1 Arl 21 - BAEBOLO ANZƐƐ BULUKU NWUANZANWUANZA

Neebɔto vanye ɛya ne

¹ Nrenya bie wɔ Gyɛzɛlii ɛkɛ, bɛfɛlɛ ye Neebɔto. Ɔlɛ ye vanye ɛya zua Samɛlea Belemgbunli Ehabe awuke ne.

² Kenle ko Belemgbunli Ehabe zele Neebɔto kɛ, “Wɔ vanye egyinli ne bikye me, yemɔti fa maa me maa menva menyɛ me tola menluolua ɛfane nee nya nya wɔ nu na mebamaa wɔ vanye ɛya kpalɛ fofolɛ. Saa ɛkulo noko a mebadua ye kakɛ meamaa wɔ.”

³ Neebɔto buale Ehabe kɛ, “Menlile me mgbanyinli agya a menvale ɛya ne a; ɔle me mgbanyinli debie, yemɔti saa meminli ɔ bo zo a ɔnrɛyɛ boɛ. Nyamenle ɛkpa ɛhye ɛgua!”

⁴ Kɛmɔ Neebɔto hanle hilele ye kɛ, “Nyamenle ɛkpa ɛgua kɛ menwɔva me mgbanyinli agyadeɛ menwɔmaa wɔ” la, ɛya nee nyane hunle Belemgbunli Ehabe kpole; ɔhɔle sua nu ɔhɔlale ye mgba ne azo, ɔhakyile ɔ nye bane nwo na ɔkpole aleɛ.

⁵ Ɔ ye Gyɛzɛbɛle rabizale ye kɛ, “Duzu ati a ɛ rɛle ɛbɔ na yemɔti wɔkpo aleɛ ɛ?”

⁶ Ehabe buale ɔ ye kɛ, “Meha mehile Neebɔto mɔɔ vi Gyɛzɛlii ɛke la kɛ ɔva ye vanye ɛya ne ɔmaa me na memaa ye fofolɛ anzɛɛ ɔdɔne ye ɔmaa me a ɔbua ɔse me kɛ, ‘Mefa me vanye ɛya ne memaa wɔ a ɔnrɛyɛ boɛ!’ ”

⁷ Ɔ ye zele ye kɛ, “Na tɛ wɔmɔ a ɛsie Yizilayɛ maanle ye ɔ? Wɔmɔ dwazo di debie maa ɛ nye ɛlie na Neebɔto ɛya ne, mame, mebava meamaa wɔ!”

⁸ Akee Gyɛzɛbɛle vale Belemgbunli Ehabe duma hɛlɛle ngɛlata na ɔvale belemgbunli tumi sɛkɛlɛneɛ ne ɔsisile zolɛ na ɔvale ɔnwanle mgbanyima mɔɔ nee Neebɔto de Gyɛzɛlii la.

⁹ Ɔhɛlɛle ye wɔ ye ngɛlata ne mɔ anu kɛ, “Bɛmaa menli ne ɛhye ɛhɔne na bɛrayia na bɛva Neebɔto bɛrazie ayia ne anu.

¹⁰ Bɛkpondɛ agbamgbanvolɛ kɛyɛ nwiɔ mɔɔ kɛhola kɛgyinla ɔ nyunlu kɛdo ye ɛzonle la ɛha ye kɛ, ‘Wɔdindi Ɛdɛnkɛma anyunlu; eza wɔwa belemgbunli amonle.’ Bɛwie a bɛva ye bɛhɔ kandiba ne na bɛzi ye awolɛ bɛhu ye.”

¹¹ Gyɛzɛlii suakpole ne azo amra nee bɛ mgbanyima yɛle mɔɔ Gyɛzɛbɛle hilele bɛ wɔ ye ngɛlata ne mɔ anu la.

¹² Bɛmanle menli ne hyele ɛhɔne na bɛvale Neebɔto bɛraziele bɛ ayia ne anu.

¹³ Agbamgbanvolɛ nwiɔ ne ragyinlanle Neebɔto anyunlu na bɛhanle bɛzile ɔ nyunlu wɔ menli ne anyunlu kɛ, “Neebɔto, wɔdindi Ɛdɛnkɛma anyunlu; eza wɔwa Yizilayɛ belemgbunli ne amonle.” Na ɛkɛ ne ala bɛvale Neebɔto bɛhɔle suakpole ne kandiba na bɛzile ye awolɛ bɛhunle ye.

¹⁴ Akee bɛhɛlale Gyɛzɛbɛle nrɛlaleɛ kɛ, “Bɛzi Neebɔto awolɛ bɛhu ye.”

