1 Edk 25 - BAEBOLO ANZƐƐ BULUKU NWUANZANWUANZA

Ɛzonlenlɛ Sua nu edwɛndolɛma

¹ Belemgbunli Devidi nee Livae mbusua mgbanyinli eza nleanle yele Livae mbusua ɛhye mɔ kɛ bɛdo edwɛne wɔ ɛzonlenlɛ biala anu. Bɛmɛ a le Esafe, Himan, yɛɛ Gyɛdutɛn. Bɛ gyima a le kɛ, ɔwɔ kɛ bɛfa Nyamenle nrɛlaleɛ ne bɛto gua, na bɛto edwɛne bɛbɔ agole. Menli mɔɔ bɛyele bɛ kɛ bɛli ɛzonlenlɛ ne ati nee gyima holɛ ko mɔɔ bɛbayɛ la ɛne.

² Esafe amra mrenya nna ne: Zakɛ, Dwosefi, Nɛtanaya, yɛɛ Ahyalila; bɛ kpanyinli a le Esafe. Yemɔ yɛɛ saa belemgbunli maa adenle a ɛnee ɔka Nyamenle edwɛkɛ ne a.

³ Gyɛdutɛn amra mrenya nsia ne: Gɛdalaya, Zilae, Gyɛhyaya, Hyemɛyae, Hahyabaya, yɛɛ Matetaya. Bɛ ze a li bɛ ti a. Bɛ gyima a le kɛ bɛka Nyamenle edwɛkɛ ne, bɛbɔ agole na bɛto edwɛne bɛye Ɛdɛnkɛma ayɛlɛ bɛyɛ ye mo.

⁴ Himan amra mrenya bulu nee nna ne: Bɛkaya, Matanaya, Ɛzeɛle, Hyɛbuwɛle, Gyɛlemo, Hananaya, Haneenae, Yilayata, Gedaletae, Wolomametae Yizɛ, Dwɔhyebɛkahya, Malotae, Hotɛ, yɛɛ Maheezeyo.

⁵ Nyamenle a manle ɔwole mralɛ mrenya ɛhye mɔ nee mralɛ mraalɛ nsa ne a, amaa Himan anyia anwosesebɛ dɔɔnwo, kɛmɔ Nyamenle vale bɔle ye ɛwɔkɛ la. Himan le Nyamenle Kpɔmanvolɛ na ɔka Nyamenle nrɛlaleɛ ɔkile belemgbunli ne.

⁶ Himan amra ne mɔ amuala bɔ getaa nee sɔnwosɔnwo boa ɛzonlenlɛ ne wɔ Ɛzonlenlɛ Sua ne anu, yɛɛ bɛ ze a li bɛ ti a. Belemgbunli ne a nea Esafe, Gyɛdutɛn, yɛɛ Himan anwo zo a.

⁷ Menli abulanwiɔ nee nna ɛhye mɔ le menli mɔɔ ze bɛ gyima ne anye zo kpalɛ a, yɛɛ bɛ gɔnwo mɔ Livaema ne noko le menli mɔɔ ze edwɛndolɛ nee agole ɛbɔlɛ nye zo kpalɛ. Bɛ muala bɛlua mrenya ɛya nwiɔ abulatwɛ nee mɔtwɛ.

⁸ Bɛguale bɛ muala bɛ ti nzeleba na bɛahyɛ gyima ne. Ɔnva nwolɛ kɛ bie le fofolɛ wɔ nu anzɛɛ bie ze gyima ne anye zo, yɛɛ ɔnva nwolɛ kɛ bie le kpanyinli anzɛɛ kakula.

^9-31 Menli ɛya nwiɔ abulatwɛ nee mɔtwɛ ɛhye, bɛhyehyɛ nuhua mbusua ekpulike ekpulike nu, ekpunli abulanwiɔ nee nna. Ekpunli ko biala le menli bulu nee nwiɔ, yɛɛ ekpunli ko biala lɛ ye sonla mɔɔ li ɔ ti a. Bɛ gyima ɛyɛlɛ ne ngyehyɛlɛ ne kɛ kɔ ye la ɛne: 1. Dwosefi mɔɔ vi Esafe abusua nu 2. Gɛdalaya 3. Zakɛ 4. Zilae 5. Nɛtanaya 6. Bɛkaya 7. Ahyalila 8. Gyɛhyaya 9. Matanaya 10. Hyemɛyae 11. Ɛzeɛle 12. Hahyabaya 13. Hyɛbuwɛle 14. Matetaya 15. Gyɛlemo 16. Hananaya 17. Dwɔhyebɛkahya 18. Haneenae 19. Malotae 20. Yilayata 21. Hotɛ 22. Gedaletae 23. Maheezeyo 24. Wolomametae Yizɛ