1 Arl 4 - BAEBOLO ANZƐƐ BULUKU NWUANZANWUANZA

Sɔlɔmɔn mbɔlɔba mgbanyinli ne mɔ

¹ Belemgbunli Sɔlɔmɔn ziele Yizilayɛ maanle ne amuala.

² Ye mbɔlɔba mgbanyinli nee ye mgbanyima ne mɔ ɛne: Sɛlɛvolɛ ne a le Azalaya; bɛfɛlɛ ɔ ze Zeedɔko.

³ Kɛlɛhɛlɛvolɛma a le Yilaehɔlɛfe nee Ahaegya; bɛ ze a le Hyaehya. Ahaelɛde ara Gyɛhɔhyafate a le abɔlɔba mɔɔ kɛlɛhɛlɛ mɔɔ sisi maanle ne anu la wɔ mbuluku nu a.

⁴ Gyɛhɔyada ara Bɛnaya le ɛlɔnema ne kpanyinli; Zeedɔko nee Abayata le sɛlɛvolɛma.

⁵ Azalaya nea maanzinli ne mɔ anu amɛnladoma ne mɔ anwo zo. Bɛfɛlɛ ɔ ze Neetan. Zeebɛde le sɛlɛvolɛ yɛɛ yemɔ a ɔtu belemgbunli folɛ a. Ɔ ze a le Neetan.

⁶ Ahaehya a nea suakunlu ɛkɛ ne sonvolɛma mɔɔ siezie ɛkɛ ne la anwo zo a yɛɛ Abeda ara nrenya Adonaelam a nea menli mɔɔ bɛhye bɛ nuokɛ kɛ bɛyɛ gyima la anwo zo a.

⁷ Sɔlɔmɔn dule mgbanyima bulu nee nwiɔ kɛ bɛle maanzinli zo neavolɛma. Bɛnea bɛmaa maanzinli ko biala anu amra fa aleɛ kɔmaa belemgbunli nee ye sua nu amra toonwo siane ko na yeado maanzinli fofolɛ nu amra.

⁸ Mgbanyima bulu nee nwiɔ ne a le: Bɛnhɔɔ: ɔnea Yifelaem awoka ne mɔ azo maanzinli ne azo.

⁹ Bɛndikɛɛ: ɔnea azuamgbole Meekaze, Hyeeyalebem, Bɛte Hyimɛhye, Yilɔn yɛɛ Bɛte Heenan.

¹⁰ Bɛnehisɛde: ɔnea azuamgbole Aluboto nee Soko yɛɛ Hifɛ maanle ne mɔ amuala.

¹¹ Bɛnabinadabe mɔɔ gya Sɔlɔmɔn ara raalɛ ne mɔɔ bɛfɛlɛ ye Teefate la: ɔnea Dɔɔ maanzinli zo.

¹² Beeyana mɔɔ ɔ ze a le Ahaelɛde la nea Teeyanake, Mɛgedo nee azua mɔɔ zuozua Bɛtehyan mɔɔ zua Zalɛtan mɔɔ wɔ Gyɛzɛlii nyiakɛ la toonwo mɔɔ kɔdwu Ebɛle Mɛhola, yɛɛ suakpole Dwɔkemɛyam

¹³ Bɛngibɛ: ɔnea suakpole Releemɔto mɔɔ wɔ Geleade la nee Geleade namunamu mɔɔ wɔ Manasɛ anlɔnra Gyeyɛɛ abusua ne azɛlɛ zo la. Eza ɔnea Aagɔbo maanzinli ne mɔɔ wɔ Beehyan la. Bɛle azuamgbole abulasia mɔɔ bɛlie nwolɛ bane na bɛfa mbulalɛ bɛgua bɛ nlenkɛ mgbole ne mɔ anzi bɛtoto nu a.

¹⁴ Yedo ara Ahenadabe nea Meehaneeyem.

¹⁵ Ahaemaaze mɔɔ gya Sɔlɔmɔn amra mraalɛ ne mɔ ko mɔɔ bɛfɛlɛ ye Basemate la a nea Nafetalae maanzinli ne a;

¹⁶ Huhyae ara Beeyana nea Ahya maanzinli ne nee Bialotu sua zo.

¹⁷ Palua ara Gyɛhɔhyafate nea Yesakaa maanzinli zo.

¹⁸ Yila ara Hyemɛyae nea Bɛngyaman maanzinli zo.

¹⁹ Gibɛ mɔɔ le Yulae ara ne nea Geleade, Amɔle Belemgbunli Saehɔn nee Beehyan Belemgbunli Ɔɔgo bɛ azɛlɛ ne mɔ azo. Ɛye amɛnladoma bulu nee nwiɔ ɛhye mɔ a, eza bɛlɛ amɛnlado kpanyinli ko mɔɔ nea maanle ne kɔsɔɔti azo a.

