1 Edk 27 - BAEBOLO ANZƐƐ BULUKU NWUANZANWUANZA

Ɛlɔnema nee maanle mgbanyinli ɛziezielɛ

¹ Yizilayɛ mbusua safohyenlema mɔɔ nea ɛlɔnema apenle nee ɛlɔnema ɛya nwo zo, nee mbɔlɔba mgbanyinli mɔɔ nleanle maanle ne bule la ɛne. Ɛvolɛ biala anu, siane ko biala ekpunli ko mɔɔ bɛ nloa le menli apenle ngoko abulanwiɔ nee nna la yɛɛ nee bɛ safohyenle kpanyinli ne bayɛ gyima a.

^2-15 Safohyenlema mɔɔ nleanle siane siane gyimayɛlɛ ne azo la ɛne: Siane mɔɔ lumua: Zabedeɛle ara Gyahyɔbɛyam (ɔvi Pɛlɛze abusua nu. Pɛlɛze abusua ne le Dwuda abusua ekpunli ne foa ko.) Siane mɔɔ tɔ zo nwiɔ: Dodae, ɔle Ahohae abo zo amra ne bie. (Ɔnle ɛkɛ ne a Mekelo a wɔ ɛkɛ a.) Siane mɔɔ tɔ zo nsa: Sɛlɛvolɛ Gyɛhɔyada ara Bɛnaya, yemɔ a ɔli “Abulasa Ne” ati a. (Ɔ ra Amezabade a lile ye agya nleanle ekpunli ɛhye anwo zo a.) Siane mɔɔ tɔ zo nna: Dwowabe adiema Asahɛle. (Ɔ ra Zɛbadaya a lile ye agya a.) Siane mɔɔ tɔ zo nnu: Hyamehɛte, ɔle Yezehaa abo zo sonla. Siane mɔɔ tɔ zo nsia: Yekɛhye mɔɔ vi Tɛkowa la ara Yila. Siane mɔɔ tɔ zo nsuu: Hilɛze, ɔle Yifelaemenli, ɔvi Pilɔn. Siane mɔɔ tɔ zo mɔtwɛ: Sebɛkae, ɔvi Huhya. (Ɔvi Zila abusua nu, yɛɛ Zila abusua ne le Dwuda abusua ekpunli ne foa ko.) Siane mɔɔ tɔ zo ngɔnla: Ebayizɛ, ɔvi Anato mɔɔ wɔ Bɛngyaman abusua ekpunli ne maanzinli nu la. Siane mɔɔ tɔ zo bulu: Meehalae, ɔvi Nɛtɔfa. (Ɔbɔ Zila abusua ne bie.) Siane mɔɔ tɔ zo bulu nee ko: Bɛnaya, ɔvi Paeleetɔn mɔɔ wɔ Yifelaem abusua ekpunli ne maanzinli nu la. Siane mɔɔ tɔ zo bulu nee nwiɔ: Hɛledae, ɔvi Nɛtɔfa. (Ɔle Ɔteneɛle abo zo sonla.)

Yizilayɛ mbusua ekpunli ekpunli ne mɔ anwo amaamuo

^16-22 Menli mɔɔ ɛnee bu Yizilayɛ mbusua ekpunli ekpunli ne mɔ anwo amaamuo la ɛne: Abusua Ekpunli Amaamuobuvolɛ Wulubɛn Zekelae ara Ɛleyizɛ Semɛyɔn Meeyaka ara Hyɛfataya Livae Kɛmuwɛle ara Hahyabaya Aalɔn Zeedɔko Dwuda Belemgbunli Devidi adiema Ɛlaehu Yesakaa Maekeɛle ara Ɔmelae Zɛbulɛn Obadaya ara Yehyemaya Nafetalae Azelayɛle ara Gyɛlɛmo Yifelaem Azazaya ara Hohyia Manasɛ Adɔleɛ Pɛdaya ara Dwowɛle Manasɛ Aduduleɛ Zɛkalaya ara Yedo Bɛngyaman Abenɛɛ ara Gyeeyaseɛle Dan Gyɛloham ara Azalii

Abusua Ekpunli Amaamuobuvolɛ

²³ Belemgbunli Devidi andia menli mɔɔ ɛtɛdile ɛvolɛ abulanwiɔ la, ɔboalekɛ Ɛdɛnkɛma ɛbɔ ɛwɔkɛ kɛ ɔmaa Yizilayɛma azo kɛ anwomanyunlu nwɔlɔra.

²⁴ Dwowabe mɔɔ ɔ nli a le Zɛluaya la bɔle ɔ bo kɛ ɔtia menli ne, noko yeandwu ɛleka bie. Nyamenle deanle Yizilayɛma wɔ menli ɛdianlɛ ɛhye anwo, yemɔti menli dodo mɔɔ bɛnyianle ye la bɛangɛlɛ ye wɔ Belemgbunli Devidi mbuluku ne mɔ anu.

Belemgbunli ninyɛne ne anwo amaamuobuvolɛma

^25-31 Bɛdabɛ mɔɔ bɛbule belemgbunli ninyɛne nwo amaamuo la ɛne: Belemgbunli ninyɛnezielɛ ekpumgbunli ne mɔ: Adeɛle ara Azemeevɛte Sua ne aze ninyɛnezielɛ ekpumgbunli ne mɔ: Ɛzaya ara Dwɔnatan Egyinli nu gyimayɛlɛ: Kilɛbe ara Ɛzelae Vanye egyinli ne mɔ: Hyemɛyae, ɔvi Releema Ɛleka mɔɔ bɛsie nwanye la: Zabedae, ɔvi Hyifam Ɔlivi nee sekamɔ mbaka (mɔɔ wɔ adɔleɛ awoka ngyikyi ne mɔ azo la): Beeyale Heenan, ɔvi Gidɛ Ɔlivi nwole ɛzielɛ: Dwowahye Nlankɛ mɔɔ wɔ Hyɛlɔn fienemgbole nu la: Hyɛtae, ɔvi Hyɛlɔn Nlankɛ mɔɔ wɔ mbɔnza ne mɔ anu la: Adeleeyae ara Hyeefate Afunlumu: Obele, ɔle Yehyemeeyɛlenli Asoaso: Gyɛdaya: Ɔvi Mɛlɔno Mboane nee mbɔnkye: Gyeezeze, ɔle Heeganli

Menli mɔɔ tu Devidi folɛ la

³² Dwɔnatan, Belemgbunli Devidi awuvuanyi ne le sonla mɔɔ tu folɛ kpalɛ a, yɛɛ ɔle abɔlɔba. Yemɔ nee Gyɛhayɛle a hilele belemgbunli amra mrenya ne mɔ nwoma a.

³³ Ahetofɛle tu belemgbunli ne folɛ, yɛɛ Aakaenli Huhyae le belemgbunli ne agɔnwo na eza ɔtu ye folɛ.

³⁴ Ahetofɛle wule la, Abayata nee Bɛnaya ara Gyɛhɔyada yɛle belemgbunli ne folɛdulɛma. Dwowabe a le belemgbunli ne ɛlɔnema ne safohyenlema kpanyinli a.