Rut 3 - Nobonob Baibel

Naomi nug Rutnu dabmeum

¹ Aria, haen laa ukke, Naomi nug Rut amegppa aum. “O aɗel, da heppi, na gamut laa aoppe, na nug ele aa laulahppa daayya, nug na atognoidkkunu ib laa anidkkul dayeb amu, da amu iite bappaidpa?

² Da amu hekkulnu amu, da inam dabmettem. Boas, na nuhikkud maɗi ah dim lamadnana, uɗat heme ele, nug Elimelek ele aa tiig laippu, amu tuqan imu nug ee aeg mumuɗaknu abenppa ulah bali dappunkkeg iwale ukkaknu uɗat hekkunu, nug appa daakku

³ amunu, na le laan, leppu muttuɗig enanag ele, amu ele laan, lamen ena mewona ahan, Boas nug uɗat hette abenppa gona daakkut, amge nug noobppa aib paha wappe anittom! Na ameg men daappe, nug ee, le ele lawowa,

⁴ nug ukka, niikkunu heebeb, nug niikkun aben, na aben amu antte! Anidna daappe, nug niiebeb, na gona, baekuɗ laih laih blanget baeg ooppanu ukka, baeg baag batakppa kolakkut. Kolona, baegppa blanget kolameppa, appa niie! Na anam niibppe amu, nug na aɗi hekkutnu ab dookkut,” awa aum.

⁵ Naomi nug anam a, Rut nob ma aum. “Na attem amu, da anamib hekkul,” awa aum.

⁶ Aria, Rut nug Naomi aum bia babaitta aha, Boas uɗat hedeppa ukkom. Ukka, appa nug ahipa aɗi aɗi hekkunu aum amu, nug aakku heum.

⁷ Aria, Nug dayeye, Boas nug ee, le ele lawowa, oo gamag ahak doyeye, ameg ne, niikkun ha, nug bali aeg ameg qagmak guguittak ukka niiom. Nug anam niieye, Rut qinonob wana, blanget Boas layom ele, nug blanget amu baekuɗ ooppanu ukka, baeg baag batakppa kolowa, nug aguppa niiom.

⁸ Niieye, tuqan tugmag me, attem he, Boas ameg oppate, eɗua ah laa baegppa niieye anttom.

⁹ Nug ah am antta, oɗ metta, “Na aun?” awa oɗ mettom. Oɗ mette, Rut nug aum. “Da am nahip maɗi ah Rut. Na Elimelek ele, aa tiig laippu amunu, na da ehaniɗkkutnu daattem. Na anam daattem amunu, da nahip ah daakkulnu oɗ medattem,” awa aum.

¹⁰ Rut nug anam a amu, Boas nug aum. “O aɗel, Yawe itidkkunu ool daatte. Na ahipannu oo mauhaknab doon ehanidnana, gemu kobol amu tuɗidna, kobol ena okkainab hettem. Aɗinu? Na nid bau, danab enub ele, o danab enub iitta amu, na nid bau amu laa aolomnu daame, amge na amu oh na uuna, dahilppa uɗime.

¹¹ O aɗel, aib baɗame. Ippan danab ah oh ag na ah enanag, diit ena ele dootteb amunu, keeke oh na amunu attem amu, da hekkul.

¹² Na attem am genab, da Elimelek ele i tiinih laippu, amge danab laa daatte, nug Elimelek ele, aa am tiig laippunab amunu, nug na ehanidkkunu amu, nug da eɗiltte.

¹³ Nug da eɗiltte amunu, tuqan imu na inam daappe, butti da ukken, danab amu, nuhig dabmak dookkul. Nug qagaiettakppanu eɗua uhuqak ha, na ehanidkkunu dayeb amu, nug anam hekku. Amge nug amu ii dabmette dayeb amu, Yawe genab bau daatte, genab amubia da hekkul. Na inam niippe, wagkkaɗeb ukke!” awa aum.

¹⁴ Boas nug anam aum amunu, Rut nug niiom abenppa eɗua niiom. Niie ukke, wagkkaɗkkun heehe, laa nug auntai antta dookkunu elele iitta haenppa Boas tatam ahe, Rut ele ahe amu, Boas nug Rut amegppa aum. “Danab laa nug ah ee aeg mumuɗaknu aben ippa uɗiom amu, laa nug ii dooma!” awa aum.

¹⁵ Boas nug anam awowa, nug nai tuɗitta aum. “Nahip ulahnu lamen meme amu aon dona, noob laih laih aɗe!” awa aum. A, nug lamen awa aɗe, Boas nug tappiɗ eblaih laippu ele bali aeg ita gokkaɗe, lamenppa noum. Goɗaɗe no, huma mette, mawa ukkom. Ugekke, Boas nug ele aha, aabppa ukkom.

¹⁶ Aria, Rut nug ukka, lakka te, Naomi nug oɗ metta aum. “O aɗel, na gome am, attem beum?” awa oɗ mettom. Naomi nug anam oɗ mette, Rut nug keeke ohnu Boas nuhignu heum nug amegppa mattia malowa, nug nai tuɗitta aum.

¹⁷ “Boas nug imu ele da amelppa aum. ‘Na eppenib ahipan Naomi gumidna ii gomana!’ awa aum. Nug anam awowa, nug tappiɗ eblaih laippu ele bali aeg lamen imuppa gokkaɗe no, mawe ele uɗimi,” awa aum.

¹⁸ Rut nug anam a amu, Naomi nug Rut amegppa aum. “O aɗel, Boas nug gemuib ana bappaidkkude amunu, aib dabmak kuɗum aome!” awa aum.