Biblia Todo Logo
အွန်လိုင်း သမ္မာကျမ်းစာ

- ကြော်ငြာတွေ -

1 Edk 16 - BAEBOLO ANZƐƐ BULUKU NWUANZANWUANZA

1 Bɛvale Ngyekyeleɛ Ɛlɛka ne bɛhɔziele ndanlɛ sua ne mɔɔ Devidi ɛzi ɛmaa ye la anu. Na bɛbɔle ɛyelalɛ azu nee anzonudwolɛ azu bɛmanle Nyamenle.

2 Devidi wiele azu ne bɔ la, ɔyilale menli ne kɔsɔɔti wɔ Ɛdɛnkɛma duma nu,

3 na ɔhyɛle aleɛ ɔmanle bɛ muala, ɔmanle Yizilayɛ raalɛ ko nee nrenya ko biala kpanwo kunguma ko, nane ndondo ekyi, yɛɛ vanye ma welera.

4 Devidi yele Livaema bie mɔ kɛ bɛgyinla Ngyekyeleɛ Ɛlɛka ne anyunlu na bɛli menli ne ati bɛmaa bɛdo moyɛlɛ nee ayɛlɛyelɛ edwɛne bɛmaa Ɛdɛnkɛma, Yizilayɛ Nyamenle ne, wɔ mekɛ biala mɔɔ bɛkɛra ye ɛzonlenlɛ la.

5 Esafe a lile Livaema ekpunli zɔhane ati a, yɛɛ Zɛkalaya a le ye boavolɛ a. Akee ɔwɔ kɛ Gyiyayɛle, Hyɛmaelamo, Gyɛhayɛle, Matetaya, Yilayabe, Bɛnaya, Obɛde Yidɔm, yɛɛ Gyiyayɛle a bɔ getaa nee ahenle ne mɔ a. Esafe a ɔwɔ kɛ bɔ sɔnwosɔnwo ne a,

6 yɛɛ ɔwɔ kɛ sɛlɛvolɛma nwiɔ, Bɛnaya nee Gyaheezeɛle bɔ aweɛne ndendenle wɔ Nyamenle Ngyekyeleɛ Ɛlɛka ne anyunlu dahuu.

7 Kenle ko zɔhane a Devidi lumuale vale edwɛndolɛ gyima ne manle Esafe nee ɔ gɔnwo mɔ Livaema kɛ bɛdo moyɛlɛ nee ayɛlɛyelɛ edwɛne bɛmaa Ɛdɛnkɛma a.


Ayɛlɛyelɛ Edwɛne
( Edw 105.1-15 ; 96.1-13 ; 106.1 , 47-48 )

8 Bɛyɛ Ɛdɛnkɛma mo, bɛbɔ ye duma, bɛha ye nyɛleɛ bɛhile maanle maanle.

9 Bɛdo edwɛne bɛmaa ye, bɛdo ayɛlɛyelɛ edwɛne bɛmaa ye, bɛha ye nwanwane gyima mɔɔ yeyɛ la!

10 Bɛli fɛlɛko wɔ ye duma nwuanzanwuanza ne ati; bɛmaa bɛdabɛ mɔɔ bɛkpondɛ Ɛdɛnkɛma la anye ɛlie.

11 Bɛkpondɛ Ɛdɛnkɛma nee ye anwosesebɛ ne, bɛkpondɛ ɔ nyunlu dahuu.

12 Bɛhakye ye nwanwane gyima mɔɔ yeyɛ, sɛkɛlɛneɛ mgbole mɔɔ yehile, nee ye ndɛnebualɛ,

13 O bɛmɛ ye akɛlɛ Ebileham abo zo amra, nee Gyekɔbo abo zo amra mɔɔ yekpa nu yeye bɛ!

14 Yemɔ a ɔle Ɛdɛnkɛma yɛ Nyamenle ne a; yemɔ a ɔbua ewiade amuala ndɛne a.

15 Ɔkakye ye ngyekyeleɛ ne dahuu, ɔkakye ye edwɛkɛ mɔɔ ɔhanle awolɛndoazo apenle nzi,

16 ɔkakye ngyekyeleɛ ne mɔɔ ɔ nee Ebileham yɛle, nee ye ɛwɔkɛ mɔɔ ɔbɔle Ayezeke.

17 Ɔzile ye pi kɛ mɛla ɔmanle Gyekɔbo, kɛ ɔle ngyekyeleɛ mɔɔ bɛntulu ye ɔmaa Yizilayɛma,

18 na ɔzele kɛ, “Mebava Keena azɛlɛ ne meamaa wɔ, kɛ ɔle wɔ agyadeɛ bɔkɔɔ.”

19 Mekɛ mɔɔ ɛnee bɛ nwo anzo, na awie ɛmbu bɛ, bɛle adendulɛma,

20 bɛkpɔsɛkpɔsa maanle maanle zo, bɛvi belemgbunli maanle ko anu bɛkɔ ko anu la,

21 Yeammaa awie adenle ansisi bɛ; bɛ ti, ɔdeanle arelemgbunli,

22 ɔzele kɛ, “Awie biala mmafa ɔ sa ka me menli ne, bɛmmafa bɛ sa bɛka me kpɔmanvolɛma ne!”

23 Ewiade amra, bɛdo edwɛne bɛmaa Ɛdɛnkɛma! Bɛbɔ ye ngoanelielɛ edwɛkpa ne nolo dahuu.

24 Bɛbɔ ye anyunlunyia ne nolo bɛhile maanle maanle, bɛbɔ ye nwanwane gyima ne mɔ nolo bɛhile menli kɔsɔɔti!

25 Ɔluakɛ Ɛdɛnkɛma le kpole, na ɔwɔ kɛ bɛye ye ayɛlɛ kpalɛ; ɔwɔ kɛ bɛsulo ye bɛtɛla nyamenle gyɛne gyɛne ne mɔ.

