Sam 99 - Nobonob Baibel

Kayak Nug king laa oh eɗadtte

¹ Yawe Nug king daatte! Wanppan wan anen anen oh dilag danab ah ag hahaɗeg! Ao, Yawe Nug sia king nuhigppa, engel okkai-kerubim aɗit dottolah gamalahppa daatte! Wan nug uɗalaɗ!

² Yawe Nug Sion appa daatte; Nug ɠagattagnab daatte. Nug wan atu oh dilag danab ah eɗadtte.

³ Yawe Nug onig okkainab ele; danab ah ag nuhignu ebehilag oh bodoetta le mekkunu daatte. Anam amunu, ag Nug onig humeg! Nug oppiaawak daatte.

⁴ O Yawe, na am king naɗinab. Na nai doya mala hettoɗia epeɗia elele mettak kobolnu oot mauhtte. Na epeɗia elele hak kobol Israel wanppa ɠagattag daakkunu qappame. Na Israel dilagppa, na nai doya mala hettoɗia epeɗia elele mettak kobol dim lamidnana, na genab tutukku hak kobol ele dim lamidme, na gemu ele dim lamidttem.

⁵ Yawe Nug oppiaawak daatte ⌊amunu,⌋ ag Yawe, ihinig Kayak, ag Nug humitteg! Ag Nug baeg gukkuidna gona, ag Nug noobppa dup nona Nug binag meig!

⁶ Moses, Aron ele aa mana mettak danab nuhikkud oolagppa daapiɗ. Samuel nug laa ag Nug onig diiom ele amu, nug ag oolagppa dayom. Ag Yawe ehanadkkunu gaaeg, Nug ag oɗelagppa awom.

⁷ Nug lombig teppu ele attan takppa dayaya, ag amelagppa nai mattiom. Nug mattie, ag ɗo mak amu dim lamidppig. Ao, ag ɗo Nug ag mattom amu, ag amu dim lamidppig.

⁸ O Yawe, ihinig Kayak, na ag oɗelagppa aome. Na am Kayak uhuqak madattem, na amu ippunadme, amge ag eheɗ ukkaeg, na ele ag bu mattame.

⁹ Ag Yawe, ihinig Kayak, ag Nug humidna, nuhig qauko, qauko amuam nuhignu tituanak daatte amu, ag amuppa Nug noobppa dup nona binag meig! Aɗinu? Yawe, ihinig Kayak, Nug am oppiaawak!