1 Edk 19 - BAEBOLO ANZƐƐ BULUKU NWUANZANWUANZA

Devidi di Amɔnoma nee Seleama anwo zo konim

¹ Mekɛ ne hɔle bie la Amɔn Belemgbunli Neehahye hɔle ayile nu, na ɔ ra Heenɛn lile ebia ne.

² Belemgbunli Devidi zele kɛ, “Ɔwɔ kɛ me nee Heenɛn yɛ agɔnwolɛ kpalɛ, kɛmɔ ɔ ze Neehahye nee me yɛle la.” Yemɔti Devidi zoanle menli kɛ bɛhɔyɛ ye gyakɔ. Bɛdwule Amɔn na bɛhɔbizale Belemgbunli Heenɛn ahye la,

³ Amɔn mgbanyima ne mɔ zele bɛ belemgbunli ne kɛ, “Ɛdwenle kɛ asɛɛ ɛ ze anwo ɛhulolɛ nee ye nidi ti yɛɛ Devidi ɛzoa menli ɛhye mɔ kɛ bɛrayɛ wɔ gyakɔ a? Ɔnle zɔhane fee! Yezoa bɛ ɛke kɛ bɛranleɛnlea yɛ azɛlɛ ye amaa yearaho yeava.”

⁴ Heenɛn hyele menli mɔɔ Devidi zoanle bɛ la, ɔmanle bɛkpale bɛ kɛsa, bɛpepɛle bɛ adɛladeɛ ne mɔ azo bɛmanle ɔlile bɛ nze zo, na akee ɔgyakyile bɛ ɔmanle bɛhɔle.

⁵ Nyiane mɔɔ hanle bɛ la ammaa bɛangola sua nu dwu. Mɔɔ Devidi dele mɔɔ ɛzi la, ɔzoanle ɔmanle bɛhɔzele bɛ kɛ bɛdɛnla Gyɛleko kɔkpula mekɛ mɔɔ bɛ kɛsa ne mɔ kɛwie fi la na bɛara.

⁶ Belemgbunli Heenɛn nee Amɔnoma nwunle kɛ bɛyɛ Devidi kpɔvolɛ ala ɛne, yemɔti bɛvale dwɛtɛ fufule tone nu kilo apenle ngoko abulasa nee nna, bɛhɔbɔle menli mɔɔ ka konle ehwili la nee konle ehwili ɛkpa wɔ Mɛsɔpɔtemia Sɔlɔ nee Selea maanzinli ne mɔ mɔɔ bɛfɛlɛ bɛ Meeyaka nee Zoba la.

⁷ Meeyaka belemgbunli ne nee ye ɛlɔnema ne vale menli apenle ngoko abulasa nee nwiɔ ne mɔɔ bɛbɔle bɛ nee bɛ konle ehwili ne mɔ ɛkpa la hɔyɛle azokoɛleɛ wɔ Midɛba.

⁸ Mɔɔ Devidi dele mɔɔ ɛlɛkɔ zolɛ la anwo bie la, ɔmanle Dwowabe nee ye ɛlɔnema ne amuala hɔle.

⁹ Amɔnoma vindele ragyinlanle bɛ suakpole Relaba anuhɔlɛ kpole ne anloa, yɛɛ arelemgbunli mɔɔ ɛra baboa Amɔnoma la gyinlanle kandiba ne fienemgbole ne anu.

¹⁰ Dwowabe nwunle kɛ bɛ kpɔvolɛ ɛlɔnema ne babu bɛ nyunlu nee bɛ nzi. Yemɔti ɔvale Yizilayɛ ɛlɔnema mɔɔ ze konle nye zo kpalɛ la kɛ bɛzɔ Seleama konle ɛdeɛ ne anloa.

¹¹ Akee ɔvale ɛlɔnema mɔɔ ɛha la ɔmanle ɔ diema Abehyae kɛ ɔli bɛ ti. Abehyae manle bɛgyinlanle kɛ bɛ nee Amɔnoma ko.

¹² Dwowabe zele kɛ, “Saa bɛnwu kɛ Seleama asa ɛlɛkomo me nwo zo a, bɛraboa me; saa medame menwu kɛ Amɔnoma asa ɛlɛkomo bɛ nwo zo a, mebaraboa bɛ.

¹³ Bɛzi bɛ ahonle na bɛgyinla kpundii. Bɛmaa yɛho kpalɛ yɛmaa yɛ menli ne nee yɛ Nyamenle ne azuamgbole ne mɔ. Ɛdɛnkɛma ɛhulolɛ ɛyɛ ɛkɛ.”

¹⁴ Dwowabe nee ye menli ne mɔ hɔtetale Seleama na Seleama ne nriandile.

¹⁵ Mɔɔ Amɔnoma nwunle kɛ Seleama ɛgua ndwɛlɛ aze la, bɛnriandile Abehyae na bɛziale bɛhɔle bɛ suakpole ne azo. Na Dwowabe nee ye ɛlɔnema ziale hɔle Gyɛlusalɛm.

¹⁶ Seleama nwunle kɛ Yizilayɛma ɛbo bɛ, yemɔti bɛhɔle bɛ maanzinli ne mɔ anu bɛhɔvale ɛlɔnema bɛrale. Ɛlɔnema ɛhye mɔ vi Azule Yufileti ne aduduleɛ afoa nu, yɛɛ bɛ kpanyinli a le safohyenle Hyobake. Hyobake a le safohyenlema kpanyinli mɔɔ nea Zoba Belemgbunli Hadadizɛ ɛlɔnema ne anwo zo a.

¹⁷ Devidi dele ɛhye la, ɔboɔboale Yizilayɛ ɛlɔnema ne amuala anloa, ɔ nee bɛ pɛle Azule Dwɔdan ne, na bɛ nee Seleama bɛ nye bɔle zo. Bɛvale konle ne bɛbɔle ye zo,

¹⁸ na Yizilayɛ ɛlɔnema hanle Selea ɛlɔnema ne guale ɛbɔ nu. Devidi nee ye ɛlɔnema ne hunle Seleama mɔɔ ka konle ehwili la apenle nsuu, yɛɛ ɛlɔnema mɔɔ dua aze la apenle ngoko abulanla. Eza bɛhunle Seleama safohyenlema kpanyinli Hyobake.

¹⁹ Mɔɔ arelemgbunli mɔɔ wɔ Belemgbunli Hadadizɛ abo la nwunle kɛ Yizilayɛma ɛbo bɛ la, bɛ nee Devidi yɛle anzonudwolɛ ngyehyɛlɛ na bɛyɛle Devidi ngɛkɛlɛ. Seleama anli bɛ edwɛkɛ ambɔ Amɔnoma ɛboalɛ zo bieko ɛlɛ.