1 Kɔl 15 - BAEBOLO ANZƐƐ BULUKU NWUANZANWUANZA

Kelaese ewudwazo ne

¹ Mediema, akee metwe bɛ adwenle meara Edwɛkpa ne mɔɔ membɔle ye nolo mengilele bɛ a bɛliele bɛdole nu na bɛ diedi gyi zo la azo.

² Saa bɛsɔ nu ɛsesebɛ a bɛkɛnyia ngoane mɔɔ ɛnlɛ awieleɛ; kyesɛ bɛanlie bɛanli.

³ Edwɛkɛ ne mɔɔ menvale membɛlɛle bɛ la le edwɛkɛ mɔɔ hyia kpalɛ. Yɛ ɛtane ti yɛɛ Kelaese wule a, kɛmɔ Nyamenle Edwɛkɛ ne kile la.

⁴ Bɛziele ye na ye kenle nsa ne azo, Nyamenle dwazole ye rale ngoane nu, kɛmɔ Nyamenle Edwɛkɛ ne se la.

⁵ Ɔyele ɔ nwo ɔhilele Pita, na nzinlii ɔyele ɔ nwo ɔhilele ɛzoanvolɛma bulu nee nwiɔ ne.

⁶ Eza kenle ko bie ɔyele ɔ nwo ɔhilele ye ɛdoavolɛma mɔɔ bo ɛya nnu mɔɔ bɛ nuhua dɔɔnwo ne ala tɛte aze la, bie mɔ ɛwu bɔbɔ ɛdeɛ.

⁷ Akee ɔyele ɔ nwo ɔhilele Gyemise yɛɛ ɛzoanvolɛma ne mɔ amuala.

⁸ Awieleɛ ne, ɔyele ɔ nwo ɔhilele medame noko, medame zɛhae ala, mɔɔ mele kɛ kyɛkyɛ ralɛ la.

⁹ Ɔluakɛ medame a mele ɛzoanvolɛma ne mɔ anu ekyi kpalɛ kpalɛ, mɔɔ menfɛta kɛ bɛkɛvɛlɛ me ɛzoanvolɛ a, ɔboalekɛ menyɛle Nyamenle menli ne kpɔdekpɔde.

¹⁰ Noko ɔlua Nyamenle ɛlolɛ ne ati, merayɛ kɛmɔ mede la. Ye ɛlolɛ ne mɔɔ ɔvale ɔlole me la anyɛ gyɛne, ɔluakɛ meyɛ gyima kpalɛ medɛla ɛzoanvolɛma mɔɔ ɛha la amuala, noko tɛ medame me mɔdenlebɔ ɔ, Nyamenle ɛlolɛ ne mɔɔ wɔ me nwo zo la ɔ.

¹¹ Ɛhye ati, saa mame o anzɛɛ bɛmɛ o, edwɛkɛ ko ne ala a yɛ muala yɛbɔ ye nolo a, yɛɛ yemɔ noko ala a bɛlie bɛli la.

Yɛ ewudwazo ne

¹² Saa kɛkala yɛ nolobɔlɛ a le kɛ Nyamenle ɛdwazo Kelaese ɛvi ewule nu a, ɛnee kɛ ɔsi mɔɔ bɛ bie mɔ kola ka kɛ bɛnrɛdwazo mɔwuamra bɛnrɛra ngoane nu ɛ?

¹³ Na saa ɔle zɔhane kɛ ewudwazo ɛnle ɛkɛ ne a, ɛnee Nyamenle ɛtɛdwazole Kelaese;

¹⁴ yɛɛ saa Nyamenle ɛtɛdwazole Kelaese ɛtɛfile ewule nu a, ɛnee yɛ nolobɔlɛ ne le mgbane, yɛɛ bɛdabɛ noko bɛ diedi ne le mgbane.

