1 Kɔl 4 - BAEBOLO ANZƐƐ BULUKU NWUANZANWUANZA

Kelaese ɛzoanvolɛma

¹ Ɔwɔ kɛ bɛbu yɛ kɛ Kelaese sonvolɛma mɔɔ nea Nyamenle gyima ne mɔɔ vea la azo a.

² Debie ko mɔɔ ɔwɔ kɛ sonvolɛ zɛhae yɛ la a le kɛ ɔkɛli nɔhalɛ ɔkɛmaa ɔ menle ne.

³ Mame, ɔnvane me nwo kɛ saa bɛmɛ o, anzɛɛ awie biala kɛbua me ndɛne. Medame bɔbɔ membua me nwo ndɛne.

⁴ Me ti anu wienyi; debie biala ɛntia me, noko ɛhye ɛngile kɛ amgba medi benle. Awulae angome a bua me ndɛne a.

⁵ Yemɔti bɛmmabua awie biala ndɛne kɔkpula Kenle ne mɔɔ Awulae kɛra bieko la. Awieleɛ ndɛnebualɛ ne wɔ Awulae asa anu, yemɔ yɛɛ ɔbaraye ninyɛne mɔɔ vea awozinli nu nee ahonle nu nzuzulɛ muala yeavinde wienyi nu a. Zɔhane mekɛ ne awie biala asa baha ye moyɛlɛ mɔɔ fɛta la avi Nyamenle ɛkɛ.

⁶ Me mediema, ɔlua bɛ ti yɛɛ meva Apɔlɔso nee medame mumua ne medo edwɛkɛ nwo meha a, amaa bɛazukoa yɛ na bɛanyɛ bɛammaa yeandɛla mɔɔ bɛhɛlɛ bɛdo ɛkɛ ne la. Bɛ nuhua biala mmafa awie ko pɛ ɔ gɔnwo anye zo.

⁷ Nwane a zele bɛ kɛ bɛle kpalɛ bɛtɛla bɛ gɔnwo mɔ a? Tɛ Nyamenle a manle bɛ mɔɔ bɛlɛ la amuala ɔ? Saa ɔle zɔhane a, ɛnee duzu ati a bie kɛmemaa ɔ nwo zo kɛ asɛɛ mɔɔ ɔlɛ la ɛnle Nyamenle ahyɛlɛdeɛ ɛ?

⁸ Bɛ sa ɛdɔ bɛ kunlu! Bɛnyia bɛ nwo bɛwie! Bɛhoane yɛ nwo bɛyɛ arelemgbunli! Me kunlu bɔbɔ a anrɛɛ bɛle arelemgbunli amgba, amaa yɛ nee bɛ ali bɛ mbia ne mɔ.

⁹ Ɔluakɛ ɔyɛ me kɛ Nyamenle ɛva yɛmɛ ɛzoanvolɛma ɛzie ɛkɛ, kɛ menli mɔɔ bɛbu bɛ ewule fɔlɛ na nzinlii bɛbahu bɛ bagua nu bɛahile ɛtane ewiade ye, anwuma soanvolɛma nee menli muala la.

¹⁰ Kelaese ati yɛyɛ ahɔnwɔne; na bɛmɛ, bɛle nrɛlɛbɛvolɛma. Yɛle bɛtɛɛ na bɛmɛ, bɛ nwo yɛ se. Menli ɛmbu yɛ, noko bɛdi bɛmɛ eni.

¹¹ Ɛnɛ nee ɛnɛ ala ɛhɔne nee nzuhɔne tɛku yɛ; yɛ adɛladeɛ ɛtete yɛ nwo, bɛbila yɛ mbaka, yɛnlɛ awuke, mgbɔsa mgbɔsa a ɛdɔ yɛ nwo a;

¹² yɛyɛ gyima ɛsesebɛ, yɛɛ yɛpe na yɛali. Bɛwa yɛ amonle a, yɛyila bɛ; bɛyɛ yɛ kpɔdekpɔde a, yɛkponle zolɛ.

¹³ Bɛyɛ yɛ aholoba a, yɛtendɛ kpalɛ yɛkile bɛ. Yɛyɛ ewula wɔ ewiade ye anu; ɛnɛ nee ɛnɛ ala yɛle ewiade amra fovolɛ.

¹⁴ Mengɛlɛ ɛhye kɛ megua bɛ nyunlu aze; mefa meadu bɛ folɛ kɛ bɛle me mra mɔɔ mekulo bɛ edwɛkɛ a.

¹⁵ Saa Kelaese ati bɛlɛ adanedivolɛma apenle bulu bɔbɔ a, bɛnwu ye kɛ bɛ ze kokye. Ɔlua Edwɛkpa ne mɔɔ menvale membɛlɛle bɛ la ati, merayɛ bɛ ze wɔ Kelaese ati.

¹⁶ Yemɔti mesɛlɛ bɛ, bɛva me gyakɛ.

¹⁷ Ɛhye ala ati a melɛsoa Temɔte, mɔɔ le me ra mɔɔ mekulo ye, na Awulae ati ɔdi nɔhalɛ la wɔ bɛ nwo lɔ a. Ɔbahakyehakye bɛ ɛbɛla ɛbɔlɛ fofolɛ ndenle ne mɔ mɔɔ Kelaese ati melua nu melɛkilehile asɔne ne mɔ mɔɔ wɔ ɛleka biala la.

¹⁸ Bɛ nuhua bie mɔ ɛlɛtu bɛ nloa anu na bɛdwenle kɛ menrɛra lɔ bieko.

¹⁹ Saa ɔyɛ Nyamenle ɛhulolɛ a ɔnrɛhyɛ, mebara bɛ nwo lɔ na mearavedevede nu meanlea tumi mɔɔ bɛdabɛ mɔɔ bɛlɛtu bɛ nloa anu la lɛ la, na tɛ mɔɔ bɛlɛkeha la ɔ.

²⁰ Ɔluakɛ Nyamenle Belemgbunlililɛ ne ɛngyi ɛdendɛlɛ zo, ɔgyi tumi zo.

²¹ Boni a bɛkulo a? Saa melɛba a menva empele membɛla anzɛɛ menva sunsum nu ɛhulolɛ nee bɛtɛɛyɛlɛ membɛla?