyɛ nwohyee. Eza bɛnlea, me mra mrenya ne mɔ wɔ bɛ avinli. Sumunli me mgbavolɛ nu, meli bɛ ti toonwo a yeradwu ɛnɛ a.

³ Mame ɛne; saa meyɛ ɛtane metia bɛ a, bɛha ye wɔ Ɛdɛnkɛma nee bɛ belemgbunli ye mɔɔ yeye yemaa bɛ la anyunlu ɛke. Meva awie ɛnlankɛ anzɛɛ meva awie asoaso ɔ? Meli awie ndunlumi ɔ? Mesisi awie anzɛɛ mekpuokpua awie ɔ? Melie awie ndoloboa ɔ? Ninyɛne ɛhye mɔ kɔsɔɔti, saa meyɛ nuhua bie a, bɛha na menwɔzie ɔ bo zo.”

⁴ Menli ne buale kɛ, “Ɛtɛdile yɛ ndunlumi, ɛtɛkpuokpuanle awie biala, ɛtɛsale awie biala ɛtɛdiele ye debie.”

⁵ Samoɛle buale kɛ, “Ɛdɛnkɛma nee belemgbunli ne mɔɔ yeye yemaa bɛ la di daselɛ ɛnɛ demua ye kɛ menli fɔlɛ wɔ debie biala anwo.” Bɛbuale kɛ, “Ɛhɛe, Ɛdɛnkɛma di daselɛ.”

⁶ Na Samoɛle zele menli ne kɛ, “Ɛdɛnkɛma mɔɔ yele Mosisi nee Aalɔn manle bɛvale bɛ mgbanyima bɛvile Yigyibiti azɛlɛ zo la di daselɛ.

⁷ Bɛyɛ koonwu bɛgyinla ɛkɛ, bɛmaa menzɛlɛ Ɛdɛnkɛma memaa bɛ wɔ nyɛleɛ mɔɔ ɔyɛle ɔliele bɛ nee bɛ mgbanyinli la anwo.

⁸ Mɔɔ Gyekɔbo nee ɔ bo zo amra hɔle Yigyibiti na Yigyibitima yɛ bɛ kpɔdekpɔde la, bɛzunle bɛvɛlɛle Ɛdɛnkɛma na ɔzoanle Mosisi nee Aalɔn ɔmanle bɛhɔyele bɛ bɛvile Yigyibiti bɛ nee bɛ rale azɛlɛ ɛhye azo.

⁹ Noko bɛ rɛle vile Ɛdɛnkɛma bɛ Nyamenle ne, yemɔti ɔyele bɛ ɔmanle Filisitiama nee Mowabe belemgbunli ne nee Sesɛla mɔɔ nea suakpole Heezɔ ɛlɔnema ne anwo zo la, na ɔmanle bɛ nee bɛ mgbanyima ne mɔ honle bɛlile bɛ nwo zo konim.

¹⁰ Bɛzunle bɛvɛlɛle Ɛdɛnkɛma bɛzele kɛ, ‘Yɛyɛ ɛtane, ɔboalekɛ yɛkpo Ɛdɛnkɛma na yɛzonle Beeyale nee Asetate ananze ne mɔ. Die yɛ fi yɛ kpɔvolɛma asa anu, na yɛbazonle wɔ.’

¹¹ Na Ɛdɛnkɛma yele Gedeɔn (Gyɛlɛbeeyale); nzinlii ɔyele Balake nee Gyɛfeta, yɛɛ akee medame Samoɛle, ɔmanle yɛ nuhua ko biala raliele bɛ vile bɛ kpɔvolɛma asa anu, na bɛdɛnlanle anzonudwolɛ nu.

¹² Na mɔɔ Amɔn Belemgbunli Neehahye vale konle radoale bɛ la, bɛkpole Ɛdɛnkɛma kɛ ɔnle bɛ belemgbunli bieko na bɛzele me kɛ, ‘Maa yɛ belemgbunli maa ɔzie yɛ.’

