1 Arl 7 - BAEBOLO ANZƐƐ BULUKU NWUANZANWUANZA

Sɔlɔmɔn belemgbunli awuke ne

¹ Sɔlɔmɔn vale ɛvolɛ bulu nee nsa bule ɔdaye ɔ ti anwo awuke.

² Bɛfɛlɛ sua ne “Lɛbanɔn Kpɔkɛmile.” Ye asalo ne tendenle le mita abulanla nee nna, ye tɛtɛlɛ le mita abulanwiɔ nee nwiɔ, yɛɛ ye anwumahɔlɛ le mita bulu nee nsa nee foa ko. Bɛvale sida mbaka bɛsisile mpila ɛhonlone nsa bɛsosɔle sua ne. Ɛhonlone ko biala le mpila bulu nee nnu.

³ Bɛvale sida mbaka ne bie ala bɛguale zolɛ. Sua ne aakɔ ne mɔ le sida mbaka. Aakɔ ne mɔ gua sua ne azo a bɛ ndendenle bagua azua ngyikyi ne mɔ mɔɔ bɛfa ninyɛne bɛsiezie nu la azo.

⁴ Nvɛnzɛlɛ nsa nsa mɔɔ bɛ nye bobɔ zolɛ la gugua sua ne tɛbanu nwiɔ ne.

⁵ Nlenkɛ ne mɔ tɛbanu nwiɔ ne ndendenle sɛ, bɛ anwuma nee bɛ aze tɛtɛlɛ sɛ, yɛɛ kɛ nvɛnzɛlɛ ne mɔ noko de la ɛne. Eza nvɛnzɛlɛ nye bɔ nvɛnzɛlɛ zo.

⁶ Sua ne abenlana ne tendenle le mita abulanwiɔ nee nwiɔ yɛɛ ye tɛtɛlɛ le mita bulu nee nsa nee foa ko. Ɔlɛ ɔ nyunlu mɔɔ bɛdu zolɛ yɛɛ sida mbaka a bɛvale bɛsosɔle ye a.

⁷ Akee Sɔlɔmɔn zile Ebia Sua mɔɔ eza bɛfɛlɛ ye Ndɛnebualɛ Sua la. Ɛkɛ ne a Sɔlɔmɔn tɛnla di edwɛkɛ a. Ɛbɔ ye azɛlɛ nwo toonwo mɔɔ kpula ye anwuma la kpokpoti, bɛvale sida mbaka a bɛzɛle nu a.

⁸ Sɔlɔmɔn sua ne mɔɔ ɔdaye mumua ne ɔbala nuhua na ɔgyi Ndɛnebualɛ Sua ne anzi la, bɛzile ye kɛ ɛhendeɛ ne mɔ ala la. Eza ɔzile sua ɛhye ala bie ɔmanle Yigyibiti belemgbunli ne ara raalɛ ne mɔɔ yegya ye la.

⁹ Bɛvale awolɛ mɔɔ sonle bolɛ na bɛboɔboale bɛzele la a bɛsisile azua ɛhye mɔ amuala a. Bɛdɔle abotane bɛvale mbulalɛ bɛzieziele awolɛ ne mɔ bɔkɔbɔkɔ na bɛava bɛasisi azua ne mɔ, ɔvi ye adiabo ne toonwo sua ne pɛle. Bɛvale awolɛ ne mɔɔ bɛzieziele nwolɛ bɔkɔbɔkɔ la bɛtetale ɔ kunlu nee ɔ nzi kpokpoti.

¹⁰ Awolɛ mgbole kpalɛ hɔle azua ne mɔ adiabo ne mɔ anu. Awolɛ mgbole zɛhae, bie mɔ ndendenle le mita nsa nee foa ko yɛɛ mita nna.

¹¹ Bɛvale awolɛ zɔhane mɔ bie yɛɛ sida mbaka a bɛdole zolɛ a.

¹² Suakunlu ɛkɛ ne nee Ɛdɛnkɛma Ɛzonlenlɛ Sua ne findezo ekpumgbunli ne bane ne mɔ anwo, bɛyɛle bɛ mɔɔ saa awolɛ ngɛnlɛma ne mɔ pɛ ɛhonlone nsa a, sida ndaboa ne mɔ noko pɛ ɛhonlone ko. Zɔhane ala noko yɛɛ Ɛdɛnkɛma Ɛzonlenlɛ Sua ne atɛ ne anu de a.

