1 Edk 26 - BAEBOLO ANZƐƐ BULUKU NWUANZANWUANZA

Ɛzonlenlɛ Sua ne sinzavolɛma

¹ Livaema mɔɔ bɛyele bɛ kɛ bɛyɛ Ɛzonlenlɛ Sua ne sinzavolɛma la dodo ɛne. Wɔ Kɔla abusua nu, bɛyele Mɛhyɛlɛmaya. Kɔli mɔɔ vi Esafe sua nu la ara ɔ.

² Ɔwole mrenya nsuu: Zɛkalaya a le kpanyinli a, yɛɛ Gyɛdeyeeyɛle a doa ye a, akee Zɛbadaya, Gyateneɛle,

³ Yilam, Gyihoheenan, yɛɛ Ɛleɛhoyinae.

⁴ Nyamenle lole Obɛde Yidɔm mrenya mɔtwɛ: Hyɛmaya a le kpanyinli a. Mɔɔ doɔdoa zolɛ la a le Gyɛhozabade, Dwowaa, Seekaa, Nɛtanɛle,

⁵ Ameɛle, Yesakaa, yɛɛ Piyɛlitae.

^6-7 Hyɛmaya mɔɔ le Obɛde Yidɔm ara kpanyinli ne wole mrenya nsia: Ɔtenae, Relɛfeeyɛle, Obɛde, Ɛlezeebade, Ɛlaehu, yɛɛ Sɛmakaya. Bɛ nwo hyia wɔ bɛ abusua ne anu, ɔluakɛ ɛnee bɛbɔ mɔdenle kpalɛ. Amozi ɛdeɛ nwiɔ ne bɔbɔ mɔdenlebɔ ne bo zolɛ.

⁸ Obɛde Yidɔm sua nu amra, mrenya katakyie abulasia nee nwiɔ mɔɔ ze gyima kpole kpalɛ la wɔ ɛkɛ mɔɔ yɛle gyima ɛhye bie a.

⁹ Mrenya bulu nee mɔtwɛ a vi Mɛhyɛlɛmaya sua nu mɔɔ anwo yɛ se mɔɔ yɛle gyima ne bie a.

¹⁰ Hosa mɔɔ vi Mɛlɛlae abusua nu la wole mrenya nna: Hyemelae (tɛ yemɔ a ɔle awolɛ kpanyinli a, noko ɔ ze vale ye lile ye menli ne ati),

¹¹ Helekaya, Tɛbalaya, yɛɛ Zɛkalaya. Ɛka bɛ muala ɛbɔ nu a ɛnee menli bulu nee nsa a vi Hosa sua nu mɔɔ yɛle Ɛzonlenlɛ Sua ne ɛzinzalɛ gyima ne bie a.

¹² Bɛhyɛle Ɛzonlenlɛ Sua sinzavolɛma ne anu ekpunli ekpunli, kɛmɔ bɛ mbusua ekpulike ne mɔ de la, na bɛhyɛle Ɛzonlenlɛ Sua ne gyima ne bɛmanle bɛ, kɛmɔ bɛhyɛle bɛmanle Livaema la.

¹³ Abusua ekpulike ko biala anu amra, bɛguale bɛ ti nzeleba, bɛannea kɛ bɛzonle anzɛɛ bɛanzo, na bɛhilele menli mɔɔ ɔwɔ kɛ sinza anlenkɛ kpole ko biala la.

¹⁴ Nzeleba ɛgualɛ ne anu, Hyɛlimaya a aduduleɛ anlenkɛ kpole ne bɔle ye a, yɛɛ ɔ ra Zɛkalaya a vale sɔlɔ anlenkɛ ne a. Zɛkalaya le sonla mɔɔ tu folɛ kpalɛ a.

¹⁵ Obɛde Yidɔm a asa hanle nyiakɛ anlenkɛ kpole ne a, yɛɛ ɔ mra ne mɔ sinza ekpumgbunli ne mɔ mɔɔ bɛfa aleɛ nee ninyɛne bɛsie nu la.

¹⁶ Hyɛpem nee Hosa a sinza adɔleɛ anlenkɛ kpole ne nee Hyalɛkɛte anlenkɛ kpole ne mɔɔ wɔ sɔlɔ adenle zo la a. Bɛhyehyɛle ɛzinzalɛ gyima ne mɔɔ saa ko kpɔne a ɛnee ko ɛrali ɔ gyakɛ anu.

¹⁷ Sinzavolɛma nsia a sinza aduduleɛ anlenkɛ kpole ne alehyenlɛ biala a, nna wɔ sɔlɔ, yɛɛ nna wɔ nyiakɛ. Ekpumgbunli ne mɔ mɔɔ bɛfa ninyɛne bɛsiezie nu la, menli nna a alehyenlɛ biala sinza a, ekpumgbunli ko biala ɛdeɛ nwiɔ.

¹⁸ Mɔɔ kɔne adɔleɛ kpɔda ne mɔ anwo la, sinzavolɛma nna a wɔ adenle nu a, yɛɛ kpɔda ne mɔ mumua ne ɛdeɛ nwiɔ.