¹⁵ Gyɛzɛbɛle dele nrɛlaleɛ ne ala la, ɔhanle ɔhilele Ehabe kɛ, “Neebɔto ɛwu. Dwazo kɔva Neebɔto vanye ɛya ne mɔɔ ɔdule ɔ gye kɛ ɔnrɛdɔne ye ɔnrɛmaa wɔ la.”

¹⁶ Na ɛkɛ ne ala Ehabe dwazole kɛ ɔkava Neebɔto vanye ɛya ne.

¹⁷ Ɛdɛnkɛma zoanle Nyamenle kpɔmanvolɛ Yilaegya mɔɔ vi Tehyebi la kɛ,

¹⁸ “Kɔ Samɛlea na ɛbanwu Belemgbunli Ehabe wɔ Neebɔto vanye ɛya ne anu kɛ ɔlɛfa ɛya ne yeayɛ ye ɛdeɛ.

¹⁹ Kɔze ye kɛ, ‘Ehabe, Ɛdɛnkɛma se membiza wɔ kɛ, saa wɔhu sonla ne a eza ɛfa ye ɛya ne wɔaboka nwolɛ ɔ? Ka kile ye kɛ, Medame, Ɛdɛnkɛma, mese: Ɛleka mɔɔ ahwea tafele Neebɔto mogya ne la ɛkɛ ne ala yɛɛ bɛbatafe ɛdawɔ noko wɔ mogya ɛdeɛ ne a.’ ”

²⁰ Ehabe nwunle Yilaegya ala la ɔhanle kɛ, “Hue e! Me kpɔvolɛ ɛvinde me.” Yilaegya buale ye kɛ, “Ɛhɛe, mevinde wɔ! Ɔboalekɛ wɔbɔ kpɔkɛ kɛ wɔmɔ, amumuyɛ ala a ɛyɛ wɔatia Ɛdɛnkɛma a.

²¹ Kɛ Ɛdɛnkɛma se la ɛne, ‘Nea, mebamaa munzule ara ɛ nwo zo. Mebabɔ ɛ bo zo bɔkɔɔ. Mebahu mrenya, alehelɛ anzɛɛ ahanra mɔɔ wɔ wɔ sua nu la amuala. Ko bɔbɔ ɛnrɛha!

²² Mebayɛ wɔ sua nu kɛmɔ menyɛle Nibate ara Gyɛlɔbowam nee Ahaegya ara Beeyahya azua nu la. Ɔboalekɛ wɔha me ɛya yɛɛ wɔmaa Yizilayɛma kɔsɔɔti ɛyɛ ɛtane.’

²³ Eza Ɛdɛnkɛma se, menze wɔ kɛ, ‘Ɛ ye Gyɛzɛbɛle, ahwea batete ye nwonane wɔ Gyɛzɛlii suakpole ne azo.

²⁴ Saa awie biala mɔɔ bɔ Ehabe abusua ne bie la wu sua zo a, ahwea bali ye nwonane; ɔwu ɛbɔ nu noko a, nloma basuso ye nwonane.’ ”

²⁵ (Awie anyɛ nyɛleɛ ɛtane kpole antia Ɛdɛnkɛma, kɛmɔ Ehabe yɛle la. Ɔ ye Gyɛzɛbɛle a zile ye adua manle ɔbɔle ɛbɛla zɔhane a.

²⁶ Ehabe bɔle munzule; ɔdoale awozonle bo zo, kɛmɔ Amɔnoma yɛle mɔɔ yemɔti Ɛdɛnkɛma ammaa bɛannyia ɛleka bɛangyinla wɔ Yizilayɛma anyunlu la.)

²⁷ Yilaegya anloa dɔle ala la, Ehabe suosuanle ye adɛladeɛ mɔɔ ɔwula la anu na ɔvale ɛrele ɔhedale, ɔhyele ɛhɔne, ɔvale ɛrele ɔlale na ɔluale ye alɔbɔlɛ alɔbɔlɛ nu.

²⁸ Na Ɛdɛnkɛma zele Yilaegya kɛ,

²⁹ “Wɔnwu kɛ Ehabe ɛzi ɛdo ɔ nwo aze bɛtɛɛ ɛmaa me la ɔ? Kɛmɔ yevu ɔ nwo la, me nee ye ɛnrɛli kɛkala wɔ ye mekɛ zo; kenle bie, wɔ ɔ ra ne mekɛ zo yɛɛ mebabɔ ye awuke ne a.”