1 Edk 28 - BAEBOLO ANZƐƐ BULUKU NWUANZANWUANZA

Devidi yɛ Ɛzonlenlɛ Sua ne anwo ngyehyɛlɛ

¹ Belemgbunli Devidi akee yɛle kɛ Yizilayɛ mgbanyima kɔsɔɔti ɛrayia Gyɛlusalɛm. Yemɔti mbusua ekpunli ekpunli ne mɔ mgbanyinli, mgbanyima mɔɔ maanle ne anu gyima nwo amaamuo wɔ bɛ sa nu, mbusua mgbanyinli, bɛdabɛ mɔɔ bɛnea belemgbunli nee ɔ mra ne mɔ nyɛmoa nee gya zo, suakunlu ɛkɛ ne mgbanyima kɔsɔɔti, safohyenle mgbanyinli mɔɔ nea ɛlɔnema apenle nee ɛlɔnema ɛya nwo zo, yɛɛ maanle ne anu adile adile rayiale Gyɛlusalɛm.

² Devidi dwazole gyinlanle bɛ nyunlu ɛkɛ na ɔzele bɛ kɛ, “Me mediema nee me ɛlɔnema, bɛdie me. Menyɛle me adwenle kɛ mesi sua meamaa bɛava Ngyekyeleɛ Ɛlɛka ne, mɔɔ le Ɛdɛnkɛma yɛ Nyamenle ne agyakɛ abo ebia la bɛazie nuhua mɔɔ bɛndu ɔ bo bieko ɛlɛ a. Meboɔboa me nwo kɛ mesi Ɛzonlenlɛ Sua ne.

³ Noko yedua me kɛ memmasi, ɔboalekɛ mele ɛlɔnenli mɔɔ meha mogya dɔɔnwo megua a.

⁴ Ɛdɛnkɛma, Yizilayɛ Nyamenle ne, nleanle nu yele me nee me bo zo amra kɛ yɛli belemgbunli wɔ Yizilayɛma anwo zo dahuu. Ɔnleanle nu ɔyele Dwuda abusua ekpunli ne kɛ bɛli Yizilayɛma kɔsɔɔti ati, yɛɛ ɔnleanle nu ɔyele egya abusua ekpulike ne ɔvile Dwudama amuala avinli. Akee ɔnleanle abusua ekpulike zɔhane anu la, ɔyele me, ɔ nye liele kɛ ɔkɛye me ɔkɛvi egya awuke nu ɔkɛzie me Yizilayɛma belemgbunli.

⁵ Ɔmanle me mralɛ mrenya dɔɔnwo, na ɔnleanle nu ɔyele Sɔlɔmɔn kɛ yemɔ a ɔzie Yizilayɛ, Ɛdɛnkɛma ɔdaye ye belemgbunli maanle ne a.

⁶ “Ɛdɛnkɛma zele me kɛ, ‘Ɛ ra Sɔlɔmɔn ala yɛɛ bazi me Ɛzonlenlɛ Sua ne a. Menlea nu meye ye kɛ ɔle me ra, na mebayɛ ɔ ze.

⁷ Saa ɔdi me mɛla ne mɔ azo boɛ kɛmɔ kɛkala ɔdi zolɛ la a, mebamaa ye belemgbunlililɛ ne ahɔ zolɛ dahuu.’

⁸ “Zɔhane ati, me maanlema, meka ye wɔ yɛ Nyamenle ye anyunlu ɛke, nee bɛdabɛ, Ɛdɛnkɛma menli Yizilayɛma, mɔɔ bɛrayia ɛke la bɛ nyunlu kɛ, debie biala mɔɔ Ɛdɛnkɛma, yɛ Nyamenle ne ɛhyehyɛ ɛmaa yɛ la, bɛdie, na bɛyɛ, amaa bɛahɔ zo bɛadɛnla azɛlɛ kɛnlɛma ɛhye azo na menli mɔɔ li bɛ nzi la noko asa aha ye ayɛ bɛ ɛdeɛ dahuu.”

⁹ Akee ɔzele Sɔlɔmɔn kɛ, “Me ra, mese wɔ kɛ, die ɛ ze Nyamenle ne to nu na fa wɔ ahonle muala nee adwenle mɔɔ di munli la sonle ye. Ɔze yɛ adwenle nee mɔɔ yɛkpondɛ la. Saa ɛkɔ ye ɛkɛ ne a, ɔbalie wɔ. Na saa ɛkakyi ɛ nzi ɛsi ye a, ɔbakpo wɔ bɔkɔɔ.

¹⁰ Ɔwɔ kɛ ɛnwu ye kɛ Ɛdɛnkɛma ɛnlea nu ɛye wɔ kɛ ɛzi ye Ɛzonlenlɛ Sua nwuanzanwuanza ne. Si, fa wɔ ahonle nee wɔ anwosesebɛ kɔsɔɔti si.”

