1 Sam 11 - BAEBOLO ANZƐƐ BULUKU NWUANZANWUANZA

Sɔɔlo di Amɔnoma anwo zo konim

¹ Akee Neehahye, Amɔnoma belemgbunli ne vale ɛlɔnema hɔbɛnrale yiale Gyeebɛhye mɔɔ wɔ Geleade maanle nu la. Na Gyeebɛhyema zele Neehahye kɛ, “Ɛ nee yɛ ɛyɛ anzonudwolɛ ngyehyɛlɛ na yɛkɛzonle wɔ.”

² Neehahye zele bɛ kɛ, “Bɛnwu ye kɛ, mekponle zolɛ me nee bɛ ayɛ ngyehyɛlɛ ne la, ɛnee bɛlie bɛdo nu bɛmaa medu awie biala anye fema ne, amaa yeayɛ anyiemgba yeaha Yizilayɛma kɔsɔɔti.”

³ Gyeebɛhye mgbanyima zele ye kɛ, “Maa yɛ kenle nsuu maa yɛzoa menli wɔ Yizilayɛ maanle ye anu amuala. Na saa yɛannyia awie mɔɔ kɛlie yɛ la a, yɛkɛva yɛ nwo yɛkɛmaa wɔ.”

⁴ Soanvolɛma ne mɔ rale Gebɛya, sua ne mɔɔ Sɔɔlo de zolɛ la azo. Bɛvale amaneɛ ne bɛbɔle ezuavolɛ ne na bɛ muala bɛzunle bɛyele awolɛ.

⁵ Mekɛ ne anu ala ɛnee Sɔɔlo nee ye nlankɛ vi ɛyazonlɛ ɛlɛba sua nu. Na ɔbizale kɛ, “Duzu a ɛlɛgyegye menli ne mɔɔ yemɔti bɛlɛsu a?” Na bɛvale Gyeebɛhye amaneɛ ne bɛbɔle ye.

⁶ Mɔɔ Sɔɔlo dele amaneɛ ne la, ɛkɛ ne ala Nyamenle Sunsum ne dwule ɔ nwo zo, na ye ahonle futule mɔɔ ɔyɛ ɔ nwo ɛhwee a ɔnyɛ boɛ a.

⁷ Ɔhyele nlankɛ nwiɔ ɔpepɛle bɛ nzokanzoka ɔmanle soanvolɛma vale hɔle Yizilayɛ maanle ne anu amuala na ɔhanle kɛ, “Awie biala mɔɔ andoa Sɔɔlo nee Samoɛle, ɔ nee bɛ angɔ konle ne la, kɛ bɛbapepɛ ye nlankɛ ne mɔ nzokanzoka la ɛne.” Ɛdɛnkɛma anwo ɛzulolɛ dɔle menli ne anwo zo, yemɔti bɛ kɔsɔɔti bɛrale.

⁸ Sɔɔlo boɔboale bɛ nloa wɔ Bizɛke; menli mɔɔ vi Yizilayɛ la le apenle ngoko ɛya nsa yɛɛ menli mɔɔ vi Dwuda la le apenle ngoko abulasa.

⁹ Na bɛzele soanvolɛma mɔɔ vi Gyeebɛhye rale la kɛ, “Bɛhɔ bɛhɔze bɛ menli ne kɛ, ‘Ɛhyema, toonwo mɔɔ ɔkadwu sɛnzɛngyinla la ɛnee bɛlie bɛ bɛvi munzule biala anu.’ ” Mɔɔ soanvolɛma ne mɔ vale amaneɛ ɛhye rabɔle Gyeebɛhyema la, ɔyɛle bɛ fɛ somaa.

¹⁰ Na bɛzele Neehahye kɛ, “Ɛhyema yɛbava yɛ nwo yeamaa wɔ. Debie biala mɔɔ ɛkulo la, fa yɛ yɛ.”

¹¹ Aleɛ hyenle nwonlomɔ mangyee ne la Sɔɔlo hyɛle ye ɛlɔnema ne mɔ anu ekpunli nsa. Bɛhɔholole Amɔnoma anwo zo wɔ bɛ azokoɛleɛ ne; bɛhuhunle bɛ toonwo sɛnzɛngyinla. Bɛdabɛ mɔɔ bɛvile ɛsalɛ la anye zo danle bɛ, bɛbɔle asande mɔɔ bɛ nuhua nwiɔ bɔbɔ angola ampɛ anli ɛleka ko a.

¹² Akee menli ne hanle hilele Samoɛle kɛ, “Nwane mɔ a hanle kɛ, ‘Sɔɔlo ɛnli yɛ nwo zo belemgbunli’ la? Bɛva bɛ bɛrɛla bɛmaa yɛhu bɛ.”

¹³ Sɔɔlo zele kɛ, “Bɛmmaku awie biala ɛnɛ, ɔluakɛ ɛnɛ a le kenle mɔɔ Ɛdɛnkɛma ɛlie Yizilayɛ ɛzie aze a.”

¹⁴ Na Samoɛle zele bɛ kɛ, “Bɛmaa yɛ kɔsɔɔti yɛhɔ Gelegale yɛhɔzi zolɛ bieko kɛ Sɔɔlo le yɛ belemgbunli.”

¹⁵ Yemɔti bɛ kɔsɔɔti bɛhɔle Gelegale bɛhɔziele Sɔɔlo belemgbunli wɔ Ɛdɛnkɛma anyunlu. Bɛbɔle anzonudwolɛ azu bɛmanle Ɛdɛnkɛma wɔ ɛkɛ ne. Na Sɔɔlo nee menli ne kɔsɔɔti lile fɛlɛko.