1 Kɔl 8 - BAEBOLO ANZƐƐ BULUKU NWUANZANWUANZA

Amonlezɔlɛ aleɛ nwo kpuyia

¹ Akee meka aleɛ mɔɔ bɛva bɛzɔ amonle la anwo edwɛkɛ. “Yɛ muala yɛlɛ adwenle, yɛze deɛ,” ɔle nɔhalɛ kɛmɔ bɛka la; noko akee bɛ deɛnwunlɛ zɛhae sɛkye bɛ; ɛhulolɛ a maa ngɔzo a.

² Sonla mɔɔ dwenle kɛ ɔze deɛ la, ɛnze mɔɔ ɔwɔ kɛ ɔnwu ye la.

³ Awie mɔɔ kulo Nyamenle la, Nyamenle ze ye.

⁴ Zɔhane ati, mɔɔ fane aleɛ mɔɔ bɛva bɛzɔ amonle la ɛlilɛ nwo, yɛze kɛ amonle ɛnle debie biala, yɛɛ nyamenle biala ɛnle ɛkɛ ne kɛ Nyamenle kokye ne ala.

⁵ Na saa bɔbɔ nyamenle bie mɔ wɔ anwuma anzɛɛ azɛlɛ ye azo, kɛmɔ nɔhalɛ “nyamenle nee awulae mɔ” bie dɔɔnwo wɔ ɛkɛ ne la,

⁶ yɛmɛ yɛze Nyamenle kokye ne ala, yemɔ a le Selɛ ne mɔɔ bɔle ninyɛne kɔsɔɔti na yɛde aze yɛmaa ye la; yɛɛ Awulae ko, Gyisɛse Kelaese, mɔɔ ɔlua ɔ nwo zo a bɛbɔle ninyɛne kɔsɔɔti na ɔlua ɔ nwo zo yɛde aze la.

⁷ Noko tɛ menli ne amuala a lɛ nɔhalɛ deɛnwunlɛ ɛhye a. Amonlezɔlɛ ɛli menli bie mɔ adwenle ɛmaa ɛnɛ nee ɛnɛ ala saa bɛdi aleɛ zɛhae mɔ bie a ɛnee bɛdwenle nwolɛ kɛ asɛɛ amgba ɔle aleɛ mɔɔ bɛva bɛzɔ “nɔhalɛ” amonle a. Ɔba ye zɛhae a ɛnee kɛmɔ bɛ adwenle ɛtɛtinle la ati, bɛfa ye kɛ aleɛ ne gua bɛ nwo evinli.

⁸ Nɔhalɛ, aleɛ ɛnrɛva yɛ ɛnrɛdwu Nyamenle anyunlu. Yemɔti saa yɛanli a yɛnrɛminli debie biala, yɛɛ saa yɛdi noko a yɛnrɛnyia nvasoɛ biala.

⁹ Noko bɛnlea boɛ na bɛ fanwodi nyɛleɛ ɛhye ammaa bɛdabɛ mɔɔ bɛ diedi ɛtɛtinle la andu koti.

¹⁰ Ɔluakɛ saa awie mɔɔ ye adwenle ɛtɛtinle wɔ edwɛkɛ ɛhye mɔ anu la nwu wɔmɔ mɔɔ ɛze deɛ la kɛ ɛlɛdi aleɛ wɔ amonle sua bo a, asoo ɛhye ɛnrɛzuhu ɔ kɔme anzi ɛnrɛmaa ɔnrɛli aleɛ mɔɔ bɛva bɛzɔ amonle la?

¹¹ Saa ɔba ye zɛhae a ɛnee wɔ “deɛnwunlɛ” ne bamaa sonla ɛhye mɔɔ le ɛ diema mɔɔ yemɔti Kelaese wule la aminli.

¹² Nwu ye kɛ mɔɔ ɛlɛyɛ ɛtane zɛhae wɔatia ɛ mediema ne mɔ, na ɛlɛsɛkye bɛ adwenle la, ɛnee ɛlɛyɛ ɛtane wɔatia Kelaese.

¹³ Yemɔti, saa aleɛ zɛhae kɛmaa me diema bie kɛkpo aze a, ɛnee menrɛli aleɛ zɔhane bieko na aloa abɔ, amaa me diema bie anyɛ ɛtane.