¹⁹ Ɛzinzalɛ gyima ne mɔɔ bɛvale bɛmanle Kɔla nee Mɛlɛlae mbusua ne mɔ la ɛne.

Ɛzonlenlɛ Sua ne gyima mɔɔ hale la

²⁰ Livaema bie mɔ noko lile gyima ngakyile wɔ Ɛzonlenlɛ Sua ne anu. Ahaegya a nea Ɛzonlenlɛ Sua ne gya ne nee ninyɛne mɔɔ bɛdu bɛzie ɛkɛ bɛmaa Nyamenle la azo a.

²¹ Leedan le Gɛhyɔn amra mrenya ne mɔ ko, ɔ bo zo amra bɔle ɛdane dɔɔnwo, ɔ ra Gyihayɛle abusua ne boka nwolɛ.

²² Leedan amra mrenya nwiɔ ne mɔɔ hale la a nea Ɛzonlenlɛ Sua ne gya nee ekpumgbunli mɔɔ bɛfa ahyɛlɛ ninyɛne bɛsiezie nu la azo a. Bɛmɛ a le Zitam nee Dwowɛle.

²³ Bɛmanle Amelam, Yehaa, Hibulɔn, yɛɛ Ɛzeɛle abo zo amra noko gyima.

²⁴ Hyɛbuwɛle mɔɔ vi Mosisi ara Gɛhyɔn abusua nu la a le kpanyinli mɔɔ Ɛzonlenlɛ Sua ne gya wɔ ɔ sa nu a.

²⁵ Saa ɛfa ye wɔ Gɛhyɔn adiema Ɛleyizɛ afoa nu a ɛnee Gɛhyɔn anwo sonla a le Hyɛlomete. Ɛleyizɛ a wole Rilihabaya mɔɔ wole Gyɛhyaya la. Gyɛhyaya wole Dwolam, yɛɛ Dwolam a wole Zekelae mɔɔ wole Hyɛlomete la.

²⁶ Hyɛlomete nee ye awuke nu amra a nea ninyɛne mɔɔ Belemgbunli Devidi, mbusua mgbanyinli, safohyenlema mɔɔ nea ɛlɔnema apenle nee ɛya nwo zo, yɛɛ Safohyenlema Mgbanyinli ɛdu ɛzie ɛkɛ ɛmaa Nyamenle la a.

²⁷ Bɛdule ninyɛne mɔɔ bɛdule bɛ ahu wɔ ɛlɔne nu la bie bɛziele ahane kɛ bɛva bɛyɛ Ɛzonlenlɛ Sua ne anu gyima.

²⁸ Hyɛlomete nee ye awuke nu amra a debie biala mɔɔ bɛdu bɛzie ahane kɛ bɛva bɛyɛ gyima wɔ Ɛzonlenlɛ Sua ne anu la wɔ bɛ sa nu a. Ahyɛlɛ ninyɛne mɔɔ Nyamenle Kpɔmanvolɛ, Samoɛle, Belemgbunli Sɔɔlo, Nɛɛ ara Abenɛɛ, yɛɛ Zɛluaya ara Dwowabe vale manle Nyamenle la boka nwolɛ.

Livaema mɔɔ ɛha la gyima

²⁹ Wɔ Yezehaa abo zo amra ne anu, Kɛnanaya nee ɔ mra yɛɛ bɛvale maanlebulɛ ne bɛwulale bɛ sa nu a. Bɛme a bɛle kɛlɛhɛlɛvolɛma nee ndɛnebuavolɛma mɔɔ siezie Yizilayɛma avinli a.

³⁰ Wɔ Hibulɔn abo zo amra ne anu, bɛvale Hahyabaya nee ɔ nwo amra apenle ko ɛya nsuu mɔɔ lɛ duma la kɛ bɛnlea nyamenlezonlenlɛ nee edwɛkɛ ngyikyi ngyikyi mɔɔ wɔ Yizilayɛ maanle ne mɔɔ wɔ Azule Dwɔdan adɔleɛ la anu na bɛtoto bɛ boɛ a.

³¹ Gyɛlaya a le kpanyinli mɔɔ nea Hibulɔn abo zo amra ne anwo zo a. Mɔɔ Devidi lile ɛvolɛ abulanla wɔ belemgbunli ebia ne azo la, ɔmanle bɛnleɛnleanle Hibulɔn abo zo amra ne mbusua ekpulike ekpulike ne mɔ anu, na bɛnwunle kɛ bɛ nuhua bie mɔ mɔɔ ze konle nye zo kpalɛ la de Gyizɛ wɔ Geleade maanzinli nu.

³² Belemgbunli Devidi yele bɛ nuhua apenle nwiɔ ɛya nsuu mɔɔ lɛ tile la vile Gyɛlaya anwo amra ne anu kɛ bɛnlea nyamenlezonlenlɛ nee edwɛkɛ ngyikyi ngyikyi mɔɔ wɔ Yizilayɛ maanle ne mɔɔ wɔ Azule Dwɔdan aduduleɛ lɔ la na bɛtoto bɛ boɛ. Maanle ne mɔ a le Wulubɛn, Gaade, yɛɛ Manasɛ Aduduleɛ.