Sɔlɔmɔn maamulɛ kɛnlɛma ne

²⁰ Dwudama nee Yizilayɛma akee dale kpole kpalɛ yɛle kɛ ɛnweazo anwea; bɛlile, bɛnlonle na bɛ nye liele.

²¹ Sɔlɔmɔn ziele maanle ne kɔsɔɔti, ɛbɔ ye Azule Yufileti mɔɔ bagua Filisitiama azɛlɛ zo, ɔdwu Yigyibiti ɛweɛne zo amuala la rahotole Sɔlɔmɔn na bɛduale adwule mɔɔ fɛta la bɛmanle ye.

²² Kenle biala ɔwɔ kɛ bɛmaa Sɔlɔmɔn esamo kpalɛ litili apenle nnu, ɛdɔkɛ litili apenle bulu;

²³ nlankɛ mɔɔ ɛlɔ la bulu, nlankɛ mɔɔ kpɔsa kɔ adidi la abulanwiɔ, mboane ɛya ko; akee nwolɛ weɛlɛ nee ahɛtɛboɛ, dabɔ nee ngɔkɔlɛ, bɛmɛ bɛnga.

²⁴ Ɛnee Sɔlɔmɔn sie Azule Yufileti adɔleɛ maanzinli ne mɔ amuala, ɛbɔ ye Tefesa mɔɔ kɔ Gaza, arelemgbunli mɔɔ wɔ Yufileti Adɔleɛ la amuala wɔ ɔ bo, yɛɛ ɔ nee maanle maanle mɔɔ nee ye bɔ ɛweɛne la anloa sɛ bɛ nwo.

²⁵ Mekɛ mɔɔ ɔde aze la, Dwuda nee Yizilayɛ maanlema anzo nu dwole bɛ, ɔvi Dan maanzinli nu mɔɔ kɔ Biyɛhyiba la, awie biala anwo dɔle ye; ɔlɛ ye vanye nee feege ɛya mɔɔ ɔdidi nuhua a.

²⁶ Sɔlɔmɔn lɛ mgbɔnwɔ mɔɔ twe konle ehwili la apenle ngoko abulanla yɛɛ ɔlɛ mgbɔnwɔ mɔɔ ɔtɛnla zolɛ la apenle ngoko bulu nee nwiɔ.

²⁷ Ye amɛnladoma bulu nee nwiɔ ne mɔɔ nea maanzinli ne mɔ azo la, saa ko biala siane ɛdeɛ ne dwu a ɔbɛlɛ Sɔlɔmɔn nee ye sua nu amra aleɛ biala mɔɔ ɔwɔ kɛ bɛdi wɔ belemgbunli sua nu ɛkɛ ne la. Ɛhye ati bɛangyia ɛhwee nwo wɔ belemgbunli awuke nu ɛkɛ ne.

²⁸ Eza amɛnlado ko biala fa atoko nee ndile mɔɔ bɛfa bɛyɛne mgbɔnwɔ nee nane mɔɔ kola nriandi la ba ɛleka biala mɔɔ bɛkɛze kɛ bɛkpondɛ zɔhane ninyɛne ne mɔ la.

²⁹ Nyamenle manle Sɔlɔmɔn nrɛlɛbɛ nee ndelebɛbo mɔɔ anu pi tɛla awie biala ɛdeɛ ne la yɛɛ adwenle kpole kpalɛ mɔɔ awie ɛngola ɛnnwu ɔ nzi la.

³⁰ Ɔnwunle nrɛlɛbɛ ɔdɛlale nrɛlɛbɛvolɛma mɔɔ wɔ sɛnzɛne aduduleɛ nee Yigyibiti la amuala.

³¹ Ɔdɛlale menli kɔsɔɔti nrɛlɛbɛ; ɔnwunle nrɛlɛbɛ ɔdɛlale Ɛzela anlɔnra Yitan, Himan, Kalekɔlo nee Daada mɔɔ le Meeholo amra ne mɔ. Sɔlɔmɔn nganeɛ dwule maanle maanle mɔɔ zuozua ye la kɔsɔɔti anu.

³² Ɔbule mrɛlɛ apenle nsa yɛɛ ɔyɛle edwɛne apenle ko edwɛne nnu.

³³ Ɔhanle mbaka nwo edwɛkɛ, ɔvi Lɛbanɔn sida baka nwo zo ɔkɔkpula nyinlanyinla mɔɔ fifi bane nwo la anwo edwɛkɛ. Ɔhanle nane, nloma, nee nane mɔɔ twenle bɛ nwo aze la nee fɛlɛ nwo edwɛkɛ.

³⁴ Na menli nee arelemgbunli mɔɔ wɔ maanle gyɛne gyɛne nu mɔɔ dele ye nganeɛ la radiele ye nrɛlɛbɛ edwɛkɛ ne bie.