1 Arl 2 - BAEBOLO ANZƐƐ BULUKU NWUANZANWUANZA

Devidi tu Sɔlɔmɔn folɛ mɔɔ li amozi

¹ Mekɛ mɔɔ Devidi bahɔ ewule nu la, ɔvɛlɛle ɔ ra Sɔlɔmɔn na ɔzele ye kɛ,

² “Ɔka ekyii mekɔ me ɛkɛla nzi, yemɔti gyinla kpundii kɛ ralɛ nrenya,

³ na di gyima mɔɔ Ɛdɛnkɛma wɔ Nyamenle ne ɛze wɔ kɛ ɛli la. Dua ye adenle ne azo, di ye mɛla ne mɔ nee ye ngyehyɛlɛ ne mɔ azo, kɛmɔ bɛhɛlɛ bɛ wɔ Mosisi mɛla buluku ne anu la, amaa wɔ ɛbɛlabɔlɛ ne adenrɛ na wɔakpazi wɔ adenle nee nyɛleɛ biala anu.

⁴ Saa ɛyɛ ɛhye a yɛɛ Ɛdɛnkɛma ɛwɔkɛ ne mɔɔ ɔbɔle me la bayɛ nɔhalɛ a. Ɛdɛnkɛma zele me kɛ, ‘Saa ɛ mra ne mɔ nea boɛ na bɛfa bɛ ahonle nee bɛ ɛkɛla muala bɛtoa me bo zo nɔhalɛ nu a, yemɔ ɛ bo zo amra ɛnrɛvi Yizilayɛ belemgbunli ebia ne azo ɛlɛ.’

⁵ “Mɔɔ tɔ zolɛ bieko la a le kɛ, ɛdawɔ ɛze mɔɔ Zɛluaya ara Dwowabe vale yɛle me na ɔhunle Yizilayɛ safohyenle mgbanyinli nwiɔ ne mɔɔ le Abenɛɛ ara Nɛɛ nee Gyita ara Ameesa la. Ɔhunle menli nwiɔ ɛhye wɔ anzonudwolɛ mekɛ nu ɔziele menli mɔɔ Abenɛɛ nee Ameesa hunle bɛ wɔ konle nu la abo zo; ɔmanle mengyinlanle gyinlabelɛ ɛtane, na kɛkala nwolɛ ngyelelɛ ɛdo me.

⁶ Ɛdawɔ fa nwolɛ adwenle, noko mmamaa Dwowabe wu ɔ ti anwo ewule.

⁷ “Ɛ nee Geleadenli Baazeleeyae amra ne mɔ ɛlua kɛnlɛma gyɛlɛɛnye na ɛ nee bɛ ɛdo ɛsalɛ ɛyɛba ko anu, kɛmɔ ɛ nee menli bie mɔ yɛ la, ɔboalekɛ mekɛ mɔɔ mevi ɛ diema nrenya Abesalɛm anwo lɔ menriandile la kɛ bɛliele me la ɛne.

⁸ “Akee Bɛngyamanenli Gila ara Hyemɛyae mɔɔ vi Bahulem la ɔdaye ɔwɔ ɛkɛ. Kenle mɔɔ mengɔle Meehaneeyem la ɔbɔle me sasa kpole bie, noko me nee ye yiale Azule Dwɔdan ne anloa la menvale Ɛdɛnkɛma menganle ndane kɛ menrɛhu ye.

⁹ Noko mmamaa ɔfa ɔ nwo ɔdi. Kɛmɔ ɛdawɔ ɛze wɔ nrɛlɛbɛ la, ɛbanwu adenle mɔɔ ɔwɔ kɛ ɛfa ye ɛse zolɛ la. Maa ɔva ɔ ti kanrɛlɛ ne ɔdua.”

Devidi ewule

¹⁰ Akee Belemgbunli Devidi hɔle ayile nu na bɛwulale ye mrɛlatɛlɛ nu wɔ Devidi suakpole zo.

