1 Arl 3 - BAEBOLO ANZƐƐ BULUKU NWUANZANWUANZA

Sɔlɔmɔn sɛlɛ abiza nrɛlɛbɛ

¹ Sɔlɔmɔn gyale Yigyibiti belemgbunli ne ara raalɛ na ɔlua zolɛ ɔ nee Yigyibiti belemgbunli yɛle ko. Ɔvale ɔ ye ɔrale Devidi suakpole zo ɔhɔkpulale mekɛ mɔɔ ɔwiele ye belemgbunli awuke ne bu, ɔzile Ɛdɛnkɛma Ɛzonlenlɛ Sua ne na bɛliele bane bɛbɔle Gyɛlusalɛm suakpole ne anwo bɛyiale la.

² Kɛmɔ ɛnee bɛtɛsile Ɛzonlenlɛ Sua bɛtɛmanle Ɛdɛnkɛma la ati, menli bɔle azu wɔ azukponle biala azo.

³ Sɔlɔmɔn lile ɔ ze Devidi mɛla zo, ɔhulole Ɛdɛnkɛma na ɔdoale ɔ bo zo, noko ɔbɔle azu wɔ azukponle ngakyile zo.

⁴ Kenle ko Belemgbunli Sɔlɔmɔn hɔle Gebɛyɔn kɛ ɔkabɔ azu, ɔluakɛ ɛkɛ ne a azukponle mɔɔ di munli la wɔ a, yɛɛ eza yeyela nane kɛyɛ nyɛ wɔ ɛkɛ ne yebɔ azu mekɛ dɔɔnwo.

⁵ Kenle ko ne nɔe ne Ɛdɛnkɛma yele ɔ nwo hilele ye wɔ ɛlalɛ nu na ɔzele ye kɛ, “Duzu a ɛkpondɛ kɛ meyɛ memaa wɔ a?”

⁶ Sɔlɔmɔn buale kɛ, “Kɛmɔ wɔ akɛlɛ, egya Devidi lile nɔhalɛ manle wɔ, ɔvale ye ahonle kɔsɔɔti ɔdiele ɛ ne, na ɔbɔle ɛbɛla mɔɔ sɔ ɛ nye la, ɛhulole ye edwɛkɛ bɔkɔɔ. Ɛhye ati wɔhyɛ ye ralɛ nrenya wɔmaa ɛnɛ mede ɔ bo zo ne.

⁷ O Ɛdɛnkɛma, me Nyamenle, mele kakula somaa mɔɔ menze nwolɛ bie, noko wɔva me wɔzie belemgbunli, wɔ egya Devidi abo zo ne.

⁸ Meradɛnla wɔ menli pemgbenleamgbe ye mɔɔ awie ɛnze bɛ nloa mɔɔ ɛdawɔ wɔkpa nu wɔye bɛ la avinli.

⁹ Ɛhye ati mebodo wɔ, maa me nrɛlɛbɛ maa menva menzie wɔ menli ne na maa mengola menwu debie mɔɔ le kpalɛ nee mɔɔ le ɛtane la. Saa tɛ ye zɔhane ɛdeɛ a, menrɛhola wɔ menli ne sie.”

¹⁰ Ɛdɛnkɛma anye liele Sɔlɔmɔn anwo wɔ mɔɔ ɔbizale ye la anwo.

¹¹ Na Nyamenle zele ye kɛ, “Kɛmɔ wɔambiza me wɔanlie ngoane tendenle nee anwonyia wɔammaa ɛ nwo, yɛɛ eza wɔanze kɛ mengu wɔ kpɔvolɛma, na wɔbiza kɛ ɛkpondɛ ndelebɛbo wɔava wɔanwu mɔɔ le kpalɛ nee mɔɔ le ɛtane la,

¹² mebayɛ meamaa wɔ. Nea, memaa wɔ nrɛlɛbɛ kpole nee ndelebɛbo dɔɔnwo meadɛla awie biala mɔɔ bɛwo ye bɛdo azɛlɛ ye azo la anzɛɛ bɔ zo mɔɔ bɛbawo ye la.

¹³ Akee debie mɔɔ wɔambiza bɔbɔ la, mebava meaboka nwo. Ɛbanyia ɛ nwo, wɔanyia ɛ nyunlu wɔadɛla belemgbunli biala.

¹⁴ Eza saa ɛdi me mɛla ne mɔ azo, kɛmɔ ɛ ze Devidi lile la a mebamaa wɔ ngoane tendenle.”

