1 Arl 16 - BAEBOLO ANZƐƐ BULUKU NWUANZANWUANZA

¹ Ɛdɛnkɛma luale Gyihu mɔɔ le Hananae ara ne anwo zo vale nrɛlaleɛ hɔmanle Beeyahya kɛ,

² “Ɛdawɔ Beeyahya, anrɛɛ awie ɛnze wɔ. Noko memkpogyale wɔ zo menvale wɔ menziele me menli Yizilayɛma belemgbunli. Na kɛkala, wɔva Gyɛlɔbowam agyakɛ wɔmaa me menli Yizilayɛma ɛyɛ ɛtane ɛtia me.

³ Zɔhane ati mebabɔ ɛ bo zo meamaa wɔ awuke ne abɔ kɛ Nibate ara Gyɛlɔbowam ɛdeɛ ne la.

⁴ Wɔ sua nu amra biala mɔɔ kɛwu suakpole zo la, ahwea bali ye nwonane, yɛɛ mɔɔ kɛwu ɛbɔ nu noko la, nloma basuso ye nwonane.”

⁵ Bɛhɛlɛ debie biala mɔɔ Beeyahya yɛle la anwo edwɛkɛ wɔ Yizilayɛ Arelemgbunli Tetedwɛkɛ Buluku ne anu.

⁶ Beeyahya hɔle ayile nu na bɛwulale ye mrɛlatɛlɛ nu wɔ Tɛza, na ɔ ra Yila lile ebia ne.

⁷ Ɛdɛnkɛma vale nrɛlaleɛ zoanle ye kpɔmanvolɛ Gyihu mɔɔ le Hananae ara ne manle ɔhɔmanle Beeyahya nee ye sua nu amra wɔ ɛtane mɔɔ bɛyɛle bɛtiale ye la anwo. Beeyahya hanle Ɛdɛnkɛma ɛya, ɔluakɛ ɔyɛle ɛtane ɔtiale ye, kɛmɔ Gyɛlɔbowam yɛle la; yeanga ɛhye angome, ɔdaye Beeyahya a ɔhunle Gyɛlɔbowam abo zo amra amuala a.

Yizilayɛ Belemgbunli Yila

⁸ Mekɛ mɔɔ Belemgbunli Esa lile ɛvolɛ abulanwiɔ nee nsia wɔ Dwuda ebia ne azo la yɛɛ Beeyahya ara Yila bɔle ɔ bo kɛ ɔdi belemgbunli wɔ Tɛza a; ɔlile ebia ne ɛvolɛ nwiɔ.

⁹ Ye sonvolɛ Zemelae mɔɔ nea ye ɛlɔnema mɔɔ ka konle ehwili ne mɔ anu foa ko anwo zo la bɔle adwenle yɛle ɔ nwo ɛlɔne. Kenle ko Yila wɔ ye sonvolɛ Aaza mɔɔ nea belemgbunli awuke nu ɛkɛ ne la sua nu wɔ Tɛza ɔlɛno nza na asɛɛ yewie bo la,

¹⁰ Zemelae rawolole awuke ne anu, ɔtiale ye ɔdole aze, ɔhunle ye na ɔdaye ɔlile ebia ne.

¹¹ Zemelae lile ebia ne ala la yɛɛ ɔhunle Beeyahya sua nu amra kɔsɔɔti a. Yeangyakyi kakula nrenya ekyi ko bɔbɔ ɛkɛ. Ɔ gɔnwo mɔ bɔbɔ, ɔhunle bɛ muala, ɔbɔle bɛ bo zo.

¹² Yemɔti ɔlua Ɛdɛnkɛma anloa edwɛkɛ mɔɔ ɔvale ɔzoanle ye kpɔmanvolɛ Gyihu la azo, Zemelae bɔle Beeyahya awuke ne tɔɔ.

¹³ Ɔluakɛ Beeyahya nee ɔ ra Yila bɛ mu nwiɔ bɛmanle ɛya hunle Ɛdɛnkɛma wɔ bɛ awozonle ezonlenlɛ ti. Bɛyɛle ɛtane na bɛmanle Yizilayɛma noko yɛle bie.

¹⁴ Bɛhɛlɛ Yila nyɛleɛ nee ɛbɛla mɔɔ ɔbɔle la anwo edwɛkɛ wɔ Yizilayɛ Arelemgbunli Tetedwɛkɛ Buluku ne anu.

Yizilayɛ Belemgbunli Zemelae

¹⁵ Esa lile ɛvolɛ abulanwiɔ nee nsuu wɔ Dwuda ebia ne azo la yɛɛ Zemelae dɛnlanle Tɛza lile Yizilayɛ ebia ne a. Ɔlile ebia ne kenle nsuu. Mekɛ ne anu ɛnee Yizilayɛ ɛlɔnema ɛhɔ nzia wɔ Gebɛtɔn mɔɔ wɔ Filisitia azɛlɛ zo la.

¹⁶ Mɔɔ menli mɔɔ ɛhɔ nzia ne la dele kɛ Zemelae ɛbɔ adwenle ɛhu belemgbunli ne la, bɛvale ɛlɔnema kpanyinli Ɔmelae bɛziele Yizilayɛ belemgbunli ɛkɛ ne ala wɔ ɛleka mɔɔ bɛhɔ nzia ne la.

¹⁷ Bɛyɛle ɛhye ɔwiele la Ɔmelae nee ye ɛlɔnema ne mɔ yele bɛ nwo wɔ Gebɛtɔn na bɛhɔvale Tɛzama aze.

