Sam 88 - Nobonob Baibel

Laa ehanittak awaknu gaatte

Imuam Kora buɗubnu sam; ag danab kwaia gumattenu yom. Ahi imu baag am, “Danab Oɗe Elenu Guittak”. Esra buɗub Heman, nug nai imu yom; am maskil laa.

¹ O Yawe, na Kayak da ehaniɗe, padal ii mettem. Anam amu, da nahipnu hanhan amun tuqan ele unuqidttem.

² Na dahil unuqittak dookkutnu oɗ medattem. Ao, da na unuqidppippi, na daut human dookkutnu unuqidttem.

³ Na dahil unuqittak dookkutnu diig am, bau dayak dahil amu uug kuɗum ele. Ao, da mauhen, moɗppa daakkulnu elele daattem.

⁴ Danab ah mauhna, moɗppa niitteb, laa nug ag ebaqadkku amu, nug da ele ag oolagppa ebiukku. Da am danab laa ebehi iitta ele bia daattem.

⁵ Da am laa banppa nug laikkud kuɗum mauhppig, laikkud laa ii mauhppig uun ukkaeg, nukka mauhak oolagppa daatte bia daattem. Ao, da am ban danab ban haenppa qeeg mauhe boumppig bia daattem. O Yawe, na danab ah mauhppig dilag ii dabmettem, da amubia daattem. Ao, da am danab na ii atognoadttem bia daattem.

⁶ Na da moɗ umanab noak amuppa meiɗme daattem. Ao, da moɗ ooppa aben gatatunabppa nomi daattem.

⁷ Na dahilnu oppoɗi bak doon, bu huana iuttem. Na da bu huana meɗattem, amuam duban iutte bia. Sila.

⁸ Na he, da lailad uuiɗppig. Ag da gukkuiɗna daaglagnu uun autna aotteb. Da pelem laappa daattem amunu, da ahe gokkulnu elele iitta.

⁹ Da uug doyeye, keeke ena laa pehette anidkkulnu elele iitta. O Yawe, deɗ anen anen da nahip ehanittaknu oɗ medattem. Ao, da eppel nahip-ppa bahie ukke, da na unuqidttem.

¹⁰ Na kobol danab hekkunu elele iitta, na amuppa laa mauhppig ele ehanadkkutnu hettemte? Ao, mauhppig ele ag ahan, na binan mettebte? Sila.

¹¹ Laa ag mauhak moɗppa niitteb, ag laa amelagppa nahip oo mauhaknab kobolnu madittebte? Ao, aben nau anamppa ag nahip oo metta ii uuak kobolnu madittebte?

¹² Laa ag gatatuppa daatteb, na ag kobol danab hekkunu elele iitta nahip ippunatte anidttebte? Ao, aben onig Abadon, amuam he nauha autanab awak aben amu, na amuppan danab ah ag nahip genab tutukku hak kobol ippunatte anidttebte?

¹³ Amge, ⌊da ina bau daattem amunu,⌋ O Yawe, da nahipnu unuqidttem. Deɗ anen anenppa, buttua da nahipnu unuqidttem.

¹⁴ O Yawe, na dahilnu awaidna daattemnu diig appe dookkulnu unuqidttem. Ao, na iɗun me laih gottenu diig appe dookkulnu oɗ medattem.

¹⁵ Da nid bau daaiyi, uug okkainab iwewe, da mauhkkulnu hei uɗie, gemu ele anamib daattem. Ao, na ae, uug nau digdig dahilppa be, da baɗak eheɗ nau doyeye, da ena daakkulnu aɗi dabmak laa aokkulnu laa ii anidttem.

¹⁶ Na dahilnu oppoɗin be, na bu naunab nau iume. Ao, bu mettak na eppenppanu amu he, da baɗak eheɗ nau doye, da nauhak iikku daattem.

¹⁷ Nahip bu mettak am le ui danab laa talilitte daatte, amubia deɗ oh amun, tuqan ele dahilppa daatte. Ao, le ui danab laa tona auta autanab aotte bia nahip bu am da awiɗa, auta autanab awe daattem.

¹⁸ Na he, da lailad, da ele tiinig laippu, ag da uuiɗppig. Ao, da layal laippuib da ele daattep, amuam gatatu, ⌊amunu O Yawe, da nahip ehanittak ameg mettem.⌋