1 Arl 13 - BAEBOLO ANZƐƐ BULUKU NWUANZANWUANZA

¹ Mekɛ ne anu ɛnee Ɛdɛnkɛma ɛva ɔ nloa edwɛkɛ ɛzoa Dwuda Nyamenle kpɔmanvolɛ ko wɔ Bɛtɛle. Ɔhɔdwule ɛkɛ ne wɔ mekɛ mɔɔ ɛnee Gyɛlɔbowam gyi azukponle ne anwo ɛlɛkpu ɛyɛlɛ la.

² Na Nyamenle kpɔmanvolɛ ne luale Ɛdɛnkɛma anloa edwɛkɛ zo deanle azukponle ne na ɔzele kɛ, “O azukponle, wɔmɔ azukponle! Kɛ Ɛdɛnkɛma se la ɛne: Bɛbawo ralɛ nrenya wɔ Belemgbunli Devidi sua nu; bɛbavɛlɛ ye Dwosaya, na ɛ nwo zo yɛɛ ɔbahu ahɔmenle mɔɔ ɛkpu ɛyɛlɛ wɔ wɔ zo la, na yeayela menli mbowule wɔ zolɛ.”

³ Nyamenle kpɔmanvolɛ ne hilele sɛkɛlɛneɛ ɛhye na ɔhanle kɛ, “Amaa wɔanwu kɛ Ɛdɛnkɛma a ɛlɛtendɛ la, Ɛdɛnkɛma se, ‘Azukponle ɛhye bagolo agua, na zolɛ nzonle babɔ asande.’ ”

⁴ Belemgbunli Gyɛlɔbowam dele Nyamenle sonla ne edwɛkɛ mɔɔ ɛha wɔ azukponle ne anwo wɔ Bɛtɛle la, ɔdendenle ɔ sa wɔ Nyamenle kpɔmanvolɛ ne anwo na ɔdeanle nuhua kɛ, “Bɛhye ye!” Na ɛkɛ ne ala ɔ sa ne mɔɔ ɔdendenle la tenlenle mɔɔ ɔfa ɔmeta ɔ nwo a ɔnyɛ boɛ a.

⁵ Azukponle ne golole guale aze na zolɛ nzonle ne bɔle zandele, kɛmɔ Nyamenle kpɔmanvolɛ ne sɛkɛlɛneɛ ne mɔɔ Ɛdɛnkɛma hilele la kile la.

⁶ Akee Belemgbunli Gyɛlɔbowam hanle hilele Nyamenle kpɔmanvolɛ ne kɛ, “Mebodo wɔ, sɛlɛ Ɛdɛnkɛma wɔ Nyamenle ne maa ɔmaa me sa ye ɛzia ɛyɛ kɛ ye dɛba ne ala la.” Nyamenle kpɔmanvolɛ ne zɛlɛle, na Ɛdɛnkɛma manle belemgbunli ne asa ne ziale yɛle kpalɛ kɛ ye dɛba ne la.

⁷ Na belemgbunli ne hanle hilele Nyamenle kpɔmanvolɛ ne kɛ, “Maa yɛhɔ sua nu kɔnlo nzule, di debie, na mɔɔ wɔyɛ la, ɔwɔ kɛ meyɛ wɔ nyele.”

⁸ Nyamenle kpɔmanvolɛ ne buale kɛ, “Saa ɛbu wɔ anwonyia ne anu nwiɔ, wɔadu foa ko wɔamaa me bɔbɔ a me nee wɔ ɛnrɛhɔ sua nu, menrɛli aleɛ yɛɛ menrɛnlo nzule wɔ ɛke.

⁹ Ɔluakɛ, Ɛdɛnkɛma ɛdua me kɛ memmadi debie yɛɛ memmano nzule biala, eza memmasia medua adenle ne mɔɔ menluale nu membale la anu mekɔ sua nu.”

¹⁰ Yemɔti yeampe adenle ne mɔɔ ɔluale nu ɔrale Bɛtɛle la anu yeanzia yeangɔ; ɔvale adenle gyɛne nu.

Bɛtɛle Nyamenle kpɔmanvolɛ kpanyinli ne

¹¹ Mekɛ zɔhane anu ɛnee Nyamenle kpɔmanvolɛ kpanyinli ko de Bɛtɛle. Ɔ mra mrenya ne mɔ rahanle nyɛleɛ mɔɔ Nyamenle sonla ne mɔɔ vi Dwuda la rayɛle ye kenle ko ne la hilele ye. Bɛhanle edwɛkɛ ne mɔɔ Nyamenle kpɔmanvolɛ ne hanle hilele belemgbunli ne la noko bɛhilele bɛ ze.

¹² Bɛ ze bizale bɛ kɛ, “Nienwu adenle zo a ɔvale a?” Ɔ mra ne mɔ hilele ye adenle ne mɔɔ ɔvale zolɛ la.

¹³ Na Nyamenle kpɔmanvolɛ kpanyinli ne zele ɔ mra ne mɔ kɛ bɛziezie ye ɛkpɔnwɔ ne bɛmaa ye. Bɛyɛle ye zɔhane na ɔvole zolɛ

¹⁴ ɔkpole Nyamenle sonla ne dedee ɔhɔdole ye kɛ ɔde “Oku” baka bie abo. Ɔbizale ye kɛ, “Wɔmɔ a ɛle Nyamenle sonla ne mɔɔ vi Dwuda rale la ɔ?” Ɔbuale kɛ, “Ɛhɛe, medame ɔ”

¹⁵ Nyamenle kpɔmanvolɛ kpanyinli ne zele ye kɛ, “Maa yɛhɔ sua nu yɛhɔkpula yɛ sa.”