¹⁵ Sɔlɔmɔn dunwuele la ɔnwunle kɛ Nyamenle ɛdendɛ ɛhile ye wɔ ɛlalɛ nu. Nzinlii ɔhɔle Gyɛlusalɛm, ɛleka mɔɔ Ɛdɛnkɛma Ngyekyeleɛ Ɛlɛka ne wɔ la na ɔyelale nane ɔbɔle azu na eza ɔbɔle anzonudwolɛ azu ɔmanle Ɛdɛnkɛma. Eza ɔdole ye menli ne amuala ɛkponle.

Sɔlɔmɔn bua ndɛne ɛsesebɛ bie

¹⁶ Kenle ko tuutuu mraalɛ nwiɔ bie vale bɛ edwɛkɛ radole belemgbunli anyunlu.

¹⁷ Ko hanle kɛ, “Nana, me nee raalɛ ɛhye de awuke ko anu yɛɛ menwole ralɛ mendole ɔ gyakɛ azo.

¹⁸ Ye kenle nsa ne azo yɛɛ ɔdaye noko ɔwole a. Yɛ mu nwiɔ ala a yɛwɔ awuke ne anu a; awie biala ɛmboka yɛ nwo.

¹⁹ Kenle ko nɔɔzo ɔlale ɔ ra nrenya ne anwo zo ɔbɛtɛle ye ɔhunle ye.

²⁰ Ɔdwazole nɔe ne kɛyɛ alevinli-mu-nwiɔ-avinli mɔɔ ɛnee metɛbɔ nafelɛ nu la, ɔradwule me ra nrenya ne wɔ me kunlu ɛkɛ ɔhɔdole ye ɛkpa ɛdeɛ ne azo, na ɔvale mɔɔ ɛwu la ɔradole me ɛdeɛ ne abo zo ne wɔ me ɛkpa ne azo.

²¹ Aleɛbahye ne menyɛle kɛ memaa me ra ne nyɛfonlɛ la menwunle kɛ yewu. Na nwonlomɔ ne ala mɔɔ maanle nu tetele la, meneanle ye kpalɛ na menwunle kɛ tɛ me ra ne ɔ.”

²² Raalɛ ko ne buale kɛ, “Ɔle adalɛ! Medame me ra ɛdeɛ ne a anye wɔ zolɛ la. Wɔ ɛdeɛ ne a ɛwu la.” Alumua raalɛ ne ɔdaye ɔse, “Kyɛkyɛ! Me ra ne a anye wɔ zolɛ la, wɔ ɛdeɛ ne a ɛwu la.” Na edwɛkɛ ne bɔle kpolera wɔ belemgbunli ne anyunlu ɛkɛ ne.

²³ Belemgbunli Sɔlɔmɔn zele kɛ, “Kɛkala, bɛ mu nwiɔ, biala se ralɛ ne mɔɔ anye wɔ zolɛ la le ɔ ra na funli ne le ɔ gɔnwo ara.”

²⁴ Yemɔti ɔzoanle ɔmanle bɛhɔvale dadeɛ bɛrale

²⁵ na ɔhanle kɛ, “Bɛhyɛ kakula ne mɔɔ anye wɔ zolɛ la anu nwiɔ na bɛva foa ko bɛmaa raalɛ ko ne na bɛva ko ne mɔɔ ɛha la bɛmaa raalɛ ko ne ɔdaye.”

²⁶ Raalɛ ne mɔɔ wole ralɛ ne mɔɔ anye wɔ zolɛ la ahonle hwenle na ɔhanle kɛ, “O Nana, fa kakula ne mɔɔ anye wɔ zolɛ la maa raalɛ ko ne na mmaku ye.” Na raalɛ ɛhendeɛ ne dele ye ɔ nloa na ɔhanle kɛ, “Maa bɛhyɛ nu, ɛnee wɔannyia ye yɛɛ medame noko meannyia ye!”

²⁷ Na Sɔlɔmɔn zele kɛ, “Mmaku kakula ne. Fa ye maa raalɛ ne mɔɔ lumuale rale la. Ɔdaye a ɔwole ralɛ ne mɔɔ anye wɔ zolɛ la a.”

²⁸ Yizilayɛma dele ndɛne ne mɔɔ Belemgbunli Sɔlɔmɔn buale la, bɛ muala bɛlile ye eni. Bɛnwunle kɛ Nyamenle ɛmaa ye nrɛlɛbɛ mɔɔ ɔbava yeabu maanle ne a.