Sekaraia 5 - Nobonob Baibel

Buk itoɗiak ele hagagaɗa ukkomnu nai

¹ Amu da Sekaraia, da baula neekki ukke, da buk itoɗiak ele hagagaɗa ugekke anidmi.

² Da anam anitti, engel nug da oɗ meɗom. “Na aɗi anidttem,” awa oɗ meɗom. Oɗ meɗe, da ami. “Da buk itoɗiak ele hagagaɗa ugekke anidttem. Buk amunu elab am 10 mita, emaitak nuhig am 5 mita,” awe ami.

³ Da anam ai, engel nug da amelppa aum. “Buk itoɗiak amuppa eheɗ laa awaknu nai waappa dayaknu anak aakku yaak daatte. Eheɗ laa awaknu anak waappa dayaknu nai amuam wan imu oh tonakku. Aɗinu? Buk itoɗiak amuam laih laih oh yaak ele, amu heqo laihppa am danab ah ag keeke yab aotteb ele, ag wan imuppa ii daamna ippunigtte; laih am danab ah ag hambuppuak nai mattin, nai amu da onilppa ɠagattag qedatteb ele, ag wan imuppa ele ii daamna ippunigtte.

⁴ Yawe Nukka Ɠagattag Oh Ele Nug inam atte. ‘Da heppi, eheɗ awaknu nai amu danab aun nug yabhok hette, nug laugppa ukka dayaya, danab aun nug nai hambuppuak mattia, nai amu da onilppa ɠagattag qedatte ele, nug laugppa ele ukka daakku. Eheɗ awaknu nai amuam, danab amu hetteb ele ag laulkadppa ukka dayeb, lag amuppan danab ah oh nauhppeppeg, laulkad ele nauhna autnanab aoglag. Lag ebehi, ad, men, keeke oh ele nauhakib daakku.’ Yawe Nug anam atte.” Engel nug da amelppa anam aum.

Ah laa kaleg ooppa dayom

⁵ Aria, amu dimppa amu, engel nug da ele nai mattimuɗ nug da gumiɗa uɗia, da amelppa aum. “Neegppe, attan taɗ! Keeke laa habppa tula bette amu, na keeke amu antte!” awa aum.

⁶ Nug anam a, da attan neekki te, da engel amegppa ami. “Amu aɗi?” ain oɗ mettami. Oɗ mettai, nug aum. “Kaleg amuam wit, o bali, o rais keeke, aeg nuhig uug gane doyaknu kaleg, amu amuppa wan imuppan hipunin oh inak daatteb,” awa aum.

⁷ Nug anam a, laa nug kaleg amu ameg uugnab ele, gapa laa onig led, amuppa hak amu, nug amu kole, ah laa kaleg amu ooppa heɗep na dayeye anidmi.

⁸ Da amu anitti, engel nug da amelppa aum. “Ah amu onig am nau hak,” aawo, ⌊ah amu hibaitta dimittim dokkunu heehe antta, dimittim domanu⌋ nug ehale, kaleg ooppa eɗua no, kaleg ameg uugnab ele eɗua qeum.

⁹ Nug anam he, da neekki, attan te, da ah aɗit aa hagagaɗya, i gumitya uɗieheh anatmi. Aa haulah am ai stok haug bia; amu aa pahanab hagagaɗya uɗipiɗ. Aa uɗiya, kaleg amu humaya, aoya hagagaɗya habppa tepiɗ.

¹⁰ Aa anam heeh, da engel nug da ele nai mattimuɗ, da nug oɗ mettami. “Aa kaleg amu aoya, adeppa gottep,” awe oɗ mettami.

¹¹ Da anam oɗ mettai, nug da amelppa aum. “Aa kaleg amu aoya, Babilon wanppa gottep. Appa qinob lag laa babaittak dayeb amu, kaleg amu lag amuppa nuhig abenppa meppeg daakku,” awa aum.