¹⁵ Yeanga ye zɔ, saa ɔnle nɔhalɛ kɛ bɛdwazo mɔwuamra bɛba ngoane nu a, ɛnee yɛdo Nyamenle ɛzonle, ɔluakɛ yɛli daselɛ kɛ Nyamenle ɛdwazo Kelaese ɛvi ewule nu, wɔ mekɛ mɔɔ yeanyɛ ye zɔhane la.

¹⁶ Ɔluakɛ saa Nyamenle ɛndwazo mɔwuamra a, ɛnee ɔtɛdwazole Kelaese.

¹⁷ Na saa Nyamenle ɛtɛdwazole Kelaese a, ɛnee bɛ diedi ne le mgbane na bɛtɛte bɛ ɛtane ne mɔ anu;

¹⁸ yɛɛ bɛdabɛ mɔɔ bɛdie Kelaese bɛdi na bɛwu la ɛminli.

¹⁹ Saa ngoane ɛhye anu ala yɛɛ yɛlɛ anyelazo wɔ Kelaese anu a, ɛnee noko yɛyɛ anwunvɔne kpole kpalɛ yɛtɛla menli kɔsɔɔti.

²⁰ Na nɔhalɛ ne a le kɛ Nyamenle ɛdwazo Kelaese ɛvi ewule nu, na ɛhye maa yɛsi pi kɛ Nyamenle badwazo bɛdabɛ mɔɔ bɛwu la amuala.

²¹ Ɔluakɛ kɛmɔ ewule luale sonla ko anwo zo a rale la, zɔhane ala yɛɛ ewudwazo ne lua sonla ko anwo zo ɛra a.

²² Kɛmɔ menli kɔsɔɔti dua Adam anwo zo wu la, zɔhane ala yɛɛ Nyamenle balua Kelaese anwo zo adwazo bɛ muala ara ngoane nu a.

²³ Bɛdwazo awie biala wɔ ye mekɛ nloa: Kelaese a lumua a, na akee saa ɔdwu ye ɛralɛ bieko a bɛadwazo bɛdabɛ mɔɔ bɛle Kelaese ɛdeɛ la.

²⁴ Akee awieleɛ mekɛ ne bara na Kelaese bali mgbolema, tumivolɛma nee arelemgbunli kɔsɔɔti anwo zo konim, na yeava Belemgbunlililɛ ne yeawula Nyamenle Selɛ ne asa anu.

²⁵ Ɔluakɛ ɔwɔ kɛ Kelaese di belemgbunli kɔkpula kɛ Nyamenle kɛli ye agbɔvolɛ amuala anwo zo konim na ɔkɛva bɛ ɔkɛwula ɔ gyakɛ abo la.

²⁶ Kpɔvolɛ mɔɔ li amozi mɔɔ bɛbazɛkye ye la a le ewule.

²⁷ Ɔluakɛ Nyamenle Edwɛkɛ ne se, “Nyamenle ɛva ninyɛne kɔsɔɔti ɛwula ɔ gyakɛ abo.” Ɔle nɔhalɛ wienyi kɛ saa bɛka kɛ “bɛva ninyɛne kɔsɔɔti bɛwula ɔ gyakɛ abo” a, ɛnee ɔngile kɛ Nyamenle mɔɔ yemɔ a ɛva ninyɛne kɔsɔɔti ɛwula Kelaese agyakɛ abo la noko boka nwolɛ.

²⁸ Saa bɛfa ninyɛne kɔsɔɔti bɛwula Kelaese belemgbunlililɛ ne abo a, akee ɔdaye Ralɛ mumua ne, ɔbava ɔ nwo yeawula Nyamenle mɔɔ vale ninyɛne kɔsɔɔti wulale ɔ bo la abo, amaa Nyamenle ali ninyɛne kɔsɔɔti azo belemgbunli.

²⁹ Saa mɔɔ bɛka la le nɔhalɛ, kɛ bɛndwazo mɔwuamra bɛmba ngoane nu a, ɛnee bɛdabɛ mɔɔ bɛgyinla mɔwuamra agyakɛ anu bɛmaa bɛzɔne bɛ la, duzu a bɛ nye la zolɛ a?