Hulam gyima ɛdeɛ ne

¹³ Belemgbunli Sɔlɔmɔn zoanle manle bɛhɔvale Hulam wɔ Taya bɛrale. Hulam le dwinvolɛ mɔɔ kola fa kɔbele yɛ gyima a.

¹⁴ Raalɛ kunlanvolɛ bie mɔɔ vi Nafetalae abusua ekpunli nu la a wole ye a, yɛɛ ɔ ze vi Taya. Hulam ɔ ze le dwinvolɛ. Ɔvale kɔbele a ɔyɛle gyima a. Hulam le sonla mɔɔ ze nrɛlɛbɛ, ɔlɛ adwenle, ɔ nye ka aze, yɛɛ ɔlɛ ndelebɛbo wɔ ye gyimayɛlɛ nwo. Na yemɔ yɛɛ Sɔlɔmɔn hɔvale ye manle ɔrayɛle ye kɔbele gyima ne amuala a.

Kɔbele mpila nwiɔ ne

¹⁵ Hulam guale kɔbele mpila nwiɔ. Ko biala tendenle le mita mɔtwɛ yɛɛ ye bolomolo le kɛyɛ mita nnu nee foa ko; ɔvale ɔziele Ɛzonlenlɛ Sua ne anyunlu. Ko biala akunlu le tokule yɛɛ ye sinlinyunlu ɛzamo le kɛ ɛsalɛ mrɛlɛsɛka nna mɔɔ bɛbɔ bɛ nwolɛ la.

¹⁶ Eza ɔvale kɔbele ɔyɛle adile nwiɔ ɔzieziele mpila ne mɔ azo. Tile ko biala anwo zo anwumahɔlɛ le mita nwiɔ nee ekyi.

¹⁷ Akee ɔvale kɔbele ne bie ɔnwonle debie bie mɔɔ le kɛ atɛnla la ɔguguale adile ne mɔ azo.

¹⁸ Ɔyɛle ninyɛne kpokpɔkoo bie noko kɛ akutue mralɛ la ɔguguale bɛ ɛhonlone nwiɔ nwiɔ wɔ mpila adile ne mɔ azo.

¹⁹ Akee ɔguale kɔbele adile ne mɔ ɔmanle bɛzɔhonle aloa nya, yɛɛ ko tendenle le asɛɛ mita nwiɔ.

²⁰ Ɔvale adile nwiɔ ne ɔduoduale mpila nwiɔ ne azo; ɛnee nwɔnzɔnwɔnzɔ adwinli ne wɔ bɛ aze yɛɛ ninyɛne kpokpɔkoo ne mɔɔ le kɛ akutue mralɛ la ɛya nwiɔ gugua ye ɛhonlone nwiɔ nwiɔ wɔ tile ko biala anwo.

²¹ Hulam vale mpila nwiɔ ne ziele Ɛzonlenlɛ Sua ne anyunlu atɛ ne anu na bɛtotonle bɛ aluma; pila ne mɔɔ di kɔ nyevile nu la, bɛfɛlɛ ye “Gyeeken” yɛɛ mɔɔ di kɔ ɛbɔ nu la, bɛfɛlɛ ye “Bowaze”.

²² Mpila adile nwiɔ ne mɔɔ zɔho aloa nya la duodua mpila ne mɔ azo. Ɛnee kɛ bɛzile bɛzile mpila ne mɔ la ɛne.

Kɔbele angola ne

²³ Hulam eza vale kɔbele guale debie bie mɔɔ le kɛ angola mɔɔ nyevile mɔɔ anye ɛholo la wɔ nu la. Ɔyɛle ye kutukpunli. Nuhua kuloonwu le mita nwiɔ nee ekyi, ye sinlinyunlu le mita nna nee foa ko, yɛɛ ye bolomolo le mita bulu nee nsa nee ekyi.

²⁴ Ɔguale kɔbele awa ɔhendɛhendanle angola ne anloa ɔyiale.

²⁵ Bɛvale angola ne bɛziele kɔbele nlankɛ mralɛ bulu nee nwiɔ mɔɔ biala anye wɔ alie nwo na bɛgyigyi ye nsa nsa la azo. Nlankɛ ne mɔ, nsa anye kɔ ɛbɔ nu, nsa anye kɔ nyevile nu, nsa anye kɔ aduduleɛ yɛɛ nsa anye kɔ adɔleɛ.

