1 Pit 3 - BAEBOLO ANZƐƐ BULUKU NWUANZANWUANZA

Agyalɛ nwo folɛdulɛ

¹ Bɛmɛ nwuvolɛ mraalɛ, bɛbɛlɛ bɛ nwo aze bɛmaa bɛ hu mɔ, amaa nuhua mɔɔ ɔ hu ɛnlie Nyamenle Edwɛkɛ ne ɛnli la, bɛalua bɛ nyɛleɛ zo bɛahwe ye bɛarɛlɛ Nyamenle, mɔɔ ɔnrɛhyia kɛ bɛkɛha edwɛkɛ kpɔkɛ ko bɔbɔ a,

² ɔboalekɛ bɛbanwu bɛ nwo enililɛ nee bɛ anwondelɛ wɔ bɛ nyɛleɛ nu.

³ Bɛmmafa ninyɛne mɔɔ le kɛ bɛ ti ɛyɛlɛ, mgbɔba, agudeɛ anzɛɛ ndanlɛ ngɛnlɛma ɛhedalɛ bɛsiezie bɛ nwo kɛ bɛfa bɛamaa bɛ nwo ayɛ fɛ.

⁴ Bɛmaa bɛ nyamenlezo anwofɛlɛko ne mɔɔ wɔ bɛ nu la ɛvinde. Nyamenlezo anwofɛlɛko ɛhye vea bɛ ahonle ne mɔ anu, na yemɔ a le bɛ bɛtɛɛyɛlɛ nee bɛ koonwuyɛlɛ subane ne. Ɛhye a le kɛnlɛma na ɔsɔ Nyamenle anye a.

⁵ Ɔluakɛ mraalɛ mɔɔ dule bɛ nwo manle Nyamenle wɔ mekɛ mɔɔ ɛze ɛhɔ na bɛnyianle anyelazo wɔ Nyamenle anu la adenle mɔɔ luale zolɛ zieziele bɛ nwo la a le kɛ bɛhanle bɛ nwo aze bɛmanle bɛ hu mɔ.

⁶ Ɛnee kɛ Sɛla de la ɛne; ɔyɛle tieyɛ ɔmanle ɔ hu Ebileham na ɔvɛlɛle ye ɔ menle. Kɛkala, saa bɛbɔ ɛbɛla kpalɛ na bɛammaa debie biala anwunlonwunla bɛ a, bɛle ɔ mra mraalɛ.

⁷ Zɔhane ala yɛɛ bɛmɛ mrenya noko, saa bɛ nee bɛ ye mɔ de a ɔwɔ kɛ bɛnwu ye kɛ bɛle mraalɛ na bɛnlɛ anwosesebɛ a. Yemɔti bɛli bɛ eni, ɔboalekɛ bɛ nee bɛ bɛ muala a bɛbanyia Nyamenle ngoane ɛlolɛ ahyɛlɛdeɛ ne a. Bɛyɛ ɛhye, amaa debie biala andenda bɛ gyakɛ anu wɔ bɛ nzɛlɛlɛ nu.

Kpalɛyɛlɛ nwo amaneɛnwunlɛ

⁸ Awieleɛ ne, ɔwɔ kɛ bɛ muala bɛ adwenle yɛ ko; bɛde bɛ gɔnwo mɔ nyane bo na bɛhulo bɛ nwo ngoko ngoko kɛ bɛle mediema. Bɛnyia ahonle kpalɛ na bɛbɛlɛ bɛ nwo aze.

⁹ Bɛmmafa ɛtane bɛtua ɛtane kakɛ anzɛɛ bɛmmafa butule bɛyia butule. Bɛva nyilalɛ nee kosoɛ ɛyɛlɛ bɛdua ɛtane kakɛ, ɔluakɛ ɛhye ati yɛɛ Nyamenle vɛlɛle bɛ a, amaa bɛanyia nyilalɛ.

¹⁰ Nyamenle Edwɛkɛ ne se, “Awie mɔɔ kulo ngoane na ɔkpondɛ anyelielɛ la ɛgyakyi adalɛ ɛbɔlɛ nee munzule edwɛkɛ ɛhanlɛ.