26 Maanle maanle kɔsɔɔti nyamenle ne mɔ le mmonle, noko Ɛdɛnkɛma a bɔle anwumaneamra a.

27 Kpoleyɛlɛ nee anyunlunyia ɛbɔ ɛyia ye, tumi nee anyelielɛ ɛyi ye Ɛzonlenlɛ Sua ne.

28 Ewiade amra amuala, bɛwula Ɛdɛnkɛma anyunlunyia, bɛwula ye anyunlunyia na bɛyeyɛ ye tumi ne!

29 Bɛmaa anyunlunyia mɔɔ fɛta Ɛdɛnkɛma la ɛha ye; bɛva azubɔdeɛ bɛrɛla ɔ nyunlu. Bɛzie bɛ nwo nwuanzanwuanza bɛyeyɛ Ɛdɛnkɛma, na bɛbɔ bɛ ti aze bɛmaa ye.

30 Aleɛabo amra, bɛdu bɛgua ɔ nyunlu; ɛnee azɛlɛ ye gyi kpundii, ɔle tuandu.

31 Anwuma nee aze, bɛli fɛlɛko, bɛha bɛhile maanle maanle kɔsɔɔti kɛ, “Ɛdɛnkɛma le belemgbunli!”

32 Nyevile nee nuhua ninyɛne muala, bɛheha bɛ nwo; kpɔkɛ nee nuhua ninyɛne kɔsɔɔti, bɛli fɛlɛko.

33 Akee kpɔkɛ nu mbaka bava anyelielɛ ado edwɛne wɔ Ɛdɛnkɛma anyunlu, ɔluakɛ Ɛdɛnkɛma ɛlɛba arabua ewiade amra ndɛne.

34 Bɛyɛ Ɛdɛnkɛma mo, ɔboalekɛ Ɛdɛnkɛma le kpalɛ, ye ɛhulolɛ kpundii ne wɔ ɛkɛ ne dahuu. Gyɛ 33.11

35 Bɛmaa yɛha kɛ, “O Nyamenle, yɛ Ngoanedievolɛ, die yɛ; boɔboa yɛ nloa na die yɛ fi maanle maanlema asa anu, amaa yɛayɛ wɔ mo yɛaye wɔ duma nwuanzanwuanza ne ayɛlɛ dahuu.”

36 Bɛye Ɛdɛnkɛma, Yizilayɛ Nyamenle ne ayɛlɛ, bɛye ye ayɛlɛ, ɛnɛ nee dahuu. Na menli ne amuala liele zolɛ “Amen,” na bɛyele Ɛdɛnkɛma ayɛlɛ.


Nyamenle Ɛzonlenlɛ wɔ Gyɛlusalɛm nee Gebɛyɔn

37 Belemgbunli Devidi akee yele Esafe nee ɔ gɔnwo mɔ Livaema ne ziele ɛkɛ ne kɛ bɛmɛ a ɛzonlenlɛ biala mɔɔ bɛyɛ ye wɔ Ndanlɛ Sua ne mɔɔ Ngyekyeleɛ Ɛlɛka ne gyi nu la anu la wɔ bɛ sa nu a. Ɔwɔ kɛ bɛyɛ bɛ gyima ne alehyenlɛ biala.

38 Gyɛdutɛn ara Obɛde Yidɔm nee ye abusua ne anu amra abulasia nee mɔtwɛ a ɔwɔ kɛ boa bɛ a. Akee Hosa nee Obɛde Yidɔm a nlenkɛ ne mɔ ɛzinzalɛ wɔ bɛ sa nu a.

39 Sɛlɛvolɛ Zeedɔko nee ɔ gɔnwo mɔ sɛlɛvolɛma yɛɛ Ɛdɛnkɛma ɛzonlenlɛ wɔ Gebɛyɔn wɔ bɛ sa nu a.

40 Nwonlomɔ nee nɔsolɛ biala ɔwɔ kɛ bɛbɔ ɛyelalɛ azu wɔ ɛyelalɛ azubɔdeɛ ɛkponle ne azo bɛmaa Ɛdɛnkɛma, kɛmɔ bɛhɛlɛ ye wɔ Mɛla ne mɔɔ Ɛdɛnkɛma vale manle Yizilayɛma la anu la.

41 Bɛdabɛ mɔɔ bɛboa la a le Himan nee Gyɛdutɛn, yɛɛ bɛdabɛ mɔɔ bɛboɔboale bɛyele bɛ, bɛbobɔle bɛ aluma kɛ bɛyɛ Ɛdɛnkɛma mo la, ɔluakɛ ye ɛhulolɛ kpundii ne wɔ ɛkɛ dahuu.

42 Himan nee Gyɛdutɛn a aweɛne ndendenle ne nee sɔnwosɔnwo ne mɔ nee ninyɛne mɔɔ ɛha mɔɔ bɛbɔ wɔ mekɛ mɔɔ bɛlɛto ayɛlɛyelɛ edwɛne la wɔ bɛ sa nu a. Gyɛdutɛn abusua nu amra yɛɛ nlankɛ ɛzinzalɛ gyima ne wɔ bɛ sa nu a.

43 Akee awie biala hɔle sua nu, na Devidi ɔdaye ɔvale ye nyilalɛ ne ɔhɔle ye sua nu.

Bible in Nzema © Bible Society of Ghana, 1998.

Bible Society of Ghana
ကြှနျုပျတို့နောကျလိုကျပါ:



ကြော်ငြာတွေ