1 Kɔl 6 - BAEBOLO ANZƐƐ BULUKU NWUANZANWUANZA

Mediema manzonle ɛhwenlɛ

¹ Duzu ati bɔbɔ yɛɛ saa bɛ nuhua bie nee ɔ diema nyia edwɛkɛ a ɛnee ɔkɛva ye ɔkɛhɔ kɔɔto ɔkɛhɔmaa ewiade ndɛnebuavolɛma, na ɔmmaa Nyamenle menli ne ɛnziezie ɛ?

² Bɛnze kɛ Nyamenle menli ye ala a babua ewiade amra ndɛne a? Na saa bɛmɛ a bɛbabua ewiade amra ndɛne a, ɛnee duzu ati a bɛngola edwɛkɛ ngyikyi ɛhye mɔ siezie ɛ?

³ Asoo bɛnze kɛ yɛmɛ a yɛbabua anwuma soanvolɛma bɔbɔ ndɛne a? Na kɛ ɔyɛ mɔɔ akee azɛlɛ ye azo edwɛkɛ yɛngola yɛnli a?

⁴ Saa ɔle zɛhae a ɛnee edwɛkɛ ɛhye mɔ bie si a, duzu ati a bɛfa bɛkɔmaa menli mɔɔ asɔne ye ɛmbu bɛ bie la siezie ɛ?

⁵ Bɛbɔ anyiemgba bɔbɔ! Asoo amgba ala nrɛlɛbɛvolɛ ko bɔbɔ ɛnle bɛ asɔne ne anu, mɔɔ kola siezie mediema avinli,

⁶ mɔɔ yemɔti adiema fa adiema kɔ kɔɔto kɔmaa bɛdabɛ mɔɔ bɛnlie Edwɛkpa ne bɛnli la bua bɛ ndɛne a?

⁷ Saa bɛ nee bɛ gɔnwo mɔ twe manzonle bɔbɔ a ɛnee noko bɛha aze. Duzu ati a bɛngulo kɛ awie kɛvo bɛ ɛ? Duzu ati a bɛngulo kɛ awie kɛsisi bɛ ekyii ɛ?

⁸ Na akee bɛmɛ bɛdabɛ bɛsisi bɛ nwo, bɛdi bɛ nwo amile, bɛyɛ ɛhye dedee bɛfa bɛyɛ bɛ mediema Keleseɛnema bɔbɔ!

⁹ Nɔhalɛ, bɛze kɛ amumuyɛma ɛnrɛnyia Nyamenle Belemgbunlililɛ ne. Bɛmmabɛlɛbɛla bɛ nwo; menli mɔɔ bɔ ɛbɛla mgbane mgbane, bɛdabɛ mɔɔ bɛsonle awozonle, bɛfa nwuvolɛ, mrenya mɔɔ fa bɛ gɔnwo mɔ mrenya nee mraalɛ mɔɔ fa mraalɛ,

¹⁰ bɛdabɛ mɔɔ bɛle nwule, bɛle anyebolo, bɛdabɛ mɔɔ nza ɛgya bɛ, bɛdabɛ mɔɔ bɛ nloa ɛdendɛlɛ ɛnyɛ fɛ nee bɛdabɛ mɔɔ bɛle ahɔdiawu la, biala ɛnrɛnyia Nyamenle Belemgbunlililɛ ne.

¹¹ Kɛ ɛnee bɛ bie mɔ de la ɛne. Na Awulae Gyisɛse Kelaese duma ne ati nee Nyamenle Sunsum Nwuanzanwuanza ne ati, bɛbia bɛ; bɛde bɛ nwo bɛvi ɛtane nwo, na bɛmaa bɛzɔ Nyamenle anye.

Bɛva bɛ sonlabaka ne bɛde Nyamenle anyunlu

¹² Wɔannea a awie baha kɛ, “Melɛ adenle meyɛ debie biala.” Ɔle zɔhane, noko tɛ nyɛleɛ ne amuala a le kpalɛ a. Mekola meka kɛ, “Melɛ adenle meyɛ debie biala,” noko menrɛmaa debie biala adenle menrɛmaa ɔnrɛva me ɔnrɛyɛ ye akɛlɛ.

¹³ Awie noko bahola aha kɛ, “Bɛbɔle aleɛ bɛmanle ɛkolɛ, yɛɛ bɛbɔle ɛkolɛ bɛmanle aleɛ.” Ɔle zɔhane, noko Nyamenle bazɛkye bɛ mu nwiɔ. Bɛmmafa bɛ sonlabaka ne bɛbɔ ɛbɛla mgbane mgbane biala; bɛva bɛzonle Awulae. Awulae a maa sonlabaka ne mɔɔ ɔhyia nwo la a.

¹⁴ Nyamenle a dwazole Awulae vile ewule nu a, na ɔlua ye tumi ne azo ɔbadwazo yɛdayɛ noko yeavi ewule nu.

¹⁵ Bɛnze kɛ bɛ sonlabaka ne mɔ le Kelaese ɛdeɛ ne nvɛyeba nvɛyeba mɔɔ bɔ nu yɛ Awulae sonlabaka ne la ɔ? Asoo menva Kelaese sonlabaka ne nvɛyeba membɔ tuutuu ɛbɛla? Nyamenle ɛkpa ɛgua!

¹⁶ Anzɛɛ bɛnze kɛ awie mɔɔ kɛva ɔ nwo kɛha tuutuunli la nee ye bɛ mu nwiɔ bɛyɛ nwonane ko ɔ? Nyamenle Edwɛkɛ ne kpakye nu ka ye wienyi kɛ, “Bɛ mu nwiɔ bɛkɛyɛ nwonane ko.”

¹⁷ Mɔɔ fa ɔ nwo beta Awulae la nee ye yɛ ko wɔ Sunsum nu.

¹⁸ Bɛgyakyi ɛbɛla mgbane mgbane ɛbɔlɛ. Ɛtane biala mɔɔ sonla yɛ la ɛnga ye sonlabaka ne; na awie biala mɔɔ kɛbɔ adwɔmane ɛbɛla la yɛ ɛtane tia ɔdaye ye sonlabaka ne.

¹⁹ Asoo bɛnze kɛ bɛ sonlabaka ne le Sunsum Nwuanzanwuanza ne mɔɔ Nyamenle ɛva ɛmaa bɛ na ɔde bɛ nu la ɛzonlenlɛ sua? Bɛdabɛ bɛnlɛ bɛ nwo; bɛle Nyamenle ɛdeɛ.

²⁰ Ɔdɔle bɛ bolɛ ɛsesebɛ. Yemɔti, bɛva bɛ sonlabaka ne bɛde Nyamenle anyunlu.