1 Arl 9 - BAEBOLO ANZƐƐ BULUKU NWUANZANWUANZA

Nyamenle ye ɔ nwo ahile Sɔlɔmɔn bieko

¹ Belemgbunli Sɔlɔmɔn wiele Ɛdɛnkɛma sua ne si, ɔwiele ɔdaye ye awuke ne bu nee debie biala mɔɔ ɔkulo kɛ ɔyɛ la yɛ bɔkɔɔ la,

² Ɛdɛnkɛma yele ɔ nwo hilele ye bieko, kɛmɔ alumua ne ɔyele ɔ nwo ɔhilele ye wɔ Gebɛyɔn la.

³ Ɛdɛnkɛma zele ye kɛ, “Mede wɔ nzɛlɛlɛ nee wɔ modolɛ mɔ ɛyɛle wɔ ɛke la, yemɔti medu Ɛzonlenlɛ Sua ɛhye mɔɔ wɔzi kɛ bɛzonle me wɔ nuhua la memaa me nwo kɛ ɛkɛ ne a bɛzonle me dahuu a. Mebanlea zolɛ na meabɔ nwolɛ bane.

⁴ Na wɔmɔ, saa ɛyeye wɔ ahonle nu ɛ nee me dua nɔhalɛ nu, kɛmɔ ɛ ze Devidi yɛle la, na ɛdi me edwɛkɛ zo, ɛyɛ debie biala mɔɔ meha mehile wɔ la a,

⁵ mebamaa wɔali belemgbunli dahuu, kɛmɔ menvale membɔle ɛ ze Devidi ɛwɔkɛ la. ‘Bɛ bo zo amra ɛnrɛkpa ebia ne azo ɛlɛ.’

⁶ Na saa ɛkpo me ɛmaa ɛ mra noko kpo me, na bɛanli me mɛla mɔɔ meli memaa bɛ la azo, na bɛgyakyi me bɛkɔkoto nyamenle gyɛne a,

⁷ mebadu me menli Yizilayɛma meavi azɛlɛ ne mɔɔ meragua bɛ zo la azo. Eza mebaye me nye wɔ sua ne mɔɔ meyila zolɛ kɛ bɛzonle me wɔ nuhua la azo. Na menli kɔsɔɔti banwu kɛ Yizilayɛma ɛyɛ mgbane na bɛazele bɛ.

⁸ Sua ɛhye babubu agua, na ɔbazi awie biala mɔɔ baraze ɛke la anwo na yeaha kɛ, ‘Duzu ati a Ɛdɛnkɛma ɛmaa Ɛzonlenlɛ Sua ye nee azɛlɛ ye ɛyɛ zɛhae ɛ?’

⁹ Na menli babua kɛ, ‘Ɔboalekɛ bɛkpole Ɛdɛnkɛma bɛ Nyamenle ne mɔɔ nee bɛ ze mɔ vi Yigyibiti rale la na bɛzonlenle nyamenle gyɛne, bɛbɔle bɛ ti aze bɛmanle bɛ. Ɛhye ati yɛɛ Ɛdɛnkɛma ɛmaa munzule ɛhye ɛdo bɛ a.’ ”

Sɔlɔmɔn nee Helam ngyehyɛlɛ ne

¹⁰ Sɔlɔmɔn vale ɛvolɛ abulanwiɔ a zile Ɛzonlenlɛ Sua ne na ɔbule belemgbunli awuke ne a.

¹¹ Belemgbunli Helam mɔɔ vi Taya la a manle ye sida nee sepelɛse mbaka nee ezukoa nvutuke mɔɔ ɔvale ɔyɛle gyima ɛhye a. Bɛwiele sua ne anwo gyima yɛ la, Sɔlɔmɔn vale azuamgbole mɔɔ wɔ Galeli maanzinli nu la anu abulanwiɔ manle Helam.

¹² Helam vi Taya hɔnleɛnleanle azua ne mɔ mɔɔ Sɔlɔmɔn vale manle ye la azo la, yeangulo biala.

¹³ Yemɔti ɔbizale Sɔlɔmɔn kɛ, “Adiema, na duzu azuamgbole a le ɛhye mɔ mɔɔ wɔva wɔmaa me la?” Ɔlua edwɛkɛ ɛhye ati ɛnɛ nee ɛnɛ ala bɛfɛlɛ maanle zɔhane “Kebulu”

¹⁴ Helam vale ezukoa nvutuke mɔɔ ɛsuzu a ɔbo tone nu kilo apenle nna la a hɔmanle Belemgbunli Sɔlɔmɔn a.

