1 Edk 4 - BAEBOLO ANZƐƐ BULUKU NWUANZANWUANZA

Dwuda abo zo amra

¹ Dwuda abo zo amra ne bie mɔ ɛne: Pɛlɛze, Hɛzelɔn, Kaamae, Huuli, yɛɛ Hyobale.

² Hyobale ara a le Riliaya, Riliaya wole Gyeehate, Gyeehate wole Ahumae nee Leehade mɔɔ bɛ bo zo amra a wɔ Zola la.

^3-4 Huuli a le Kalɛbe nee ɔ ye Yifelate amra mrenya ne mɔ anu kpanyinli a, yɛɛ ɔ bo zo amra a kyekyele Bɛtelɛhɛm a. Huuli amra mrenya nsa: Yitam, Pɛnuwɛle, yɛɛ Yizɛ. Yitam wole mrenya nsa: Gyɛzelii, Yehyema, yɛɛ Yedebahye. Eza ɔwole ralɛ raalɛ ko, bɛfɛlɛ ye Hazɛlɛponae. Pɛnuwɛle a kyekyele suakpole Gidɔ a, yɛɛ Yizɛ a kyekyele Huhya a.

⁵ Ahyɔɔ, mɔɔ wole Tɛkowa mɔɔ kyekyele Tɛkowa la gyale mraalɛ nwiɔ, Hila nee Neeyala.

⁶ Ɔ nee Neeyala wole mrenya nna: Ahuzam, Hifɛ, Timɛnae, yɛɛ Heeyahahyetalae.

⁷ Ahyɔɔ nee Hila wole mrenya nsa: Zilɛte, Yezaa, yɛɛ Ɛtenan.

⁸ Kɔɔzo a wole Anubu nee Zobiba a. Bɛ nla ne vi Hɛlɛm ara Ahaahɛle abusua ekpulike ne anu.

⁹ Nrenya bie wɔ ɛkɛ, bɛfɛlɛ ye Gyeebɛze. Bɛdi ye eni kpole wɔ ɔdaye ye abusua ne anu bɛtɛla awie biala. Ɔ nli donle ye Gyeebɛze, ɔluakɛ ɔwo ye la ɔdele nyane kpole kpalɛ.

¹⁰ Na Gyeebɛze zɛlɛle Yizilayɛ Nyamenle ne kɛ, “Yila me, Nyamenle, na maa me azɛlɛ kpole. Ɛ nee me ɛlua na ye me fi munzule mɔɔ kɛmaa menwɔde nyane la anu.” Na Nyamenle diele ye nzɛlɛlɛ, ɔyɛle mɔɔ ɔkpondɛ la ɔmanle ye.

Mbusua bie mɔ noko aluma

¹¹ Hyuhya adiema Kalɛbe wole nrenya ko, bɛfɛlɛ ye Mihɛ. Mihɛ wole Ɛhyetɔn,

¹² yɛɛ Ɛhyetɔn wole mrenya nsa: Bɛteleefa, Pasia, yɛɛ Tɛhena. Tɛhena a kyekyele suakpole Neehahye a. Menli ɛhye mɔ abo zo amra dɛnlanle Rilika.

¹³ Kinaze wole mrenya nwiɔ, Ɔteneɛle nee Sɛlaya. Ɔteneɛle ɔdaye ɔwole mrenya nwiɔ, Heetate nee Miyonotae.

¹⁴ Miyonotae wole Ɔfela. Sɛlaya wole Dwowabe, mɔɔ kyekyele Dwinvolɛma Bɔnza la. Awie biala mɔɔ wɔ sua ɛhye azo la le dwinvolɛ.

¹⁵ Gyɛfɛni ara Kalɛbe wole mrenya nsa: Ayelu, Yila, yɛɛ Neeyam. Yila a wole Kinaze a.

¹⁶ Gyɛhalɛli wole mrenya nna: Zefe, Zaefa, Taelea, yɛɛ Asali.

^17-18 Ɛzela wole mrenya nna: Gyitɛ, Milɛde, Yifɛ, yɛɛ Gyalɔn. Milɛde gyale Yigyibiti belemgbunli ara raalɛ, bɛfɛlɛ ye Bitaya. Ɔ nee ye wole ralɛ raalɛ, Meleam, yɛɛ mrenya nwiɔ, Hyameeyae nee Yehyeba. Yehyeba a kyekyele Ɛhyetɛmowa a. Milɛde eza gyale raalɛ bie mɔɔ vi Dwuda abusua nu la, na ɔ nee ye wole mrenya nsa. Bɛmɛ a le Gyilɛde, mɔɔ kyekyele Gidɔ la; Hibɛ mɔɔ kyekyele Soko la, yɛɛ Gyakuteɛle. Ɔdaye ɔkyekyele sua ne mɔɔ bɛfɛlɛ ye Zanowa la.

¹⁹ Hodaya gyale Neeham adiema raalɛ. Bɛ bo zo amra a le abusua ne mɔɔ bɛfɛlɛ ye Gaam la. Bɛdɛnlanle sua ne mɔɔ bɛfɛlɛ ye Kiyaela la azo. Eza bɛ bie mɔ a le Meeyaka abusua ne mɔɔ bie mɔ dɛnlanle Ɛhyetɛmowa sua zo la.

²⁰ Hyaemɔn wole mrenya nna: Amenɔn, Relena, Bɛneheenan, yɛɛ Taelɔn. Yehyae wole mrenya nwiɔ. Bɛmɛ a le Zohɛte nee Bɛnzohɛte.