³⁰ Saa bɛndwazo mɔwuamra a, ɛnee duzu ati a menwɔva me ngoane menwɔdo nzeleba dɔnehwele biala ɛ?

³¹ Meka ko ɛhye, mediema! Yɛ Awulae Gyisɛse Kelaese ati, ewule sianle me dahuu wɔ me nwo mɔɔ metu ye wɔ bɛ nwo la anwo.

³² Saa mele sonla ala, mɔɔ menlɛ anyelazo biala wɔ ewule nzi, yɛɛ me nee “ɛhoayelɛ nu nanemgbole” honle wɔ Ɛfɛsɛse a, ɛnee duzu nvasoɛ a menyia ye a? Saa Nyamenle ɛndwazo mɔwuamra ɛmba ngoane nu a, ɛnee kɛmɔ ɔyɛ a bie mɔ ka la, “Bɛmaa yɛli na yɛnlo, ɔluakɛ ɛhyema ɛnee yɛwu.”

³³ Bɛmmamaa bɛbɛlɛbɛla bɛ, “Agɔnwolɛ ɛtane sɛkye ɛbɛla kpalɛ.”

³⁴ Bɛzia bɛ nzi bɛva adwenle kpalɛ na bɛgyakyi ɛtaneyɛlɛ. Ɔyɛ anyiemgba bɔbɔ kɛ menwɔha kɛ bɛ bie mɔ ɛnze Nyamenle a.

Ewudwazo ne sonlabaka

³⁵ Awie babiza kɛ, “Kɛ Nyamenle si dwazo mɔwuamra ba ngoane nu ɛ? Na duzu nwonane a bɛbava bɛadwazo a?”

³⁶ Kɔnwɔne! Ɛdua ma na ɔtɛkpɔlɔle a ɔnfifi.

³⁷ Ma ne mɔɔ ɛkɛlua la, tɛ yemɔ a le baka mumua ne mɔɔ bafifi la. Ɔle ma ala, bie a ɛnee abɛlɛ ma anzɛɛ atoko ma anzɛɛ baka gyɛne bie ma ɔ.

³⁸ Nyamenle a maa ma ne baka holɛ ko mɔɔ ɔkulo la a; ɔmaa ma ko biala ati anwo baka kpalɛ.

³⁹ Nwonane kɔsɔɔti ɛnle ko. Asolo sonla nwonane, asolo nane nwonane, asolo nloma nwonane, yɛɛ asolo fɛlɛ nwonane.

⁴⁰ Anwomanyunlu abɔdeɛ wɔ ɛkɛ yɛɛ azɛlɛ ye azo abɔdeɛ wɔ ɛkɛ. Asolo anwomanyunlu abɔdeɛ ne mɔ ngɛnlɛma yɛɛ asolo azɛlɛ ye azo abɔdeɛ ne mɔ ngɛnlɛma.

⁴¹ Asolo sɛnzɛne ne kɛnlɛma, asolo siane ne kɛnlɛma, yɛɛ asolo nwɔlɔra noko ngɛnlɛma; eza asolo ɛwɔlɔra ko biala bɔbɔ nee ye kɛnlɛma.

⁴² Saa bɛdwazo mɔwuamra bɛba ngoane nu a kɛ ɔbayɛ la ɛne. Mɔɔ bɛlua la kpɔlɔ, mɔɔ Nyamenle dwazo ye ba ngoane nu la ɛmkpɔlɔ.

⁴³ Bɛdua ye anyiemgba nu; Nyamenle dwazo ye anyunlunyia nu. Bɛdua ye anwobɛlɛlɛ nu; Nyamenle dwazo ye tumi nu.

⁴⁴ Bɛsie ye nwonane nu sonlabaka; Nyamenle dwazo ye sunsum nu sonlabaka. Saa nwonane nu sonlabaka wɔ ɛkɛ a, ɛnee sunsum nu sonlabaka wɔ ɛkɛ.

