1 Edk 14 - BAEBOLO ANZƐƐ BULUKU NWUANZANWUANZA

Gyima mɔɔ Devidi lile wɔ Gyɛlusalɛm la

¹ Taya Belemgbunli Helam zoanle menli wɔ Devidi ɛkɛ ne. Menli mɔɔ rale la bie mɔ le menli mɔɔ fa awolɛ sisi azua a, yɛɛ bie mɔ le kapentama; bɛvale sida mbaka bɛrale kɛ bɛbazi sua bɛamaa Devidi.

² Na Devidi nwunle kɛ Ɛdɛnkɛma ɛzie ye belemgbunli bɔkɔɔ wɔ Yizilayɛma anwo zo, na ye belemgbunlililɛ ɛyɛ kpole wɔ ye menli Yizilayɛma ɛkpazilɛ ti.

³ Wɔ Gyɛlusalɛm ɛkɛ ne, Devidi gyale mraalɛ dɔɔnwo na ɔwole mralɛ mrenya nee mralɛ mraalɛ dɔɔnwo.

⁴ Ngakula ɛhye mɔ, bɛwole bɛ wɔ Gyɛlusalɛm: Hyamua, Hyobabe, Neetan, yɛɛ Sɔlɔmɔn;

⁵ Yebehaa, Yilaehyua, yɛɛ Ɛlepɛlɛte;

⁶ Noga, Nɛfɛge, yɛɛ Gyafaya;

⁷ Yilaehyama, Bilayada, yɛɛ Yilefɛlɛte.

Filisitiama anwo zo konimlilɛ

⁸ Mɔɔ Filisitiama dele kɛ bɛzie Devidi Yizilayɛ maanle ne kpokpoti belemgbunli la, bɛzoanle ɛlɔnema kɛ bɛhɔhye ye bɛrɛla. Yemɔti Devidi ɔdaye ɔvale ye ɛlɔnema na ɔ nee bɛ yiale.

⁹ Filisitiama rale Relɛfeeyem Bɔnza ne anu na bɛbɔle ɔ bo kɛ bɛsɛkye Yizilayɛma aleɛ mɔɔ wɔ ɛkɛ ne la.

¹⁰ Devidi bizale Nyamenle kɛ, “Mendoa Filisitiama me nee bɛ ɛhɔho ɔ?” Ɛdɛnkɛma buale kɛ, “Ɛ nee bɛ ɛhɔbɔ ye zo na mebamaa wɔali bɛ nwo zo konim.”

¹¹ Yemɔti Devidi hɔtetale bɛ wɔ Beeyale Pɛleezem, na ɔlile bɛ nwo zo konim. Ɔzele kɛ, “Nyamenle ɛlua me nwo zo ɛbu ɛva me kpɔvolɛ ɛlɔnema anwo zo kɛ azule mɔɔ ɛyi ɛbulu aze la.” Yemɔti bɛdonle ɛkɛ ne Beeyale Pɛleezem.

¹² Filisitiama ne nriandi ahɔ la, bɛgyakyile bɛ mmonle ne mɔ aze na Devidi manle bɛyelale bɛ muala.

¹³ Mekɛ ne angɔ bie, eza Filisitiama ziale rale Relɛfeeyem Bɔnza ne anu bieko na bɛbɔle ɔ bo kɛ bɛwua Yizilayɛma aleɛ mɔɔ bɛlua la.

¹⁴ Eza Devidi bizale Nyamenle bieko saa ɔdoa bɛ ɔ nee bɛ ɛhɔho a, na Nyamenle buale kɛ, “Ɛ nee bɛ bɛmmafa bɛ kɛnra bɛbɔ zolɛ; bu bɛ nzi fa mbaka ne mɔ anu na kendɛ ɛkɛ ne.

¹⁵ Na saa ɛte ɛlɔnema ne agyakɛ abo kilikili ne wɔ mbaka ne mɔ ati zo a, finde ɛ nee bɛ ɛhɔho, ɔluakɛ ɛnee Nyamenle ɛlumua ɛ nyunlu yehɔzɛkye Filisitia ɛlɔnema ne dɛbadɛba.”

¹⁶ Devidi yɛle mɔɔ Nyamenle zele ye la, yemɔti ɔhunle Filisitia ɛlɔnema ɔvi Gebɛyɔn toonwo ɔhɔdwule Gizɛ.

¹⁷ Devidi duma hɔle ɛleka biala na Ɛdɛnkɛma manle maanle kɔsɔɔti zulole ye.