1 Arl 17 - BAEBOLO ANZƐƐ BULUKU NWUANZANWUANZA

Nyamenle dua Yilaegya anwo zo yeamaa ezule agyakyi ɛdɔlɛ

¹ Akee Yilaegya mɔɔ vi Tehyebi mɔɔ wɔ Geleade maanle nu la hanle hilele Ehabe kɛ, “Meka Ɛdɛnkɛma, Yizilayɛ tease Nyamenle ne mɔɔ mesonle ye la, kɛ ɛbɔlɛ anzɛɛ ezule ɛnrɛdɔ ɛvolɛ kɛyɛ nsa ye anu kɔkpula mekɛ mɔɔ menwɔye me nloa la.”

² Na Ɛdɛnkɛma zele Yilaegya kɛ,

³ “Ye ɛ nwo ɛke kɔ aduduleɛ kɔvea azule Kilete mɔɔ la Azule Dwɔdan ne aduduleɛ lɔ la anloa.

⁴ Ɛbanlo azule ne bie; eza meyɛ ye kɛ ahɔhɔsɛlɛ ɛrɛlɛ wɔ aleɛ wɔ ɛkɛ.”

⁵ Zɔhane ati ɔhɔyɛle mɔɔ Ɛdɛnkɛma zele ye la: ɔhɔveale azule Kilete ne anloa wɔ Dwɔdan ne aduduleɛ lɔ,

⁶ ɔnlonle azule ne bie, yɛɛ ahɔhɔsɛlɛ rɛlɛle ye aleɛ nee nane nwonlomɔ nee nɔsolɛ.

⁷ Na kɛmɔ ɛnee ezule ɛndɔ la ati, yeandwu mekɛ biala yɛɛ azule ne sesanle a.

Yilaegya nee Zalefate kunlanvolɛ raalɛ ne

⁸ Ɛdɛnkɛma zele Yilaegya kɛ,

⁹ “Dwazo kɔ Zalefate mɔɔ wɔ Saedɛn maanzinli nu la kɔdɛnla ɛkɛ. Meyɛ ye kɛ kunlanvolɛ raalɛ bie mɔɔ de ɛkɛ ne maanle ne anu la ɛmaa wɔ aleɛ.”

¹⁰ Yemɔti ɔhɔle Zalefate. Ɔdwule sua ne kandiba la, ɔnwunle kunlanvolɛ raalɛ bie kɛ ɔlɛsesa ngeleka; ɔvɛlɛle ye na ɔzele ye kɛ, “Bɛlɛ me nzule ekyi maa meno.”

¹¹ Raalɛ ne hakyile ɔ nwo mɔɔ ɔkɔ la, Yilaegya zele ye kɛ, “Anrɛɛ bɛlɛ me aleɛ ekyi noko.”

¹² Raalɛ kunlanvolɛ ne buale ye kɛ, “Meka Ɛdɛnkɛma wɔ Nyamenle ne kɛ menlɛ kpanwo nretee zɛ wɔ ɛkɛ. Yeha me ɛdɔkɛ ekyi bie wɔ me kpule ne abo yɛɛ nwole ekyi wɔ toba bo. Yemɔ yɛɛ melɛkpondɛ nwolɛ ngeleka kɛyɛ nwiɔ meahɔwuda senle meado na me nee me ra nrenya ne yɛava yɛazɔ yɛ ɛbolɛ a. Saa yɛdi na ɔwie a ɛnee yɛze kɛ yɛ awieleɛ ne ala ɛne; ɛhɔne yɛɛ bahu yɛ a, ɔluakɛ ɛnee yɛnlɛ aleɛ bieko.”

¹³ Yilaegya zele kunlanvolɛ raalɛ ne kɛ, “Mmadwenle nwolɛ. Wɔmɔ kɔnlea yɛ mɔɔ wɔha la. Noko akee dumua te ekyi doa tata maa me kolaa na wɔado ɛ nee ɛ ra nrenya ne bɛ ɛdeɛ ne.

¹⁴ Ɔluakɛ Ɛdɛnkɛma, Yizilayɛ Nyamenle ne se, ‘Ɛdɔkɛ ne abo ɛnrɛdu kpule ne abo, yɛɛ nwole ne ɛnrɛwie toba ne abo ɛlɛ, kɔkpula mekɛ mɔɔ Ɛdɛnkɛma kɛmaa ezule kɛdɔ bieko kɛgua azɛlɛ ye azo la.’ ”

¹⁵ Kunlanvolɛ raalɛ ne hɔyɛle ye kɛmɔ Yilaegya hilele ye la, na ɔdaye nee Yilaegya nee ye sua nu amra nyianle aleɛ lile dahuu.

¹⁶ Ɛdɔkɛ ne anwie kpule ne anu, yɛɛ nwole ne noko abo andu toba ne abo, kɛmɔ Ɛdɛnkɛma luale Yilaegya anwo zo hanle la.

¹⁷ Ɛhye anzi kunlanvolɛ raalɛ ne, mɔɔ le awuke menle ne, ara nrenya ne anwo dole ye. Anwondolɛ ne hakyile anwonyane kpole, na nzinlii ɔwule.

¹⁸ Raalɛ ne hanle hilele Yilaegya kɛ, “Nyamenle sonla, duzu edwɛkɛ a le ɛhye? Medwenle kɛ ɛrale ɛke kɛ ɛfa saleɛ wɔarɛlɛ me; amuanrɛɛ ɛrale kɛ ɛbaza me ɛtane ne mɔ wɔagua zolɛ na wɔamaa me ra ye awu.”

¹⁹ Yilaegya zele raalɛ ne kɛ, “Fa kakula ne maa me.” Ɔliele kakula ne mɔɔ ɛnee la raalɛ ne asa azo la. Ɔvale ye ɔvole ɛbolɔnsam ne azo na ɔ nee ye hɔle ɛleka mɔɔ ɔdaye Yilaegya ɔda la ɔhɔdole ye wɔ ye mgba ne azo.

²⁰ Akee ɔmanle ɔ ne zo ɔzɛlɛle kɛ, “O Ɛdɛnkɛma, me Nyamenle, duzu munzule a akee wɔmaa yerado raalɛ ye mɔɔ merazokoɛ ye la na wɔmaa ɔ ra nrenya ye ɛwu a?”

²¹ Yilaegya zanle ɔ nwo fɔɔnwo wɔ kakula ne anwo zo fane nsa na ɔzɛlɛle kɛ, “O Ɛdɛnkɛma, me Nyamenle, maa kakula ye ɛrɛla ngoane nu bieko.”

²² Ɛdɛnkɛma diele Yilaegya nzɛlɛlɛ, kakula ne liele ɛnwomenle na ɔdwazole.

²³ Ɔvale kakula ne ɔdwule aze ɔrɛlɛle ɔ nli na ɔzele kɛ, “Ɔmɔ, nea, ɛ ra ne ɛde kpɔkɛ!”

²⁴ Raalɛ ne hanle hilele Yilaegya kɛ, “Kɛkala menwu kɛ ɛle Nyamenle sonla, na Ɛdɛnkɛma dua ɛ nwo zo tendɛ.”