1 Sam 10 - BAEBOLO ANZƐƐ BULUKU NWUANZANWUANZA

¹ Akee Samoɛle vale dwora mɔɔ nwole wɔ nu la, ɔwolale ɔguale Sɔɔlo ati zo, ɔvole ɔ nvoka anwo na ɔzele kɛ, “Ɛdɛnkɛma ɛye wɔ kɛ ɛzie ye menli Yizilayɛma. Ɛbazie bɛ na wɔalie bɛ wɔavi bɛ kpɔvolɛma asa anu. Na ɛhye a le sɛkɛlɛneɛ mɔɔ bahile kɛ Ɛdɛnkɛma ɛye wɔ kɛ ɛzie ye menli ne la a.

² Saa ɛvi me nwo ɛke ɛnɛ a, ɛ nee mrenya nwiɔ bayia Relahyɛle sɛka ne anwo wɔ Zɛleza mɔɔ wɔ Bɛngyaman maanzinli nu la. Bɛbaze wɔ kɛ asoaso ne mɔ mɔɔ ɛhɔle bɛ ɛkpondɛlɛ la, bɛnwu bɛ, yemɔti ɛ ze ɛndwenle bɛ nwo bieko na wɔmɔ yɛɛ akee ɔlɛdi ɛ nwo nyane a, na ɔbiza ɔ nwo kɛ, ‘Na me ra ne, duzu a menyɛ a?’

³ Ɛvi ɛkɛ ne a ɛbahɔ toonwo wɔahɔdwu baka bie anwo wɔ Teebɔ. Ɛkɛ ne, ɛ nee mrenya nsa bayia kɛ bɛlɛ bɛ azubɔdeɛ bɛlɛkɔ Bɛtɛle bɛahɔbɔ azu bɛamaa Nyamenle. Ko lɛ mbɔnkye mralɛ nsa, ko lɛ kpanwo ahunguma nsa, yɛɛ ko noko lɛ nwoma kodoku mɔɔ nwanye wɔ nu la.

⁴ Bɛbabiza wɔ ahye na bɛamaa wɔ kpanwo ne nwiɔ, na anrɛɛ die.

⁵ Akee ɛbadwu Nyamenle Boka, wɔ Gebɛya, ɛleka mɔɔ Filisitiama azokoɛleɛ ne wɔ la ademgbole ne mɔɔ fa kɔ sua ne azo la anu, ɛbanwu Nyamenle kpɔmanvolɛma ekpunli bie mɔɔ vi boka ne azo azukponle ne anwo ɛlɛtolo ara la na bɛlɛka Nyamenle nrɛlaleɛ, bɛsi agole na bɛbɔ getaa kpole, akɛya, fulutu, yɛɛ ɛto.

⁶ Na arɛlevilɛ nu ala, Ɛdɛnkɛma Sunsum ne badwu ɛ nwo zo kpole bie na ɛ nee bɛ aha Nyamenle nrɛlaleɛ ne na wɔayɛ sonla ngakyile.

⁷ Saa sɛkɛlɛneɛ ɛhye mɔ sisi a, debie biala mɔɔ Nyamenle kɛze wɔ kɛ ɛyɛ la, yɛ. Ɔluakɛ Nyamenle nee wɔ a lua a.

⁸ Ɛbalumua me nyunlu wɔ Gelegale, na mebarayia wɔ ɛkɛ na mearabɔ ɛyelalɛ nee anzonudwolɛ azu. Anrɛɛ kendɛ me ɛkɛ ne kenle nsuu kɔkpula kɛ menwɔrahile wɔ deɛ mɔɔ ɔwɔ kɛ ɛyɛ la.”

⁹ Mɔɔ Sɔɔlo vile Samoɛle anwo ɛkɛ ne na ɔkɔ la, Nyamenle manle ye ahonle nee ye subane hakyile; edwɛkɛ biala mɔɔ Samoɛle hanle hilele ye la yɛle zɔhane kenle ko ne ala.

¹⁰ Mɔɔ Sɔɔlo nee ye sonvolɛ ne dwule Gebɛya la, bɛ nee Nyamenle kpɔmanvolɛma ekpunli bie yiale. Arɛlevilɛ nu Nyamenle Sunsum ne dwule Sɔɔlo anwo zo kpole bie, na ɔ nee bɛ zile agole na bɛhanle Nyamenle nrɛlaleɛ ne.

¹¹ Menli mɔɔ ze ye dɛba la nwunle kɛ ɔ nee Nyamenle kpɔmanvolɛma ne mɔ ɛlɛka Nyamenle nrɛlaleɛ ne la, bɛbizebizale bɛ nwo ngoko kɛ, “Duzu edwɛkɛ a ɛzi Kehye ara ye anwo zo a? Ɛnee Sɔɔlo ɔdaye noko yeyɛ Nyamenle kpɔmanvolɛ ɔ?”

¹² Nrenya ko mɔɔ vi ɛkɛ ne la zele kɛ, “Na Nyamenle kpɔmanvolɛma ɛhendeɛ ne mɔ ɛ, bɛnea a ɛnee bɛ ze mɔ a le nwane mɔ?” Yemɔti ɔrayɛle ɛrɛlɛ kɛ, “Na Sɔɔlo ɔdaye noko ɔboka Nyamenle kpɔmanvolɛma anwo ɔ?”