¹¹ Ɔziele Yizilayɛ maanle ne ɛvolɛ abulanla. Devidi dɛnlanle ebia ne azo ɛvolɛ nsuu wɔ Hibulɔn yɛɛ ɔdɛnlanle zolɛ ɛvolɛ abulasa nee nsa wɔ Gyɛlusalɛm.

¹² Sɔlɔmɔn lile ɔ ze Devidi agya na ye belemgbunlililɛ ne hɔle zolɛ.

Adonaegya ewule

¹³ Akee Adonaegya mɔɔ le Hagete ara ne rale Sɔlɔmɔn ɔ nli Batehyɛba ɛkɛ. Batehyɛba bizale ye kɛ, “Ɔle bɛtɛɛ ɔ?” Adonaegya buale kɛ, “Ɔle bɛtɛɛ.”

¹⁴ Na ɔvale ɔzɔle zolɛ kɛ, “Mebabɔ wɔ adawu ekyi bie.” Batehyɛba zele kɛ, “Ka maa mendie.”

¹⁵ Adonaegya hanle kɛ, “Ɛdawɔ ɛze kɛ ɛnee belemgbunlililɛ ne le me ɛdeɛ, mɔɔ Yizilayɛma amuala ze sie a. Noko kɛkala, ninyɛne ɛhakyi ɛmaa ebia ne ɛhɔli me diema Sɔlɔmɔn ɛkɛ. Ɛhye kile kɛ Ɛdɛnkɛma yɛɛ ɛva ɛmaa ye a.

¹⁶ Na melɛ me nzɛlɛlɛ ko meto ɛ nyunlu na mmaye me rɛle ɛto me sa nu.” Batehyɛba bizale ye kɛ, “Yemɔ a le duzu?”

¹⁷ Adonaegya hanle kɛ, “Mebodo wɔ, ka kile Belemgbunli Sɔlɔmɔn kɛ ɔva Hyunɛm bɛlɛra ne mɔɔ bɛfɛlɛ ye Abehyage la ɔmaa mengya ye. Meze kɛ saa wɔmɔ ɛka a ɔnrɛkpo.”

¹⁸ Batehyɛba buale ye kɛ, “Mede, mebava wɔ edwɛkɛ ne meado belemgbunli anyunlu.”

¹⁹ Zɔhane ati Batehyɛba hɔle Belemgbunli Sɔlɔmɔn ɛkɛ kɛ ɔkabɔ Adonaegya adawu ne yeahile ye. Belemgbunli ne dwazole bɔle ɔ ti aze manle ɔ nli na ɔdɛnlanle aze. Ɔvɛlɛle ɔmanle bɛrɛlɛle ɔ nli ebia wɔ ye fema zo,

²⁰ na ɔ nli hanle hilele ye kɛ, “Mesɛlɛ wɔ debie ekyi; dwenle nwolɛ, mebodo wɔ, mmakɔsɔ ɛ ti.” Belemgbunli zele ye kɛ, “Ɔmɔ, duzu debie ɔ? Biza na mebabua wɔ gyɛlɛɛnye.”

²¹ Batehyɛba zele ye kɛ, “Meka meahile wɔ na wɔadwenle nwolɛ wɔava Hyunɛm bɛlɛra ne mɔɔ bɛfɛlɛ ye Abehyage la wɔamaa ɛ diema Adonaegya agya ye.”

²² Belemgbunli ne bizale ɔ nli kɛ, “Duzu ati a ɛbiza Abehyage agyalɛ wɔamaa Adonaegya ɛ? Saa zɔhane ɛdeɛ a ɛnee die Yizilayɛ maanle ne amuala noko boka nwo maa Adonaegya ɛ. Yemɔ a ɔle adiema koatee a. Eza yeanga ye zɔhane, sɛlɛvolɛ Abayata nee Dwowabe wɔ ɔ nzi.”

²³ Na belemgbunli ne hanle Ɛdɛnkɛma kɛ, “Deɛ ɛhye mɔɔ Adonaegya ɛbiza la, saa meammaa yeanva ɔ ti kanrɛlɛ ne yeandua a Nyamenle ɛdua me kakɛ ɛgua me bie zolɛ.