²⁶ Angola ne anloa bele kɛ dwora mɔɔ bɛno nu la. Ye ɛzamo le kɛ ɛsalɛ ɛrɛlɛsɛka ne mɔɔ lumua la tendenle, yɛɛ ɔbelebele kɛ aloa ndotolo. Angola ne di nzule litili apenle ngoko abulanla.

Kɔbele ehwili ne mɔ

²⁷ Hulam eza yɛle kɔbele ehwili bulu mɔɔ biala tendenle le asɛɛ mita nwiɔ a; ye anwumahɔlɛ le mita ko nee ekyi, yɛɛ ye tɛtɛlɛ nee ye tendenle sɛ.

²⁸ Kɛ bɛyɛle ehwili ne mɔ la ɛne: ye tɛbanu ne mɔ, bɛguale biala tɛtɛlɛ ko yɛɛ bɛvale bɛbobɔle nwolɛ a.

²⁹ Bɛlile awenade, nlankɛ nee anwuma soanvolɛma adwinli bɛguale tɛbanu ko biala. Bɛlile ndotolo adwinli noko bɛguale awenade ne mɔ nee nlankɛ ne mɔ abo aze nee bɛ ti zo anwuma.

³⁰ Eza ehwili biala lɛ kɔbele egyakɛ nna yɛɛ kɔbele kpukputilii nwiɔ sosɔ egyakɛ ne mɔ. Kɔbele nledɛnu mɔɔ ndotolo gua ye foa ko nee ye foa ko la wɔ ye mgbɛnezo nna ne mɔ azo. Bɛfa ahyɛnze anzɛɛ dwora bɛsiezie nledɛnu ne mɔ anu.

³¹ Saa ahyɛnze gyigyi nledɛnu ne mɔ anu a bɛ ti kpogya anwuma waa nwiɔ tɛla ehwili ne. Ye aze ɛhɔlɛ ɛndwu waa ko. Bɛlile ndotolo adwinli bɛguale nledɛnu ne mɔ anwo. Nledɛnu ne mɔ ɛnle kutukpunli; ko biala lɛ muleɛ nna.

³² Egyakɛ nna ne, ko biala gyi aze a ye anwumahɔlɛ le mita foa ko nee ekyi. Ninyɛne mɔɔ dedɛ egyakɛ ne mɔ la le kɔbele kpukputilii yɛɛ ko biala sɔ egyakɛ nwiɔ. Ehwili ne debie biala le kɔbele.

³³ Bɛyɛle ehwili ne agyakɛ ne mɔ kɛ konle ehwili gyakɛ la; biala anzi o, ɔ nloa kɛba o, ye debie biala, bɛvale kɔbele a bɛguale a.

³⁴ Ehwili ko biala ayia nna ne mɔ azo lɛ kɔbele egyakɛ nwiɔ.

³⁵ Kɛba bɛla ehwili ne avinli anwuma. Ye tɛtɛlɛ kɛyɛ waa ko. Bɛvale ɔ gyakɛ ne mɔ bɛbokale ye tabule tabule ne mɔ bɛguale.

³⁶ Ye tabule tabule ne nee nledɛnu ne mɔ anwo, bɛlile adwinli mɔɔ le kɛ abɔdeɛ mɔɔ lɛ ndɛbalɛ, awenade nee mrɛlɛ bɛguale nwolɛ na ndotolo ɛbɔ bɛ ɛyia.

³⁷ Kɛ ɔzile ɔyɛle kɔbele ehwili ngyikyi bulu ne la ɛne: bɛguale bɛ muala ko, bɛsɛ mgbole, bɛ ndendenle sɛ yɛɛ bɛ nwo zo anwumahɔlɛ sɛ.

³⁸ Hulam akee yɛle kɔbele ahyɛnze bulu. Ehwili ko biala ɛdeɛ ko yɛɛ ko biala di nzule litili ɛya mɔtwɛ. Kyɛnze ko biala tɛtɛlɛ le asɛɛ mita nwiɔ.

