Sam 13 - Nobonob Baibel

Yawe Nug Dawit ehanittak mettaknu unuqittak

Imuam Dawitnu sam; Dawit nug danab kwaia gumattenu yom.

¹ O Yawe, na dahilnu daut atie daattem; am haen gane laa ele ukkeb, na eɗun, dahilnu dabmekkut? Na hanhan dahilnu daut atikkute? Ao, na da ii neekkiɗttem; amu haen gane laa ele ukkeb, na eɗun, da neekkiɗkkut?

² Da dahil dabmakppa uug nau doyeye, da oolppa oo doyak deɗ ohppa ele doottem; amu haen gane laa ele ukkeb, da amu ii doopa? Ao, kekeɗ dahil ag da eɗileg, da nein qein daattem; amu haen gane laa ele ukkeb, ag anam ii hemana?

³ O Yawe, dahil Kayak, na eɗun aon, nai nob meɗakkutnu oɗ medattem. Ao, na da ii ehaniɗkkut dayeb amu, da mauhkkul.

⁴ Da mauhkkul dayeb, dahil kekeɗ nug geha nug nukka nug onig huma akku. “Da aakku nug eɗidmi!” awa akku. Ao, da nein qekkul dayeb amu, dahil kekeɗ ag geha diig amunu gamalag ahakku.

⁵ Amge da nahip oo mauhaknab kobolnu oolppa genab doottem. Ao, da geha na ehaniɗppe padal ii mepanu gamag ahak dookkul.

⁶ Yawe Nug dahilnu ena heum amunu, da nuhignu ahi edakkul.