²⁴ Zɔhane ati, kɛmɔ tease Ɛdɛnkɛma mɔɔ ɛlie me ebia ye, mɔɔ le egya Devidi ebia ye ɛzie aze ɛmaa me, na yebɔ me atɛnlase la, ɔwɔ kɛ Adonaegya tɔ amolɛ nu ɛnɛ demua ye!”

²⁵ Belemgbunli Sɔlɔmɔn amgba zoanle Gyɛhɔyada ara Bɛnaya manle ɔhɔhunle Adonaegya.

Abayata ɛvoanlɛ nee Dwowabe ewule

²⁶ Belemgbunli ne hanle hilele sɛlɛvolɛ Abayata kɛ, “Kɔ wɔ maanle nu wɔ Anato. Ɛfɛta ewule, noko menrɛmaa bɛnrɛhu wɔ, ɔluakɛ wɔmɔ a ɛnleanle Ɛdɛnkɛma Ngyekyeleɛ Ɛlɛka ne azo wɔ egya Devidi mekɛ zo a. Eza ɛ nee egya bɛnwunle amaneɛ dɔɔnwo.”

²⁷ Ɛhye ati Sɔlɔmɔn yele Abayata gyima nu kɛ ɔnle Ɛdɛnkɛma sɛlɛvolɛ bieko. Ɔyɛle ɛhye, amaa Ɛdɛnkɛma edwɛkɛ ne mɔɔ ɔhanle wɔ Yilae abusua ne anwo wɔ Hyaelo la ayɛ nɔhalɛ.

²⁸ Dwowabe dele mɔɔ ɛzi la. Mekɛ ne anu ɛnee ɔgyi Adonaegya anzi, ɛnee ɔnle Abesalɛm anzi. Na ɔnriandile ɔhɔwolole Ɛdɛnkɛma Ɛzonlenlɛ Ndanlɛ Sua ne anu na ɔhɔdanenle azukponle ne.

²⁹ Belemgbunli Sɔlɔmɔn dele kɛ Dwowabe ɛnriandi ɛhɔ Ɛdɛnkɛma Ndanlɛ Sua ne anu, ɛhɔdane azukponle ne. (Na ɔzoanle kɛ bɛhɔbiza ye deɛ holɛ ko mɔɔ ɔnwunle ye mɔɔ yemɔti yehɔdane azukponle ne la. Dwowabe buale kɛ ɔsulo Belemgbunli Sɔlɔmɔn la ati ɔ.) Na Sɔlɔmɔn zoanle Bɛnaya kɛ ɔhɔhu Dwowabe.

³⁰ Na Bɛnaya hɔle Ɛdɛnkɛma Ndanlɛ Sua ne anu hɔzele Dwowabe kɛ, “Belemgbunli se ɛvinde ɛrɛla.” Dwowabe buale kɛ, “Mendu me gyakɛ. Mewu ɛke ala.” Bɛnaya hɔbɔle belemgbunli amaneɛ bieko kɛ, “Nana, Dwowabe se ɔndu ɔ gyakɛ na ɔwu yeala ɛkɛ ne ala.”

³¹ Sɔlɔmɔn buale kɛ, “Yɛ mɔɔ Dwowabe kpondɛ la maa ye. Ku ye sie ye, amaa me nee egya sua nu amra yɛanli fɔlɛ wɔ menli mɔɔ ɛnze nwolɛ bie la mogya mɔɔ Dwowabe hanle guale mgbane la anwo.

³² Ɛdɛnkɛma ɛdua ye kakɛ wɔ ye amumuyɛ ne mɔɔ ɔyɛle ɔhunle Abenɛɛ mɔɔ le Yizilayɛ Safohyenlema Kpanyinli ne nee Ameesa mɔɔ le Dwuda Safohyenlema Kpanyinli, wɔ mekɛ mɔɔ egya Devidi ɛnze nu la. Ɛnee mrenya nwiɔ ɛhye le kpalɛ yɛɛ eza bɛbɔ mɔdenle bɛtɛla ye.