¹¹ Ɔwɔ kɛ ɔtwe ɔ nwo ɔfi ɛtane nwo na ɔyɛ kpalɛ; ɔwɔ kɛ ɔkpondɛ anzonudwolɛ bo zo na ɔdi ɔ nzi.

¹² Ɔluakɛ Nyamenle anye wɔ pɛlepɛlelilɛma anwo zo, na ɔbuke ɔ nzo ɔtie bɛ nzɛlɛlɛ dahuu. Na bɛdabɛ mɔɔ bɛdi ɛtane la, Awulae kakyi ɔ nzi si bɛ.”

¹³ Saa bɛpele bɛdi boɛ a, nwane yɛɛ kɛhola kɛyɛ bɛ debie a?

¹⁴ Na saa bɛnwu amaneɛ wɔ bɛ pɛlepɛlelilɛ ti bɔbɔ a, bɛbanyia nyilalɛ. Bɛmmasulo awie biala, yɛɛ bɛmmamaa bɛ ahonle tu.

¹⁵ Bɛzulo Kelaese wɔ bɛ ahonle nu kɛ ɔle bɛ Awulae. Dahuu bɛziezie bɛ nwo, amaa saa awie biza bɛ bɛ anyelazo ne mɔɔ bɛlɛ ye la anwo edwɛkɛ a bɛahola bɛaye ɔ nloa,

¹⁶ noko anrɛɛ bɛva bɛtɛɛyɛlɛ amaa saa awie mɔ keha bɛ nwo edwɛkɛ ɛtane ɛtane a, bɛ subane kpalɛ ne, kɛmɔ bɛle Kelaese ɛdoavolɛma na bɛdi boɛ la agua menli zɔhane mɔ anyunlu aze.

¹⁷ Ɔluakɛ saa mɔɔ Nyamenle kpondɛ la a le kɛ yɛkɛli boɛ na yɛkɛnwu amaneɛ a, ɛnee ye zɔhane le kpalɛ, tɛla kɛ yɛkɛli ɛtane a.

¹⁸ Ɔluakɛ Kelaese mumua ne wule kokye wɔ awie biala ɛtane ti. Ɔle sonlakpalɛ, noko ɔwule ɔmanle ɛtanevolɛma, amaa yealie yɛ yeahɔmaa Nyamenle. Bɛhunle ye wɔ nwonane nu, noko bɛdwazole ye wɔ sunsum nu,

¹⁹ na wɔ sunsum ne anu yɛɛ ɔhɔle ɔhɔbɔle Edwɛkpa ne nolo ɔhilele sunsum nu amra mɔɔ bɛgua bɛ anga la a.

²⁰ Sunsum ɛhye mɔ a le bɛdabɛ mɔɔ bɛyɛle Nyamenle anwo anzosesebɛ wɔ mekɛ mɔɔ ɛnee Nyamenle ɛlɛkendɛ abotane nu ala yeamaa Nowa abobɔ ɛlɛne ne la. Bɛdabɛ ekyi ne ala, bɛle mɔtwɛ, mɔɔ ɛnee bɛwɔ ɛlɛne ne anu wɔ azule ne anye la yɛɛ bɛliele bɛ ngoane a.

²¹ Ɛzɔnenlɛ le sɛkɛlɛneɛ mɔɔ gyi ɛkɛ maa nzule ne a. Ɔnle sonlabaka nwo evinli ɛnrinzinlɛ, ɔle Nyamenle nyunlu modolɛ kɛ ɔmaa bɛ adwenle mɔɔ anu la ɛkɛ ne wienyi la, amaa ɔlua Awulae Gyisɛse Kelaese ewudwazo ne azo bɛalie bɛ ngoane.

²² Yemɔ yɛɛ yehɔ anwuma na ɔde Nyamenle asa fema zo na Nyamenle soanvolɛma nee anwuma tumivolɛma nee mgbolema amuala sonle ye a.