Biblia Todo Logo
အွန်လိုင်း သမ္မာကျမ်းစာ

- ကြော်ငြာတွေ -

1 Kɔl 12 - BAEBOLO ANZƐƐ BULUKU NWUANZANWUANZA


Sunsum Nwuanzanwuanza ne ahyɛlɛdeɛ ne mɔ

1 Me mediema, mekpondɛ kɛ bɛnwu nɔhalɛ ne mɔɔ fane Sunsum Nwuanzanwuanza ne ahyɛlɛdeɛ ne mɔ mɔɔ bɛhɛlɛle me nwolɛ la anwo.

2 Bɛze kɛ mekɛ mɔɔ ɛnee bɛnze Nyamenle la, awie mɔ vale adenle bie azo manle bɛzɔle mmonle mɔɔ ɛndendɛ la.

3 Zɔhane ati ɔwɔ kɛ bɛnwu ye wienyi kɛ awie biala mɔɔ Nyamenle Sunsum ne wɔ ye nu la ɛngola ɛnga kɛ “Munzule ɛha Gyisɛse!” Yɛɛ awie biala noko ɛngola ɛnga kɛ “Gyisɛse le Awulae”, kyesɛ Sunsum Nwuanzanwuanza ne de ye nu.

4 Sunsum nu ahyɛlɛdeɛ ne mɔ le ngakyile dɔɔnwo, noko Nyamenle Sunsum ko ne ala a fa maa a.

5 Ɛzonlenlɛ ndenle ngakyile dɔɔnwo wɔ ɛkɛ, noko yɛsonle Awulae kokye ne ala.

6 Anwosesebɛ mɔɔ bɛfa bɛyɛ gyima ngakyile dɔɔnwo la wɔ ɛkɛ, noko Nyamenle ko ne ala a maa awie biala anwosesebɛ maa ɔfa ɔsonle a.

7 Nyamenle Sunsum ne da ɔ nwo ali wɔ adenle bie anu wɔ yɛ nuhua ko biala nu wɔ yɛ muala yɛ kpalɛ ti.

8 Nyamenle Sunsum ne maa bie ka nrɛlɛbɛ edwɛkɛ, yɛɛ ɔmaa bie adwenle nu buke.

9 Nyamenle Sunsum ko ne ala maa bie diedi nyi yɛɛ ɔmaa bie tumi ɔfa ɔyɛ ayile.

10 Nyamenle Sunsum ne maa bie tumi maa ɔyɛ nwanwane ninyɛne yɛɛ ɔmaa bie ahyɛlɛdeɛ mɔɔ ɔfa ɔbɔ Nyamenle edwɛkɛ ne nolo a; ɔmaa bie ɛnyelɛ mɔɔ ɔkola ɔfa ɔnwu ahyɛlɛdeɛ ne mɔ mɔɔ vi Nyamenle Sunsum ne ɛkɛ ne nee mɔɔ ɛnvi ye ɛkɛ ne la. Nyamenle Sunsum ne maa bie tendɛ aneɛ ngakyile, yɛɛ ɔmaa bie noko tumi mɔɔ ɔkola ɔkile mɔɔ bɛka la abo.

11 Nyamenle Sunsum ko ne ala a yɛ ɛhye mɔ amuala a; Sunsum ko ne ala a maa awie biala ahyɛlɛdeɛ, kɛmɔ ɔdaye (Sunsum ne) ɔkulo la a.


Sonlabaka ne lɛ nvɛyeba nvɛyeba

12 Kɛmɔ sonlabaka ne le ko na ye nvɛyeba ne mɔ zonle, na biala le ngakyile la, zɔhane ala yɛɛ Kelaese de a.

13 Zɔhane ala yɛɛ bɛlua Nyamenle Sunsum ne azo bɛzɔne yɛ muala, bɛyɛ yɛ sonlabaka ko, na bɛmaa yɛ muala, Dwuuma nee bɛdabɛ mɔɔ bɛnle Dwuuma, ahanra nee alehelɛ, Nyamenle Sunsum ko ne ala a.

14 Sonlabaka ne nvɛyeba ne mɔ zonle. Ɔnle kokye.

15 Na saa egyakɛ ka kɛ, “Menle ɛsalɛ, yemɔti memboka sonlabaka ne anwo” a, ɛnee ɛhye ɛngile kɛ amgba ɔmboka sonlabaka ne anwo,

16 yɛɛ saa ɛnzolɛ ka kɛ, “Menle ɛnyelɛ, yemɔti memboka sonlabaka ne anwo” a, ɛnee ɛhye ɛngile kɛ amgba ɔmboka sonlabaka ne anwo.

