1 Edk 8 - BAEBOLO ANZƐƐ BULUKU NWUANZANWUANZA

Bɛngyaman abo zo amra

¹ Bɛngyaman ara nrenya kpanyinli a le Bila. Mralɛ mrenya mɔɔ doɔdoa zolɛ la a le Ahyebɛle, Ahɛla,

² Noha, yɛɛ Releefa.

³ Bila amra mrenya ne mɔ ɛne: Adaa, Gila, Abaehɛde,

⁴ Abaehyua, Neeyaman, Ahowa,

⁵ Gila, Hyɛfufan, yɛɛ Hulam.

^6-7 Yihɛde amra mrenya ɛne: Neeyaman, Ahaegya, yɛɛ Gila mɔɔ le Hɛgelam, mɔɔ wole Ɛza nee Ahaehɛde la. Yihɛde amra mrenya ne mɔ le mbusua mgbanyinli wɔ bɛ ze mɔ awuke nu wɔ Giba. Nzinlii bɛdule bɛ ɛkɛ ne na bɛhɔdɛnlanle Manahate. Ɛza ɔ ze Gila nee Ahaehɛde a lile bɛ ti manle bɛdule bɛhɔle a.

^8-9 Hyeehaleeyem bɔle ye mraalɛ nwiɔ mɔɔ ɛnee ɔgya bɛ la ewole. Bɛmɛ a le Huhyem nee Beeyala. Akee ɔhɔdɛnlanle Mowabe, ɔgyale Hodɛhye na ɔ nee ye wole mrenya nsuu. Bɛmɛ a le Dwobabe, Zaebea, Mihya, Malekam,

¹⁰ Gyiyɛze, Sakaya, yɛɛ Mɛɛma. Bɛ muala bɛyɛle mbusua mgbanyinli.

¹¹ Hyeehaleeyem nee ɔ ye dɛba ne mɔɔ bɛfɛlɛ ye Huhyem la wole mrenya nwiɔ: Abaetɛbe nee Ɛlepeeyale.

¹² Ɛlepeeyale wole mrenya nsa: Yibɛ, Maehyam, yɛɛ Hyimɛde. Hyimɛde a kyekyele azuamgbole Ono nee Lɔɔdo nee azua ngyikyi mɔɔ zuozua bɛ la a.

Bɛngyaman abo zo amra mɔɔ wɔ Gate nee Ayegyalɔn la

¹³ Bɛlaya nee Hyima le mbusua mgbanyinli wɔ menli mɔɔ hɔdɛnlanle Ayegyalɔn la anu. Bɛhɔhonle bɛvale suakpole Gate na bɛvoanle menli mɔɔ wɔ zolɛ la amuala.

¹⁴ Bɛlaya abo zo amra ne bie mɔ ɛne: Ahayo, Hyeehyake, yɛɛ Gyɛlɛmo,

¹⁵ Zɛbadaya, Ɛlade, Yida,

¹⁶ Maekeɛle, Yehyepa, yɛɛ Dwoha, bɛ muala bɛle Bɛlaya abo zo amra.

Bɛngyaman abo zo amra mɔɔ wɔ Gyɛlusalɛm la

¹⁷ Ɛlepeeyale abo zo amra bie mɔ a le Zɛbadaya, Mɛhyɛlam, Hezekae, Hibɛ,

¹⁸ Yehyemɛlae, Yezelaya, yɛɛ Dwobabe.

^19-21 Hyemɛyae abo zo amra bie mɔ a le Gyeekem, Zekelae, Zabedae, Ɛleyinae, Zelɛtae, Yilayɛle, Adaya, Bɛlaya, yɛɛ Hyemelate.

^22-25 Hyeehyake abo zo amra a le Yehyepan, Yibɛ, Yilayɛle, Abedɛn, Zekelae, Heeman, Hananaya, Yilam, Antotaegya, Yefɛdaya, yɛɛ Pɛnuwɛle.

^26-27 Gyɛloham abo zo amra a le Hyamehyɛlae, Hyihalaya, Atalaya, Gyeeyalɛhyaya, Yilaegya, yɛɛ Zekelae.

²⁸ Ɛhye mɔ a le mbusua mgbanyinli nee bɛ bo zo amra mɔɔ dɛnlanle Gyɛlusalɛm la.

Bɛngyamanema mɔɔ dɛnlanle Gebɛyɔn nee Gyɛlusalɛm la

²⁹ Gebɛyɔn ɔ ze Gyɛyeyɛle a kyekyele sua bɔdenle Gebɛyɔn a. Bɛfɛlɛ ɔ ye Meeyaka,

³⁰ yɛɛ ɔ ra nrenya kpanyinli a le Abedɛn. Ɔ mra mrenya mɔɔ ɛha la a le Zɔɔ, Kehye, Beeyale, Nɛɛ, Needabe,

³¹ Gidɔ, Ahayo, Zikɛ,

³² yɛɛ Mekelo mɔɔ le Hyemɛya ɔ ze ne. Bɛ nee bɛ nwo amra dɛnlanle Gyɛlusalɛm, bɛ nee bɛ mbusua mɔɔ ɛha la anye bɔ zolɛ.

Belemgbunli Sɔɔlo abusua ɛlɔnwɔne ne

³³ Nɛɛ ara a le Kehye, yɛɛ Kehye ara a le Belemgbunli Sɔɔlo. Sɔɔlo wole mrenya nna: Dwɔnatan, Malekaehyua, Abenadabe, yɛɛ Ɛhyebeeyale.

³⁴ Dwɔnatan ara nrenya a le Mɛlebeeyale mɔɔ wole Maeka la.

³⁵ Maeka wole mrenya nna: Paetɔn, Milɛke, Tɛlɛga, yɛɛ Ehaze.

³⁶ Ehaze wole Gyɛhowada, yɛɛ Gyɛhowada wole mrenya nsa. Bɛmɛ a le Alɛmɛte, Azemeevɛte, yɛɛ Zemelae. Zemelae wole Moza,

³⁷ Moza wole Baenɛya, yɛɛ Baenɛya wole Releefa. Releefa wole Ɛliesa, yɛɛ Ɛliesa wole Ezɛle.

³⁸ Ezɛle wole mrenya nsia: Azelaekam, Bokɛlu, Yehyemeeyɛle, Hyialaya, Obadaya, yɛɛ Heenan.

³⁹ Ezɛle adiema nrenya Yihyɛke wole mrenya nsa: Yulam a le kpanyinli a; Gyiwɛhye doa ye, yɛɛ Yilefɛlɛte doa Gyiwɛhye.

⁴⁰ Yulam amra mrenya ne mɔ anwo yɛ ɛzulolɛ kpalɛ wɔ konle nu, yɛɛ bɛze ɛda to kpole kpalɛ. Yulam wole mralɛ mrenya na ɔnyianle nlɔnra dɔɔnwo, bɛ muala bɛlua ɛya ko abulanlu. Bɛdabɛ mɔɔ bɛbobɔ bɛ aluma la amuala vi Bɛngyaman abusua ekpunli ne anu.