³⁹ Ɔvale kɔbele ehwili ne mɔ anu nnu ɔzieziele Ɛzonlenlɛ Sua ne foa ko mɔɔ kɔne ɛnweazo la, yɛɛ ɔvale nnu ɔzieziele mɔɔ kɔne ɛbɔ nu afoa nu la. Akee ɔvale kɔbele angola ne ɔziele Ɛzonlenlɛ Sua ne aduduleɛ-nyiakɛ.

Ɛzonlenlɛ Sua ne anu ɛziezielɛ ninyɛne

^40-45 Hulam eza yɛle mbuakɛ, sofi nee dwora mɔ. Ɔwiele gyima biala mɔɔ ɔwɔ kɛ ɔdi wɔ Ɛzonlenlɛ Sua ne anwo ɔmaa Belemgbunli Sɔlɔmɔn la di. Ninyɛne mɔɔ ɔyɛle la ɛne: Mpila nwiɔ ne Mpila adile nwiɔ ne mɔɔ duodua mpila ne mɔ azo la Atɛnla anzɛɛ nwɔnzɔnwɔnzɔ nwiɔ ne mɔɔ ɔnwonle ɔguale mpila ne mɔ azo la Ninyɛne kpokpɔkoo ne mɔɔ zɔho akutue ɛya nna ne mɔɔ ɔguale bɛ ɛhonlone nwiɔ ɔguale atɛnla ne mɔ anwo wɔ mpila ne mɔ azo la Ehwili mralɛ bulu ne Ahyɛnze bulu ne Angola ne Nlankɛ bulu nee nwiɔ ne mɔɔ angola ne gyi bɛ nwo zo la Deɛ ne mɔɔ ɔguale mɔɔ zɔho aloa nya yɛɛ Mbuakɛ ne nee sofi ne mɔ nee kula ne mɔ Ninyɛne ɛhye mɔ amuala, Hulam vale kɔbele a yɛle zieziele Ɛzonlenlɛ Sua ne anu manle Belemgbunli Sɔlɔmɔn a, na ɔhwile nwolɛ kɛnlɛma.

⁴⁶ Belemgbunli manle bɛyɛle ɛhye mɔ kɔsɔɔti wɔ adwinli gyima ne mɔɔ wɔ Sɛko nee Zalɛtan avinli la anu wɔ Dwɔdan Bɔnza ne anu.

⁴⁷ Sɔlɔmɔn ammaa bɛandila ninyɛne ɛhye mɔ anloa, ɔboalekɛ ninyɛne ne mɔ zonle, yemɔti awie annwu bɛ ɛnlomboɛ.

⁴⁸ Sɔlɔmɔn eza manle bɛyɛle ezukoa nvutuke ninyɛne bɛvale bɛzieziele Ɛzonlenlɛ Sua ne anu. Bɛmɛ a le: azukponle ne, ɛkponle ne mɔɔ bɛfa kpanwo ne mɔɔ bɛva bɛbɔ azu bɛmaa Nyamenle la bɛgua zo la,

⁴⁹ Kɛnlaneɛ mbaka bulu ne mɔɔ gyigyi Nwuanzanwuanza Nu Nwuanzaanwu Ɛleka ne anyunlu ɛkɛ, mɔɔ nnu wɔ ɛbɔ nu na nnu wɔ nyevile nu la, ndotolo, kɛnlaneɛ nee

⁵⁰ ahɔpo, dabekɛ, dwora mɔ, kula mɔɔ bɛgua ɛyɛlɛ nu, nee ahyɛnze mɔɔ bɛfa samɛnlakɛ bɛgua nu, yɛɛ akee Nwuanzanwuanza Nu Nwuanzaanwu Ɛleka ne anlenkɛ nee Ɛzonlenlɛ Sua mumua ne nlenkɛ ne mɔ ndɛla. Ɛhye mɔ amuala, bɛvale ezukoa nvutuke a bɛyɛle a.

⁵¹ Mɔɔ Belemgbunli Sɔlɔmɔn wiele Ɛzonlenlɛ Sua ne anwo debie biala yɛ la, ɔvale ninyɛne mɔɔ ɔ ze Devidi ɛva ɛgua ɛkɛ ɛmaa Ɛdɛnkɛma la amuala ɔhɔziele ekpumgbunli ne mɔ mɔɔ wɔ Ɛzonlenlɛ Sua ne anu la bie mɔ anu. Ɛhye mɔ le dwɛtɛ fufule, ezukoa nvutuke, nee ninyɛne dɔɔnwo bie.