17 Saa sonlabaka ne kpokpoti le ɛnyelɛ a, kɛ ɔkɛyɛ na yeade edwɛkɛ ɛ? Saa sonlabaka ne kpokpoti le ɛnzolɛ a, kɛ ɔkɛyɛ na yeade nvoanle ɛ?

18 Na kɛ ɔde la a le kɛ Nyamenle hulole yɛɛ ɔvale nvɛyeba ngakyile dɔɔnwo ɔbɔle sonla a.

19 Saa bɛ muala bɛle debie ko ala a, anrɛɛ bɛnvɛlɛ ye sonlabaka.

20 Na kɛ ɔde la a le kɛ sonlabaka ne lɛ nvɛyeba dɔɔnwo, noko ɔle sonlabaka kokye.

21 Ɛhye ati, ɛnyelɛ ɛngola ɛnga ɛngile ɛsalɛ kɛ, “Ɛ nwo ɛngyia me!” Anzɛɛ etile ɛngola ɛnga ɛngile egyakɛ kɛ, “Ɛ nwo ɛngyia me!”

22 Nɔhalɛ, saa yɛye sonlabaka nvɛyeba bɛtɛbɛtɛ ne mɔ nu a, yɛngola debie biala yɛ;

23 yɛɛ sonlabaka ne ɛleka mɔɔ yɛdwenle kɛ bɛ nwo ɛngyia biala la yɛɛ yɛnea bɛ boɛ kpalɛ a; nuhua ne mɔɔ ɛnle ngɛnlɛma la yɛɛ yɛdɛ alagye yɛyɛ bɛ kpalɛ a.

24 Ɔluakɛ nvɛyeba ngɛnlɛma ne mɔ ɛngyia kɛ bɛkɛziezie bɛ dɔɔnwo. Nyamenle ɔdaye a ɔvale nvɛyeba ne mɔ ɔbɔle nu ɔyɛle sonlabaka ne a, amaa bɛali mɔɔ anwo ɛngyia la eni kpalɛ.

25 Zɔhane ati mgbakyemgbakye biala ɛnle sonlabaka ne anu, yɛɛ nvɛyeba ngakyile ne mɔ amuala dwenle maa bɛ nwo ngoko ngoko.

26 Saa sonlabaka ne nvɛyeba ko nwu nyane a, ɔka mɔɔ ɛha la amuala; yɛɛ saa bɛye ko ayɛlɛ a, mɔɔ ɛha la amuala nee ye di fɛlɛko.

27 Kelaese sonlabaka ne a le bɛ muala, yɛɛ bɛ nuhua ko biala le ye nvɛyeba ne mɔ bie.

28 Nyamenle ɛhile awie biala gyinlabelɛ wɔ asɔne ne anu; mɔɔ lumua la a le ɛzoanvolɛma, mɔɔ tɔ zolɛ nwiɔ la a le Nyamenle kpɔmanvolɛma, yɛɛ mɔɔ tɔ zolɛ nsa la a le kilehilevolɛma; akee bɛdabɛ mɔɔ bɛyɛ nwanwane ninyɛne, mɔɔ doa bɛ la a le bɛdabɛ mɔɔ bɛmaa bɛ tumi kɛ bɛyɛ ayile la; yɛɛ akee boavolɛma, amaamuoma, yɛɛ bɛdabɛ mɔɔ bɛtendɛ aneɛ ngakyile la.

29 Bɛ muala bɛnle ɛzoanvolɛma, anzɛɛ Nyamenle kpɔmanvolɛma, anzɛɛ kilehilevolɛma. Bɛ muala bɛnlɛ tumi mɔɔ bɛfa bɛyɛ nwanwane ninyɛne a,

30 anzɛɛ bɛfa bɛyɛ ayile, anzɛɛ bɛfa bɛka aneɛ ngakyile, anzɛɛ bɛfa bɛkile aneɛ ngakyile ne mɔ mɔɔ bɛka la abo a.

31 Zɔhane ati bɛmaa bɛ nye ɛbolo bɛkpondɛ ahyɛlɛdeɛ kpalɛ ne mɔ mɔɔ sonle bolɛ na bɛ nwo hyia kpalɛ la. Akee bɛmaa mengile bɛ adenle kpalɛ kpalɛ ne mɔɔ hyia la.

Bible in Nzema © Bible Society of Ghana, 1998.

Bible Society of Ghana
ကြှနျုပျတို့နောကျလိုကျပါ:



ကြော်ငြာတွေ