Sam 70 - Nobonob Baibel

Kayak Nug laa ehanittak mettaknu unuqittak

Imuam Dawitnu sam; Dawit nug danab kwaia gumattenu yom. Imuam Yawe Nug eɗua, nuhikkud danab ah dabmadakkunu unuqittak.

¹ O Kayak, na paha da ehaniɗppe, da qagaiettakppa ii daapanu oɗ medattem! Ao, O Yawe, na paha dona, da ehaniɗkkutnu unuqidttem.

² Na heppe, laa ag heppeg, da padal mekkulnu hetteb ele, ag uɗa nak, ge, ag uɗa nak nau guittak ele dooglagnu oɗ medattem. Ao, laa ag da uug iwe aniɗna, gamag ahak dootteb ele amu, ag bittumttum gonana, uɗa nak nau guittak ele aoglagnu unuqidttem.

³ Ge, na heppe, danab laa ag dahilnu awa awa qettak nai naunab maditteb ele, ag uɗa nak nau aon anidna, eheɗ ottaippeg, ag uɗa nak nau aon malappignu bittumttum gona nau anidkkulagnu ool daatte.

⁴ Laa ag dahilnu nau amu hetteb ele, na ahilagppa anam hekkutnu ool daatte, amge na heppe, laa ag na anidna dim lamidkkulagnu na mattidtteb amu, ag ena doon, gamag ahak okkai aoglagnu oɗ medattem. Ao, na heppe, laa na ehanatte, ag padal ii mena, ag amunu enanag dootteb ele amu, ag hanhan, “Kayak Nug hak ena, hak tutukku, hak genabib hette,” akkulagnu unuqidttem.

⁵ Amge, O Kayak, da am daɗek, keekenu tutu mak daattem; na da pahanab ehaniɗkkutnu oɗ medattem. O Yawe, na am dahil ehanittak daattem, na ehaniɗe, da padal ii mettem. Anam amu, na ehaniɗppe da padal ii mepanu haen elab ameg mak ii daapanu unuqidttem.