1 Arl 10 - BAEBOLO ANZƐƐ BULUKU NWUANZANWUANZA

Hyiba Belemgbunli Raalɛ ne kpɔsa Sɔlɔmɔn anwo

¹ Hyiba belemgbunli raalɛ ne dele duma kpole mɔɔ Sɔlɔmɔn ɛnyia ye wɔ Ɛdɛnkɛma duma nu la nganeɛ, yemɔti ɔrale Gyɛlusalɛm kɛ ɔbado Sɔlɔmɔn abɛla mgbole kpalɛ.

² Ɔvale menli dɔɔnwo ɔlile ɔ nzi; ɔvale nwolɛ afunlumu mɔɔ zozo ninyɛne evuanlɛ, ezukoa nvutuke dɔɔnwo kpalɛ, yɛɛ awolɛ mɔɔ sonle bolɛ la ɔrale. Ɔradole Sɔlɔmɔn la ɔbizebizale ye edwɛkɛ dodo biala mɔɔ wɔ ye adwenle nu la.

³ Na Sɔlɔmɔn yeyele bɛ kɔsɔɔti anloa; ko bɔbɔ ɛnle nu mɔɔ hyele Belemgbunli Sɔlɔmɔn ekyii a.

⁴ Hyiba belemgbunli raalɛ ne nwunle Sɔlɔmɔn nrɛlɛbɛ ne na ɔnwunle ye belemgbunli awuke mɔɔ yebu la.

⁵ Akee ɔnwunle aleɛ mɔɔ bɛdi wɔ sua nu ɛkɛ nee ye mgbanyima ne mɔ tɛnlabelɛ nu, kɛ ye sonvolɛma si sonle ye, bɛ adɛladeɛ mɔɔ bɛwula, ye nzasuvolɛma nee ɛyelalɛ azu mɔɔ Sɔlɔmɔn bɔ wɔ Ɛdɛnkɛma Ɛzonlenlɛ Sua ne anu la, ɔzinle ɔ nwo na ɔ nwo bubule ye.

⁶ Ɛhye ati ɔhanle ɔhilele Sɔlɔmɔn kɛ, “Ayi, bɛle nɔhalɛ bɔkɔɔ. Edwɛkɛ mɔɔ fane ɛ nwo nee wɔ nrɛlɛbɛ ne anwo mɔɔ mendele wɔ me maanle nu lɔ la le nɔhalɛ kɔsɔɔ.

⁷ Saa mese kɛ alumua ne mendele la menliele menlile a ɛnee mebɔ adalɛ; meradwu ɛke la yɛɛ melie meli a. Nɔhalɛ, mɔɔ bɛhanle bɛhilele me la ɛndwu mɔɔ medame meranwu ye me nye zo la foa ko bɔbɔ.

⁸ Wɔ mraalɛ anwo ɛyɛ moavolɛ, wɔ sonvolɛma ati ɛyɛ boɛ kɛ dahuu bɛtie wɔ, bɛsonle wɔ na bɛte wɔ nrɛlɛbɛ edwɛkɛ ne mɔ a.

⁹ Ayɛlɛyelɛ ɛha Ɛdɛnkɛma wɔ Nyamenle ne kɛ yehulo wɔ na yemaa bɛva wɔ bɛzie Yizilayɛ belemgbunli ebia ne azo la. Kɛmɔ Ɛdɛnkɛma kulo Yizilayɛma na ɔkulo kɛ bɛtɛnla ɛkɛ dahuu la ati yɛɛ yemaa bɛva wɔ bɛzie belemgbunli a, amaa wɔava pɛlepɛlelilɛ wɔazie bɛ na bɛayɛ tenlenema.”

¹⁰ Akee ɔhyɛle Belemgbunli Sɔlɔmɔn ninyɛne: ezukoa nvutuke mɔɔ bo tone nu kilo apenle nna yɛɛ ninyɛne evuanlɛ mɔɔ bɛfa bɛto aleɛ la dɔɔnwo nee awolɛ mɔɔ sonle bolɛ la. Hyiba belemgbunli raalɛ ne ninyɛne evuanlɛ mɔɔ ɔvale ɔrahyɛle Sɔlɔmɔn la bo ahyɛlɛdeɛ biala mɔɔ sumunli kɛ ɔralile ebia ne la bɛva bɛhyɛ ye la azo.

¹¹ (Yeanga ɛhye mɔ angome, Helam meli ne mɔ mɔɔ vale ezukoa nvutuke vi Ofɛ rale la vale dwunipa mbaka dɔɔnwo nee awolɛ mɔɔ sonle bolɛ la dɔɔnwo rale.

¹² Sɔlɔmɔn vale mbaka ne yɛle sika sosɔle Ɛzonlenlɛ Sua ne nee belemgbunli sua ne na ɔvale bie ɔyɛle getaa mgbole nee ngyikyi ɔmanle edwɛndolɛma. Ɛbɔ ye mekɛ zɔhane mɔɔ bakpula ɛnɛ la, awie ɛtɛnwunle zɛhae dwunipa mbaka ngɛnlɛma ne bie ɛlɛ.)

¹³ Belemgbunli Sɔlɔmɔn noko hyɛle Hyiba belemgbunli raalɛ ne ninyɛne dɔɔnwo; eza debie biala mɔɔ belemgbunli raalɛ ne bizale ye la, ɔvale ɔmanle ye. Akee Hyiba belemgbunli raalɛ ne nee ye menli mɔɔ doa ye la ziale hɔle bɛ maanle nu wɔ Hyiba.

Belemgbunli Sɔlɔmɔn anwonyia ne

¹⁴ Ezukoa nvutuke mɔɔ Sɔlɔmɔn asa ka ye ɛvolɛ ko anu la le tone nu kilo apenle ngoko abulanwiɔ nee nsa.