Hyila abo zo amra

²¹ Hyila le Dwuda amra mrenya ne mɔ ko. Ɔ bo zo amra bie mɔ a le Ɛɛ, mɔɔ kyekyele Likaa; Leeyada, mɔɔ kyekyele Malihya la. Abusua ɛhye, lenen ndanlɛ a bɛnwo a; bɛdɛnlanle Bɛte Ahyebia.

²² Bie mɔ noko a le Dwokem nee menli mɔɔ dɛnlanle sua ne mɔɔ bɛfɛlɛ ye Koziba la azo la, yɛɛ Dwowahye nee Sɛlafe, mɔɔ bɛmɛ bɛgyale Mowabe mraalɛ na bɛhɔdɛnlanle Bɛtelɛhɛm la. (Ɛhye mɔ le tetedwɛkɛ mɔɔ ɛhyɛ kpalɛ a.)

²³ Bɛwɔ belemgbunli ne gyima nu bɛnwo mbuakɛ nee dwora bɛmaa belemgbunli ne. Bɛdɛnlanle Nɛtaem nee Gɛdɛla.

Semɛyɔn abo zo amra

²⁴ Semɛyɔn wole mrenya nnu: Nɛmuwɛle, Gyeemen, Gyɛlebe, Zila, yɛɛ Hyeeyɛle.

²⁵ Hyeeyɛle ara a le Hyalɛm: ye anlɔnra a le Mebesam, yɛɛ ye angabɛnzo a le Mehyema.

²⁶ Akee abusua ɛlɔnwɔne ne ndoazo ɛne: Mehyema wole Hamuwɛle, Hamuwɛle wole Zakɛ, yɛɛ Zakɛ wole Hyemɛyae.

²⁷ Hyemɛyae wole mrenya bulu nee nsia yɛɛ mraalɛ nsia, noko ɔ mediema mrenya nee ye abusua ne anu amra anwo dɔɔnwo biala. Zɔhane ati Semɛyɔn abusua ekpunli ne andɛlɛ kɛ Dwuda abusua ekpunli ne la.

²⁸ Ɔvi mekɛ zɔhane toonwo mɔɔ badwu Belemgbunli Devidi anwo zo la, Semɛyɔn abo zo amra dɛnlanle azua ɛhye mɔ azo: Biyɛhyiba, Moleeda, Heezaahyuale,

²⁹ Belehaa, Yizɛm, Tolade,

³⁰ Beetuwɛle, Hɔɔma, Zekelage,

³¹ Bɛte Maakabo, Heezaasusem, Batebelae, yɛɛ Hyeeyaleeyem.

³² Eza bɛdɛnlanle ɛleka nnu bieko. Ɛleka ne mɔ a le Yitam, Eyen, Relemɔn, Tokɛn, yɛɛ Ahyan,

³³ nee namunamu mɔɔ wɔ ɛkɛ ne toonwo kɔdwu sua ne mɔɔ bɛfɛlɛ ye Beeyalate la nyiakɛ mɔɔ di kɔ adɔleɛ la. Bɛ abusua ɛlɔnwɔne ne nee ɛleka mɔɔ bɛdɛnlanle la tetedwɛkɛ mɔɔ bɛva bɛzie toonwo la, yemɔ ɛne.

^34-38 Menli ɛhye mɔ a le bɛ mbusua ne mɔ mgbanyinli a: Mɛhyobabe, Gyamelɛke, Amazaya ara Dwohyaa, Dwowɛle, Gyihu (Dwohyebaya mɔɔ ɔ ze a le Sɛlaya na ɔ nlenya a le Aseɛle la a wole ye a), Ɛleyoyinae, Gyeyakoba, Gyɛhyohaya, Asaya, Adeɛle, Gyɛsemeɛle, Bɛnaya, Zaeza (Aalɔn mɔɔ ɔ bo zo amra a le Gyɛdaya, Hyemelae yɛɛ Hyɛmaya la ara Hyaefae a wole ye a.) Bɛ abusua ne hɔle zolɛ dɛlɛle la ati,

³⁹ bɛdɛlɛle bɛhɔle adɔleɛ toonwo asɛɛ Gidɔ bɛkpondɛle adidileka bɛmanle bɛ nyɛmoa wɔ bɔnza ne mɔɔ bɛhye sua ne nu la aduduleɛ.

⁴⁰ Bɛnyianle azɛlɛ kpalɛ mɔɔ kye aleɛ na bɛ nyɛmoa didi zolɛ a ɔyɛ boɛ la; azɛlɛ ne tɛlɛ, ɛkɛ ne le sulokoko, yɛɛ anzonudwolɛ wɔ ɛkɛ. Menli mɔɔ ɛnee wɔ ɛkɛ ne la vi Ham.

⁴¹ Dwuda Belemgbunli Hɛzikaya mekɛ zo, menli mɔɔ bɛbobɔ bɛ aluma wɔ ɛke la hɔle Gilaa na bɛhɔzɛkyele menli mɔɔ wɔ ɛkɛ ne la ndanlɛ azua nee bɛ kpɔda ne mɔ. Bɛvoanle menli mɔɔ wɔ zolɛ la, na bɛdɛnlanle ɛkɛ ne kpɔkpɔ, ɔboalekɛ ɛkɛ ne le kpalɛ maa bɛ nyɛmoa ne mɔ.

⁴² Semɛyɔn abusua ekpunli ne anu menli ɛya nnu bɛdabɛ bɛhɔdɛnlanle Yidɔm aduduleɛ. Yehyae amra ne mɔ a vale bɛ hɔle a. Bɛmɛ a le Pɛlataya, Nialaya, Relɛfaya, yɛɛ Ɛzeɛle.

⁴³ Bɛhunle Amalɛkema mɔɔ hale ɛkɛ ne la, na ɛkɛ ne yɛɛ bɛde toonwo yeradwu ɛnɛ a.