¹³ “Bɛ belemgbunli ne ɛne; bɛdabɛ a bɛbizale a, yɛɛ Ɛdɛnkɛma ɛye ye ɛmaa bɛ a.

¹⁴ Saa bɛdi Ɛdɛnkɛma bɛ Nyamenle ne eni, bɛsonle ye, bɛtie ɔ ne, bɛdi ye mɛla ne mɔ azo, na bɛ nee bɛ belemgbunli ne toa ɔ bo zo ɛdeɛ a, debie biala bahɔ zolɛ fɔɔnwo amaa bɛ.

¹⁵ Na saa bɛandie Ɛdɛnkɛma ane na bɛbulu ye mɛla ne mɔ azo a, ɔ nee bɛ nee bɛ belemgbunli ne bali.

¹⁶ Yemɔti awie biala ɛzie ɔ nwo diinyi, na ɔnlea nwanwane debie mɔɔ Ɛdɛnkɛma bayɛ la.

¹⁷ Bɛ muala bɛze kɛ yɛwɔ wawaa mekɛ nu. Mebazɛlɛ ye meamaa yeamaa maanle nu ahulu na ezule adɔ. Saa ɛhye si a, bɛbanwu kɛ bɛyɛ ɛtane kpole bɛtia Ɛdɛnkɛma kɛ bɛdabɛ bɛbizale bɛliele belemgbunli a.”

¹⁸ Yemɔti Samoɛle zɛlɛle Ɛdɛnkɛma, na kenle ko ne ala maanle nu hulule na ezule dɔle. Na menli ne kɔsɔɔti zulole Ɛdɛnkɛma nee Samoɛle.

¹⁹ Na bɛzele Samoɛle kɛ, “Yɛmenle, bodo Ɛdɛnkɛma wɔ Nyamenle ne maa yɛ, amaa yeangu yɛ. Ɔluakɛ yɛnwu ye wienyi kɛ, ɛye ɛtane gyɛne gyɛne mɔɔ yɛyɛ la ɛsie ahane a, mɔɔ yɛyɛ la akee bo zolɛ kɛ yɛdayɛ yɛbizale kɛ ɔmaa yɛ belemgbunli a.”

²⁰ Na Samoɛle zele menli ne kɛ, “Bɛmmasulo; bɛbɔ munzule bɔbɔ ɛdeɛ, noko bɛmmakpo kɛ bɛnrɛdoa Ɛdɛnkɛma abo zo. Bɛva bɛ ahonle kɔsɔɔti bɛzonle ye.

²¹ Bɛmmadi adalɛ nyamenle ne mɔ mɔɔ ɛnrɛhola ɛnrɛlie bɛ ngoane la anzi, ɔluakɛ bɛdabɛ mumua ne bɛnlɛ ngoane.

²² Ɔlua ye duma kpole ne ati, Ɛdɛnkɛma ɛnrɛkpo ye menli, ɔboalekɛ ɔdaye ye ɛhulolɛ zo yɛɛ yeva bɛ yeyɛ ye menli a.

²³ Na mame, Ɛdɛnkɛma ɛkpa ɛgua kɛ menwɔyɛ ɛtane kɛ menrɛzɛlɛ menrɛmaa bɛ a. Mebahilehile bɛ nɔhalɛ adenle ne nee mɔɔ le kpalɛ kɛ ɔwɔ kɛ bɛyɛ la.

²⁴ Bɛyɛ tieyɛ bɛmaa Ɛdɛnkɛma na bɛva bɛ ahonle muala bɛzonle ye nɔhalɛ nu. Bɛhakye ninyɛne mgbole mɔɔ yeyɛ yemaa bɛ la.

²⁵ Na saa bɛandie na bɛyɛ ninyɛndane a, ɔbazɛkye bɛ nee bɛ belemgbunli ne bɔkɔɔ.”