¹³ Mɔɔ Sɔɔlo wiele ye agole ne si, na ɔwiele Nyamenle nrɛlaleɛ ne ka la, ɔhɔle azukponle ne anwo wɔ boka ne azo.

¹⁴ Sɔɔlo awuvuanyi ne nwunle Sɔɔlo nee ye sonvolɛ ne; ɔbizale bɛ kɛ, “Nienwu a bɛhɔle a?” Sɔɔlo buale kɛ, “Yɛhɔle asoaso ne mɔ ɛkpondɛlɛ. Mɔɔ yɛkpondɛle bɛ toonwo na yɛannwu bɛ la, yɛhɔle Samoɛle anwo lɔ.”

¹⁵ Sɔɔlo awuvuanyi ne bizale ye kɛ, “Mesɛlɛ wɔ, duzu edwɛkɛ a Samoɛle hanle hilele wɔ a?”

¹⁶ Sɔɔlo zele ɔ wuvuanyi ne kɛ, “Yɛhɔle la, ɔkpakyele nu wienyi ɔzele yɛ kɛ bɛnwu asoaso ne mɔ.” Na mɔɔ fane ye belemgbunlililɛ ne anwo mɔɔ Samoɛle hanle la, Sɔɔlo ambɔ zolɛ.

Bɛzie Sɔɔlo belemgbunli

¹⁷ Akee Samoɛle vɛlɛle Yizilayɛma amuala manle bɛrale Ɛdɛnkɛma ɛzonlenlɛ ayia wɔ Mezepa;

¹⁸ ɔzele bɛ kɛ, “Kɛ Ɛdɛnkɛma, Yizilayɛ Nyamenle ne se la ɛne, ‘Menyele bɛ menvile Yigyibiti na menliele bɛ menvile Yigyibitima nee maanle maanle mɔɔ sisile bɛ la asa anu.

¹⁹ Mele bɛ Nyamenle mɔɔ die bɛ fi bɛ ngyegyelɛ nee bɛ ngyianlɛ muala anu a. Noko ɛnɛ bɛkpo me na bɛze me kɛ, memaa bɛ belemgbunli.’ Yemɔti bɛ kɔsɔɔti bɛrɛla bɛrayia Ɛdɛnkɛma anyunlu ɛke, bɛgua ye mbusua ekpunli ekpunli nee mbusua ekpulike ekpulike, kɛmɔ ko biala dodo de la.”

²⁰ Akee Samoɛle manle mbusua ekpunli ekpunli ne mɔ rale ngoko; bɛguale nzeleba la Ɛdɛnkɛma yele Bɛngyaman abusua ekpunli ne.

²¹ Samoɛle manle Bɛngyaman abusua ekpunli ne anu amra ne rale ye awuke awuke, na nzeleba ne bɔle Meetelae awuke nu amra. Mrenya mɔɔ wɔ Meetelae awuke nu la rale na bɛyele Sɔɔlo mɔɔ ɔ ze a le Kehye la. Bɛkpondɛle Sɔɔlo, na bɛannwu ye,

²² yemɔti bɛbizale Ɛdɛnkɛma kɛ, “Awie bieko tɛbɔ ɛkɛ ɔ?” Ɛdɛnkɛma zele kɛ, “Sɔɔlo vea ninyɛne edukue ne anzi nehane.”

²³ Na bɛnriandile bɛhɔhyele ye bɛrale. Ɔragyinlanle bɛ avinli la ɛnee ɔwale ɔtɛla awie biala mɔɔ wɔ ɛkɛ ne la.

²⁴ Na Samoɛle zele menli ne kɔsɔɔti kɛ, “Sonla ne mɔɔ Ɛdɛnkɛma ɛye ye ɛmaa bɛ la ɛne, bɛnwu ye ɔ? Awie biala ɛnle menli ye avinli mɔɔ nee ye sɛ a.” Na menli ne kɔsɔɔti deanle nuhua kɛ, “Belemgbunli ne ɛnyi ɛhyɛ.”

²⁵ Akee Samoɛle hanle belemgbunli dibilɛ nee ye gyima hilele menli ne. Ɔhɛlɛle ɛhye mɔ buluku nu, na ɔvale ɔdole ɛleka nwuanzanwuanza wɔ Ɛdɛnkɛma anyunlu. Akee Samoɛle manle menli ne kɔsɔɔti hɔle bɛ azua nu.

²⁶ Sɔɔlo ɔdaye noko ɔhɔle ye sua zo Gebɛya. Menli mɔɔ anwo yɛ se na Nyamenle asa wɔ bɛ nwo zo la nee ye hɔle.

²⁷ Na menli kpamgbanvolɛma bie zele kɛ, “Duzu debie kpaziwɔkɛ bɔbɔ yɛɛ sonla ɛhye kɛhola kɛyɛ kɛmaa yɛ a?” Bɛkpole ye, bɛammaa ye ahyɛlɛdeɛ biala, noko Sɔɔlo andɛne bɛ zo.