¹¹ Devidi vale Ɛzonlenlɛ Sua ne anwo ngɛlata mɔɔ bɛhyehyɛ, mɔɔ kile kɛ bɛsi bɛazi sua ne la wɔ zolɛ la manle Sɔlɔmɔn. Wɔ ngɛlata ne mɔ azo, bɛhile Ɛzonlenlɛ Sua mumua ne, nwolɛ azua, ɛleka mɔɔ bɛsie ninyɛne, anwuma ekpumgbunli ne mɔ, suakunlu ne mɔ, yɛɛ Nwuanzanwuanza Nu Nwuanzaanwu Ɛleka ne mɔɔ ɛkɛ ne a bɛbava sonla mɔɔ kɛyɛ ɛtane la ɛtane bɛahyɛ ye la.

¹² Eza ɔvale debie biala mɔɔ wɔ ye adwenle nu kɛ ɔbayɛ la anwo ngɛlata ɔmanle Sɔlɔmɔn. Ngɛlata ne mɔ kile kɛ bɛbazi bɛazi ɛleka mɔɔ bɛbali edwɛkɛ baguasee, nee ekpumgbunli ne mɔ mɔɔ ɛbɔ ye ɛyia, ye ekpumgbunli mɔɔ bɛbava ahyɛlɛ ninyɛne mɔɔ bɛdu bɛzie ahane bɛmaa Ɛdɛnkɛma nee ahyɛnze mɔɔ bɛfa bɛyɛ ɛzonlenlɛ gyima wɔ Ɛzonlenlɛ Sua ne anu la bɛazie nu la.

¹³ Devidi eza vale kɛ yezi yehyehyɛ ye kɛ sɛlɛvolɛma nee Livaema bazi ayɛ gyima, Ɛzonlenlɛ Sua ne anwo gyimayɛlɛ, nee Ɛzonlenlɛ Sua ne anu ninyɛne ne mɔ boɛ ɛnleanlɛ nwo ngɛlata manle Sɔlɔmɔn.

¹⁴ Ɔhilele dwɛtɛ fufule nee ezukoa nvutuke dodo mɔɔ bɛva bɛyɛ kyɛnze ko biala,

¹⁵ kɛnlaneɛ ko biala, kɛnlaneɛ baka,

¹⁶ dwɛtɛ fufule ɛkponle ne mɔ, nee ezukoa nvutuke ɛkponle ne mɔ mɔɔ bɛbava kpanwo ne mɔɔ bɛva bɛbɔ azu bɛmaa Nyamenle la bɛagua zolɛ la.

¹⁷ Eza ɔhilele ezukoa nvutuke tagyee dodo mɔɔ bɛva bɛyɛ faka ne mɔ, ahyɛnze nee kanrɛlɛ ne mɔ la, dwɛtɛ fufule nee ezukoa nvutuke dodo mɔɔ bɛva bɛyɛ kula ne mɔ la,

¹⁸ nee ezukoa nvutuke tagyee dodo mɔɔ bɛva bɛyɛ azukponle ne mɔɔ bɛbayela ɛyɛlɛ zo nee ehwili ne mɔɔ bazoa abɔdeɛ ne mɔ mɔɔ lɛ ndɛbalɛ na bɛdɛlɛdɛlɛ bɛ ndɛba ne mɔ anu bɛheda Ɛdɛnkɛma Ngyekyeleɛ Ɛlɛka ne azo la.

¹⁹ Belemgbunli Devidi zele kɛ, “Bɛhɛlɛ ɛhye mɔ amuala wɔ ngɛlata zo, kɛmɔ Ɛdɛnkɛma mumua ne zele me kɛ menyɛ la.”

²⁰ Belemgbunli Devidi zele ɔ ra Sɔlɔmɔn kɛ, “Yɛ ɛ nye gyɛlɛmgbɛɛnye na si wɔ ahonle. Bɔ gyima ne abo, mmamaa debie biala si wɔ adenle. Ɛdɛnkɛma Nyamenle ne, mɔɔ mesonle ye la nee wɔ balua. Ɔnrɛgyakyi ɛ nzi ɛlilɛ, ɔ nee wɔ balua toonwo yeahɔdwu mekɛ mɔɔ ɛkɛwie gyima biala mɔɔ wɔ Ɛzonlenlɛ Sua ne anwo la yɛ la.

²¹ Bɛhile sɛlɛvolɛma nee Livaema gyima mɔɔ ɔwɔ kɛ bɛyɛ wɔ Ɛzonlenlɛ Sua ne anu la. Dwinvolɛma mɔɔ ze gyima la ɛvua kɛ bɛkɛboa wɔ, yɛɛ menli ne kɔsɔɔti nee bɛ mgbanyima wɔ ɛ sa nu.”