Sam 6 - Nobonob Baibel

Uug haenppa ehanittak awaknu unuqittak

Imuam Dawitnu sam; Dawit nug danab kwaia gumattenu yom. Danab laa ag musik haknu keeke muɗi ele qebeppeg, laa ag sam imu ahi ettaglagnu daatte.

¹ O Yawe, na oot nauhebeb, daul ii batamnanu unuqidttem. Ao, na oppoɗin beeb, na toliɗna, bu ii meɗamnanu oɗ medattem.

² O Yawe, da beɗul bodoettom amunu, na dahilnu oot gai-iitta doon oot meɗan ehaniɗna, ⌊ɠagattag meɗakkutnu unuqidttem⌋. Ao, da ebehil hahaɗtte amunu, na heppe, da ena daakkulnu oɗ medattem.

³ Da ool uug okkainab ele daattem. O Yawe, haen gane laa ele ukkeb, na da ehaniɗkkut? Ge, haen gane laa ele ukkeb, na da ehaniɗkkut?

⁴ O Yawe, na dona ehaniɗna, qagaiettakppanu awiɗkkutnu unuqidttem. Ao, na oo mauhaknab kobol dim lamidttem amunu, diig amunu na da ehaniɗppe, da ii mauhpanu oɗ medattem.

⁵ Aɗinu? Laa nug mauhom amu, nug nahipnu daugppa ii dotte. Ge, aun nug moɗppanu na binan mekkun elele?

⁶ Da aeqakkai qakkai, ɠagattag dahil oh iitta meum. Tuqan ohppa amel leb niiak aben dahil he bauɗtte. Ao, da gayak huananab heiyi, ikkil uɗun bauɗtte.

⁷ Da gayak huanaknab hei, amel gai-iitta meum. Ao, da kekeɗalad dilagnu gaai gaai, amel gai-iitta meum.

⁸ Danab ag nau hetteb ele, ag qe mena, da uuiɗeg! Aɗinu? Yawe Nug gayak dahil doyom.

⁹ Da Yawe Nug ehaniɗkkunu gayak hei, Nug doyom. Yo, Nug dahil unuqittak doyom.

¹⁰ Dahilad kekeɗ oh ag geha uɗalag neeb, dabmak huanak aoglag. Ge, dahil kekeɗ ag uɗa nak nau guittak ele doon, ag pahanab bittumttum gokkulag.