¹⁸ Zemelae nwunle kɛ ɛlɔne ɛva bɛ aze la, ɔhɔveale belemgbunli sua ne anu akunlu nehane na ɔdole senle sua ne anu ɔyelale ye ɔguale ɔ ti zo ɔhunle ɔ nwo.

¹⁹ Ɔlua ye ɛtane mɔɔ ɔyɛle ɔtiale Ɛdɛnkɛma la ati a ɔwule ewule ɛhye a; ɔbɔle ye ɛbɛla, kɛmɔ Gyɛlɔbowam mɔɔ lumuale ɔ nyunlu la bɔle la. Ɔyɛle ɛtane na ɔmanle Yizilayɛma amuala yɛle bie.

²⁰ Bɛhɛlɛ Zemelae nyɛleɛ mɔɔ ɔyɛle, nee ye kɔdiawu adwenle mɔɔ ɔbɔle la anwo edwɛkɛ wɔ Yizilayɛ Arelemgbunli Tetedwɛkɛ Buluku ne anu.

Yizilayɛ Belemgbunli Ɔmelae

²¹ Nzinlii Yizilayɛma anu kpakyele nwiɔ. Ɛnee foa ko kulo kɛ bɛfa Tebenae mɔɔ le Gaenate ara ne bɛsie ebia ne, yɛɛ foa ko noko gyi Ɔmelae anzi.

²² Bɛpemgbenle dedee la, menli mɔɔ gyi Ɔmelae anzi la asa homonle Tebenae asa azo ne mɔ anwo zo na bɛhunle Tebenae. Na Ɔmelae lile ebia ne.

²³ Belemgbunli Esa dɛnlanle Dwuda ebia ne azo na ɔnyianle ɛvolɛ abulasa nee ko la yɛɛ Ɔmelae bɔle ɔ bo kɛ ɔsie Yizilayɛma a. Ɔlile ebia ne ɛvolɛ bulu nee nwiɔ; ɔlile nuhua ɛvolɛ nsia wɔ Tɛza.

²⁴ Ɔmelae dɔle Samɛlea Boka ne dwɛtɛ fufule apenle nsia wɔ Hyimɛle asa anu. Ɔvale ɛkɛ ne ɔkyekyele sua na ɔvale azɛlɛ menle Hyimɛle duma ɔdole zolɛ, na bɛvɛlɛle sua ne Samɛlea.

²⁵ Ɔmelae yɛle debie mɔɔ Ɛdɛnkɛma kyi la, bɔbɔ akee ɔdɛlale alumua arelemgbunli ne mɔ.

²⁶ Ɔboalekɛ Nibate ara Gyɛlɔbowam ɛbɛla ne mɔɔ ɔbɔle a ɔmanle Yizilayɛma yɛle ɛtane la bie yɛɛ ɔbɔle a. Ɔdoale awozonle ɛzonlenlɛ, ɔmanle Ɛdɛnkɛma, Yizilayɛ Nyamenle ne vale ɔ nwo ɛya.

²⁷ Bɛhɛlɛ Ɔmelae nyɛleɛ nee ye mɔdenle mɔɔ ɔbɔle la wɔ Yizilayɛ Arelemgbunli Tetedwɛkɛ Buluku ne anu.

²⁸ Ɔmelae hɔle ayile nu na bɛwulale ye mrɛlatɛlɛ nu wɔ Samɛlea, na ɔ ra Ehabe lile ebia ne.

Yizilayɛ Belemgbunli Ehabe

²⁹ Ɔmelae ara Ehabe kali Yizilayɛ belemgbunli la ɛnee Dwuda Belemgbunli Esa ɛli ɛvolɛ abulasa nee mɔtwɛ wɔ Dwuda ebia ne azo. Ɔmelae ara Ehabe lile ebia ne ɛvolɛ abulanwiɔ nee nwiɔ.

³⁰ Akee Ehabe ɛtane ɛdeɛ mɔɔ ɔyɛle la, bɛbɔ zolɛ a ɔmbɔ; ɔdɛlale arelemgbunli mɔɔ lumuale la kɔsɔɔti ɛtane ɛdeɛ ne mɔ.

³¹ Ɔ nye liele Nibate ara Gyɛlɔbowam ɛbɛla ɛtane ne mɔ mɔɔ ɔbɔle ɔtiale Ɛdɛnkɛma la anwo na ɔvale ɔ gyakɛ. Ehabe hɔgyale Gyɛzɛbɛle mɔɔ le Saedɛn Belemgbunli Ɛtebeeyale ara raalɛ, na ɔhɔhotole bozonle Beeyale ɔzonlenle ye.

³² Ɔzile bozonle sua ɔmanle bozonle Beeyale na ɔzile azukponle wɔ nuhua ɔmanle bozonle ne wɔ Samɛlea.

³³ Ehabe yɛle bozonle raalɛ Ahyela ne ananze ziele ye aze. Ɔhanle Ɛdɛnkɛma, Yizilayɛ Nyamenle ne ɛya ɔdɛlale Yizilayɛ belemgbunli biala.

³⁴ Ye mekɛ zo a Hayɛle mɔɔ vi Bɛtɛle la kyekyele suakpole Gyɛleko bieko a. Kɛmɔ Ɛdɛnkɛma vale luale Dwɔhyua anwo zo hanle la, amgba Hayɛle vale ye belamunli ralɛ nrenya Abaelam wulale Gyɛleko sua ne abo, yɛɛ ɔ ra kazima ne, mɔɔ bɛfɛlɛ ye Sigɛbe la a bɛvale bɛwulale sua ne anuhɔlɛ kpole ne abo a.