³³ Zɔhane ala yɛɛ menli nwiɔ zɔhane mogya bagua ɔdaye Dwowabe nee ɔ bo zo amra ati zo a; Devidi nee ɔ bo zo amra mɔɔ di ye ebia ne la, Ɛdɛnkɛma ɛmaa saleɛ ɛdoa bɛ dahuu!”

³⁴ Yemɔti Bɛnaya hɔle azukponle ne anwo wɔ Ɛdɛnkɛma Ndanlɛ Sua ne anu hɔhunle Dwowabe na bɛziele ye wɔ ɔdaye ye awuke nu wɔ fienemgbole ne anu.

³⁵ Belemgbunli Sɔlɔmɔn vale Bɛnaya lile Dwowabe agyakɛ anu kɛ ɔle Safohyenlema Kpanyinli na ɔvale Abayata gyinlabelɛ ne ɔmanle sɛlɛvolɛ Zeedɔko.

Hyemɛyae ewule

³⁶ Akee belemgbunli zoanle manle bɛhɔvɛlɛle Hyemɛyae na ɔzele ye kɛ, “Si sua wɔ Gyɛlusalɛm ɛke na tɛnla nu. Mmatu ɛ bo ɛkɔ ɛleka biala.

³⁷ Kakye kɛ, kenle biala mɔɔ ɛkɛpɛ Azule Kedelɔn ne la ɛnee wɔ ewule mekɛ ɛdwu yɛɛ wɔ mogya bagua ɛdawɔ ɛ ti zo.”

³⁸ Hyemɛyae buale belemgbunli ne kɛ, “Mɔɔ wɔha la, menzu wɔ kpolera; mebali zolɛ.” Yemɔti Hyemɛyae dɛnlanle Gyɛlusalɛm hyɛle kpalɛ.

³⁹ Ɛvolɛ nsa anzi Hyemɛyae ngɛkɛlɛ ne mɔ anu nwiɔ nriandile hɔle Gate Belemgbunli Ekehye, mɔɔ le Meeyaka ara ne anwo lɔ. Bɛbɔle Hyemɛyae amaneɛ kɛ, “Wɔ ngɛkɛlɛ ne mɔ wɔ Gate.”

⁴⁰ Zɔhane ati Hyemɛyae vole ye asoaso zo hɔle Ekehye ɛkɛ kɛ ɔkakpo bɛ bo zo; ɔhɔnwunle ye ngɛkɛlɛ ne mɔ na ɔvale bɛ ɔziale ɔrale.

⁴¹ Sɔlɔmɔn dele kɛ Hyemɛyae vi Gyɛlusalɛm ɛpɛ azule ɛhɔ Gate ɛzia la,

⁴² ɔmanle bɛhɔvɛlɛle ye na ɔbizale ye kɛ, “Wɔmɔ, memanle ɛvale Ɛdɛnkɛma ɛlile amonle ɛhilele me kɛ ɛnrɛdu ɛ bo ɛlɛ, na kenle biala mɔɔ ɛkɛdu ɛ bo ɛkɛvi Gyɛlusalɛm ɛke ɛkɛhɔ ɛleka biala la ɛnee ɛze kɛ wɔwu ala ɛne? Se ɛzele me kɛ wɔde na ɛkɛli me mɛla ne azo.

⁴³ Duzu ati yɛɛ akee wɔdo ndane ne mɔɔ ɛvale Ɛdɛnkɛma ɛhanle la na wɔbulu me mɛla ne azo ɛ?

⁴⁴ Se ɛze ye ɛ ti anu, nyɛleɛ ɛtane ɛtane mɔɔ ɛyɛle ɛtiale egya Devidi la? Akee Ɛdɛnkɛma bamaa wɔ munzule abɔ ɛ ti.

⁴⁵ Belemgbunli Sɔlɔmɔn ɛdeɛ, Ɛdɛnkɛma bayila ye kosoɛɛ na saleɛ adoa egya Devidi ebia ne.”

⁴⁶ Nzinlii belemgbunli manle Bɛnaya tumi kɛ ɔhɔhu Hyemɛyae, na ɔhɔhunle ye. Yemɔti tumi kɔsɔɔti akee ralile Belemgbunli Sɔlɔmɔn asa anu.