¹⁶ Nyamenle sonla ne buale ye kɛ, “Me nee wɔ ɛnrɛhɔ sua nu menrɛhɔli wɔ aleɛ na meanlo wɔ nzule,

¹⁷ ɔluakɛ Ɛdɛnkɛma ɛze me kɛ, ‘Mmadi debie yɛɛ mmano nzule wɔ ɛleka mɔɔ ɛlɛkɔ la, eza mmasia ɛfa adenle ne mɔɔ ɛluale nu ɛhɔle la azo bieko.’ ”

¹⁸ Nyamenle kpɔmanvolɛ kpanyinli ne mɔɔ de Bɛtɛle la buale mɔɔ vi Dwuda la kɛ, “Medame noko mele Nyamenle kpɔmanvolɛ kɛ ɛdawɔ la, na Ɛdɛnkɛma ɛzoa ɛmaa bɛraha bɛhile me kɛ me nee wɔ ɛhɔ sua nu memaa ɛhɔkpula ɛ sa.” Noko ɛnee ɔlɛbɔ adalɛ.

¹⁹ Yemɔti Nyamenle kpɔmanvolɛ ne mɔɔ vi Dwuda rale la nee mɔɔ vi Bɛtɛle la hɔle sua nu na ɔ nee ye bɛkpulale bɛ sa.

²⁰ Mekɛ mɔɔ bɛde aleɛ ne anwo la, Ɛdɛnkɛma edwɛkɛ ne dwule Nyamenle kpɔmanvolɛ ne mɔɔ vale ye rale sua nu la anwo zo,

²¹ na ɔdeanle nuhua ɔzele mɔɔ vi Dwuda la kɛ, “Ɛdɛnkɛma wɔ Nyamenle ne se, wɔandie ye edwɛkɛ na wɔdu ɔ nloa wɔdo!

²² Wɔzia wɔrali aleɛ, wɔnlo nzule wɔ ɛleka mɔɔ ɔduale wɔ kɛ ɛmmadi aleɛ ɛkɛ ne la. Ɛhye ati Ɛdɛnkɛma wɔ Nyamenle ne se, ‘Ɛnrɛwu bɛnrɛzie wɔ wɔ ɛleka mɔɔ bɛziele ɛ ze mɔ la.’ ”

²³ Bɛwiele debie di la, Nyamenle kpɔmanvolɛ kpanyinli ne zieziele asoaso ne manle Nyamenle kpɔmanvolɛ ne mɔɔ vi Dwuda la.

²⁴ Ɔdɛnlanle zolɛ kɛ ɔsia yeahɔ na awenade hyele ye adevinli hunle ye, na asoaso ne nee awenade ne hale funli ne anwo gyinlanle wɔ adenle ne anu.

²⁵ Menli mɔɔ zenle ɛkɛ ne na bɛnwunle kɛ funli ne la adevinli ne na awenade ne gyi nwolɛ la rale Bɛtɛle rabɔle amaneɛ.

²⁶ Nyamenle kpɔmanvolɛ kpanyinli ne dele na ɔhanle kɛ, “Nyamenle kpɔmanvolɛ ne mɔɔ anli Ɛdɛnkɛma edwɛkɛ ne azo la ɔ. Kɛmɔ Ɛdɛnkɛma hanle la, yemaa awenade ɛhu ye.”

²⁷ Akee ɔhanle ɔhilele ɔ mra ne mɔ kɛ, “Bɛziezie me ɛkpɔnwɔ ne bɛmaa me.” Bɛzieziele ɛkpɔnwɔ ne

²⁸ bɛmanle ye na ɔdɛnlanle zolɛ ɔhɔdole Dwuda Nyamenle kpɔmanvolɛ ne funli wɔ adenle ne anu kɛ asoaso ne nee awenade ne tɛgyigyi nwolɛ. Awenade ne ɛtɛdile funli ne yɛɛ ɔtɛkunle asoaso ne noko.

²⁹ Nyamenle kpɔmanvolɛ kpanyinli ne dwule Nyamenle sonla ne funli dole asoaso ne azo, ɔvale ye ɔrale Bɛtɛle sua zo ɔrazunle ye na ɔziele ye.

³⁰ Ɔmanle bɛziele funli ne wɔ ɔdaye ye nla mɔɔ yepɛ la anu na ɔ nee ɔ mra bɛzunle ye kɛ, “O me diema, me diema!”

³¹ Bɛziele ye bɛwiele la Nyamenle kpɔmanvolɛ kpanyinli ne hanle hilele ɔ mra ne mɔ kɛ, “Saa mewu a bɛva me bɛrado Nyamenle sonla ye anwo ɛke, wɔ nla ko ne ala anu.

³² Ɔluakɛ edwɛkɛ mɔɔ Ɛdɛnkɛma manle ɔhanle wɔ Bɛtɛle mɔɔ fane azukponle ne nee Samɛlea azuamgbole ɛleka mɔɔ bɛsonle la anwo la kɔsɔɔti bayɛ zɔhane.”

Gyɛlɔbowam ɛtane kpole ne

³³ Yizilayɛ Belemgbunli Gyɛlɔbowam annu ɔ nwo yeangyakyi ye ninyɛndane ne mɔ ɛyɛlɛ. Ɔhɔle zolɛ ɔvale menli gyɛne mɔɔ ɛnvi Livae abusua ekpunli ne anu la ɔyɛle bɛ sɛlɛvolɛma wɔ ɛleka ɛleka mɔɔ ɔyɛle kɛ bɛzonle bɛ nyamenle ne mɔ la. Awie biala mɔɔ kulo la ɔyɛle ye sɛlɛvolɛ.

³⁴ Ɛtane ɛhye mɔɔ Gyɛlɔbowam yɛle la manle nzinlii ye ebialilɛ ne bɔle aze na ɔ bo zo bɔle bɔkɔɔ.