Ninyɛne mɔɔ eza Sɔlɔmɔn yɛle la

¹⁵ Belemgbunli Sɔlɔmɔn vale maanle gyimayɛlɛ a zile Ɛdɛnkɛma Ɛzonlenlɛ Sua ne, ɔbule belemgbunli awuke ne, ɔduale suakpole ne aduduleɛ kuma ne na ɔliele suakpole ne anwo bane a. Eza ɔvale maanle gyimayɛlɛ a ɔkyekyele azuamgbole Heezɔ, Mɛgedo nee Gizɛ a.

¹⁶ (Ɛnee Yigyibiti belemgbunli ne ɛhɔho ɛva Gizɛ, yehu ezuavolɛ ne na yeyela sua ne. Ɔvale sua ne ɔmanle ɔ ra raalɛ ne mɔɔ Sɔlɔmɔn gyale ye la kɛ ye atɔfolɛ ahyɛlɛdeɛ ɔ.

¹⁷ Na Sɔlɔmɔn kyekyele sua ne fofolɛ). Eza Sɔlɔmɔn luale maanle gyimayɛlɛ zo kyekyele suakpole Aleze Bɛte Hɔlɔn,

¹⁸ Beeyala nee Tamaa mɔɔ wɔ Dwuda fienemgbole ne anu la,

¹⁹ yɛɛ azua mɔɔ Sɔlɔmɔn zieziele ye ninyɛne zolɛ la. Bie mɔ mɔɔ eza ɔkyekyele la a le azua mɔɔ ɔziele ye konle ehwili ne mɔ wɔ zolɛ nee azua mɔɔ ye mgbɔnwɔ ɛlɔnema wɔ zolɛ la, yɛɛ debie biala mɔɔ ɔhulole kɛ bɛkɛyɛ wɔ Gyɛlusalɛm, Lɛbanɔn nee ye belemgbunli maanle ne anu ɛleka biala la.

^20-21 Sɔlɔmɔn manle Amɔlema, Hɛtema, Pɛlɛzema, Haevaema nee Gyibɛsema, mɔɔ hale Keena mɔɔ Yizilayɛma honle vale bɛ azɛlɛ ne na bɛangu bɛ la abo zo amra ne yɛle gyima ɛsesebɛ kɛ bɛle ahanra. Kɛkala bɔbɔ, bɛtɛde ahanra wɔ Yizilayɛma anu.

²² Sɔlɔmɔn ammaa Yizilayɛnli biala anzonle kɛ kanranli; ɔmanle bɛzonlenle kɛ ye ɛlɔnema, ye mbɔlɔba mgbanyinli, safohyenle mgbanyinli, safohyenlema, yɛɛ ye ɛlɔne nu mgbanyinli mɔɔ nea menli mɔɔ fa konle ehwili nee mgbɔnwɔ ko la.

²³ Mbɔlɔba mgbanyinli ɛya nnu abulanlu a nleanle Sɔlɔmɔn azua ɛsisilɛ gyima ne azo a.

²⁴ Akee Yigyibiti belemgbunli ne ara raalɛ ne mɔɔ Sɔlɔmɔn gyale ye la vile Devidi suakpole ne azo dule hɔdɛnlanle sua ne mɔɔ ɔ hu Sɔlɔmɔn zile manle ye la anu. Sɔlɔmɔn akee manle bɛzoale anwea bɛduale kuma ne mɔɔ la suakpole ne aduduleɛ la.

²⁵ Ɛvolɛ biala Sɔlɔmɔn ku nane yela bɛ bɔ azu na ɔbɔ anzonudwolɛ azu fane nsa ɔmaa Ɛdɛnkɛma wɔ ye azukponle ne mɔɔ yezi la azo. Eza ɔyelale ɛyɛlɛ noko ɔmanle Ɛdɛnkɛma. Ɛnee kɛ Sɔlɔmɔn zile yɛle sua ne anwo gyima dwulale la ɛne.

²⁶ Belemgbunli Sɔlɔmɔn bobɔle meli dɔɔnwo wɔ Yizeɔngibɛ mɔɔ zua Yilate la, wɔ Akaba Ebolo ne anu wɔ Yidɔm maanzinli nu.

²⁷ Belemgbunli Helam yele ye menli mɔɔ ze nyevile nu gyimayɛlɛ nye zo la manle bɛrabokale Sɔlɔmɔn menli ne mɔɔ gua meli ne mɔ anu la anwo.

²⁸ Bɛ nee bɛ hɔle Ofɛ maanle nu na bɛnyianle ezukoa nvutuke mɔɔ bo kilo apenle ngoko ɛya nna la bɛrɛlɛle Belemgbunli Sɔlɔmɔn.