⁴⁵ Ɔluakɛ Nyamenle Edwɛkɛ ne se, “Nyamenle bɔle sonla mɔɔ lumua, mɔɔ le Adam, manle ɔrayɛle ɛkɛla mɔɔ de aze a.” Na Adam ne mɔɔ li amozi la le Nyamenle Sunsum mɔɔ maa ngoane a.

⁴⁶ Tɛ sunsum nu sonlabaka ne a dumua ba a. Nwonane nu sonlabaka ne dumua ba, na akee sunsum nu sonlabaka ne adoa ye.

⁴⁷ Ndɛtɛlɛ a Nyamenle vale bɔle sonla ne mɔɔ lumua la a, na sonla ne mɔɔ tɔ zolɛ nwiɔ la vi anwuma a rale a.

⁴⁸ Bɛdabɛ mɔɔ bɛle azɛlɛ ye azo amra la le kɛ sonla ne mɔɔ Nyamenle vale ndɛtɛlɛ bɔle ye la, yɛɛ bɛdabɛ mɔɔ bɛle anwuma amra la le kɛ sonla ne mɔɔ vi anwuma rale la.

⁴⁹ Kɛmɔ yɛle kɛ sonla ne mɔɔ Nyamenle vale ndɛtɛlɛ bɔle ye la, zɔhane ala yɛɛ yɛbayɛ kɛ sonla ne mɔɔ vi anwuma rale la a.

⁵⁰ Mediema, mɔɔ mekpondɛ meaha la a le kɛ, nwonane nee mogya ɛngola ɛnnyia Nyamenle Belemgbunlililɛ ne, yɛɛ debie mɔɔ kpɔlɔ la ɛngola ɛnnyia mɔɔ ɛmkpɔlɔ la.

^51-52 Bɛdie fealeranu edwɛkɛ ɛhye: yɛ muala yɛnrɛwu. Saa bɛbɔ aweɛne tendenle ne mɔɔ li amozi la anu a, yɛ nye zo katete yɛ la ɛnee Nyamenle ɛhakyi yɛ ɛwie. Ɔluakɛ bɛbɔ aweɛne tendenle ne anu a, Nyamenle badwazo mɔwuamra, mɔɔ bɛnwu bieko ɛlɛ a, na bɛahakyi yɛ muala mɔɔ yɛha la.

⁵³ Ɔluakɛ ɔwɔ kɛ sonla nwonane ɛhye mɔɔ kpɔlɔ la kakyi yɛ debie mɔɔ ɛmkpɔlɔ ɛlɛ a, yɛɛ ɔwɔ kɛ sonla nwonane ɛhye mɔɔ wu la kakyi yɛ debie mɔɔ ɛnwu ɛlɛ a.

⁵⁴ Yemɔti saa nwonane mɔɔ kpɔlɔ la kakyi yɛ mɔɔ ɛmkpɔlɔ ɛlɛ la, na nwonane mɔɔ wu la kakyi yɛ mɔɔ ɛnwu ɛlɛ la a, ɛnee Nyamenle Edwɛkɛ ne bayɛ nɔhalɛ kɛ, “Bɛzɛkye ewule! Bɛli ɔ nwo zo konim bɔkɔɔ!

⁵⁵ Ewule, wɔ konimlilɛ ne wɔ ni? O, Ewule, wɔ bɔlɔ ne wɔ ni?”

⁵⁶ Ewule bɔlɔ a le ɛtane, yɛɛ ɛtane tumi ne vi mɛla ne anu.

⁵⁷ Na yɛyɛ Nyamenle mo kɛ ɔdua yɛ Awulae Gyisɛse Kelaese anwo zo ɔmaa yɛdi konim a!

⁵⁸ Zɔhane ati, me mediema kulovolɛma, bɛgyinla kpundii kpalɛ. Bɛmaa bɛ nye ɛbolo Awulae gyima ne ɛyɛlɛ nwo, na bɛnwu ye kɛ Awulae ati bɛ ɛvɛlɛ ɛnrɛyɛ gyɛne.