¹⁵ Ezukoa ɛhye ɛmboka adwule mɔɔ ɔdie ye wɔ gualilɛma lɔ, nee nvasoɛ mɔɔ ɔnyia ɔfi gualilɛ nu, adwule mɔɔ ɔdie ɔfi Areleebea arelemgbunli ɛkɛ ne nee ezukoa mɔɔ ɔnyia ye Yizilayɛ maanle ne anu maanzinli zo neavolɛma ɛkɛ ne la anwo.

¹⁶ Belemgbunli Sɔlɔmɔn manle bɛyɛle bɛ sa nu enyinlike mgbole ɛya nwiɔ na ɔmanle bɛholole ezukoa nvutuke mɔɔ asɛɛ to tone nu kilo nsuu la bɛguale ko biala anwo.

¹⁷ Eza ɔmanle bɛyɛle ngyikyi kɛyɛ ɛya nsa na ɔmanle bɛholole ezukoa nvutuke mɔɔ to kilo nwiɔ la bɛguale ko biala anwo. Ɔmanle bɛvale ɛhye mɔ amuala bɛhɔziele sua ne mɔɔ bɛfɛlɛ ye Lɛbanɔn Kpɔkɛmile la anu.

¹⁸ Eza Sɔlɔmɔn manle bɛzele belemgbunli ebia kpole ko na bɛvale ɛzɛlɛ bɛbetɛbetanle foa ko na bɛholole ezukoa nvutuke kpalɛ noko bɛguale foa ko.

¹⁹ Ebia ne lɛ kpolike nsia mɔɔ bɛfo a bɛtu egyakɛ nsia na bɛahɔdɛnla zolɛ a. Bɛzele ɛnlankɛ tile bɛziele ebia ne anzi anwuma yɛɛ ɔlɛ ɔ sa nwiɔ mɔɔ bɛfa bɛ sa bɛgua zolɛ a.

²⁰ Bɛze awenade nwiɔ bɛziezie ɔ sa nwiɔ ne mɔ azo: ko gyi bɛne zo yɛɛ ko gyi fema zo. Akee awenade bulu nee nwiɔ gyigyi ebia ne kpolike ne mɔ azo; kpolike ko biala ati nee ɔ ti lɛ awenade nwiɔ. Ebia zɛhae, bie ɛnle ewiade ye anu belemgbunli maanle gyɛne biala anu.

²¹ Belemgbunli Sɔlɔmɔn dwora mɔɔ ɔno nuhua la amuala le ezukoa nvutuke ngome yɛɛ ahyɛnze nee nyɛba mɔɔ wɔ sua ne mɔɔ bɛfɛlɛ ye Lɛbanɔn Kpɔkɛmile la anu la amuala le ezukoa nvutuke tagyee. Mekɛ mɔɔ Sɔlɔmɔn di ye ebia ne la ɛnee awie ɛmbu dwɛtɛ fufule, yemɔti yeanva dwɛtɛ fufule yeanyɛ debie biala mɔɔ wɔ ye awuke ne anu la bie.

²² Ɔlɛ meli dɔɔnwo wɔ Tahyehye nyevile zo mɔɔ nee Helam meli ne mɔ a kɔ gualilɛ a. Bɛkɔ a ɛvolɛ nsa biala bɛsia bɛ nee ezukoa nvutuke, dwɛtɛ fufule, ɛzɛlɛ, motimo yɛɛ ahomu ba sua nu.

^23-24 Nyamenle manle Belemgbunli Sɔlɔmɔn nwunle nrɛlɛbɛ, ɔnyianle ɔ nwo ɔdɛlale arelemgbunli kɔsɔɔti, na aleɛabo amra dɔɔnwo pianle rale Sɔlɔmɔn ɛkɛ ne kɛ bɛbadie ye nrɛlɛbɛ edwɛkɛ ne bie.

²⁵ Awie biala mɔɔ rale Sɔlɔmɔn ɛkɛ ne la vale ye ahyɛlɛdeɛ mɔɔ le dwɛtɛ fufule nee ezukoa nvutuke, adɛladeɛ, konle ninyɛne, ninyɛne evuanlɛ mɔɔ bɛfa bɛto aleɛ, alufuanlɛ, mgbɔnwɔ nee mgbɔnwɔndua la rale. Ɛhye hɔle zolɛ ɛvolɛ biala.

²⁶ Sɔlɔmɔn ɛlɔnema lɛ konle ehwili apenle ko ɛya nna yɛɛ mgbɔnwɔ mɔɔ bɛtɛnla zolɛ bɛko la apenle ngoko bulu nee nwiɔ. Ɔvale bie mɔ ɔhɔle azuamgbole ne bie mɔ azo yɛɛ bie mɔ noko wɔ ɔ nwo ɛkɛ ne wɔ Gyɛlusalɛm.

²⁷ Belemgbunli Sɔlɔmɔn mekɛ zo, ɔmanle dwɛtɛ fufule yɛle kɛ awolɛ la wɔ Gyɛlusalɛm, yɛɛ ɔmanle sida mbaka bule kɛ sikamɔ mbaka.

²⁸ Bɛ nee mgbɔnwɔ mɔɔ Sɔlɔmɔn lɛ la vi Muzilae nee Selesea a rale a; belemgbunli ne menli mɔɔ kɔ gualilɛ la a totɔ ba a.

²⁹ Bɛtɔ konle ehwili ko dwɛtɛ fufule ɛya nsia wɔ Yigyibiti yɛɛ ɛkpɔnwɔ ko dwɛtɛ fufule ɛya ko abulanlu na belemgbunli ne gualilɛma ne azia adɔne bɛ amaa Hɛte nee Selea arelemgbunli.