Revelesen 5 - Nobonob Baibel

Buk itoɗiak, amu sipsip nag ele

¹ Laa Nug sia king ⌊anuqak,⌋ appa dayom ele amu, Nug eppeg naɗiap-ppa buk itoɗiak laa anidmi. Buk amu ooppa, dimugppa ele oh yaak ele, amu buk amuam qataqak eblaih aɗit ele.

² Amu da engel ebehi ele laa anidmi am nug baag okkaippa aum. “Aun nug buk itoɗiak imunu qataqak eblaih aɗit ele tolattowa, buk imu matulkkunu ehah ele?” awa aum.

³ Nug aum, amge hab aabppa, wanppa, amu wan unuqagppa ele laippu laa nug qataqak eblaih aɗit amu tola, buk itoɗiak uɗug yaak ebqekkunu laa elele daye ii anidppig.

⁴ Laippu laa nug buk amu uhuqa, yaak amu ebqekkunu laa elele daye ii anidppig amunu, da huanak gaami.

⁵ Anam gaaiyi, ikki danab laa nug da amelppa aum. “Na aib gaame! Antte! Danab laa, ɠagattag nuhig am laion bia, Nug Juda danab, Dawit buɗubppanu, Nug ban eɗittom amunu, Nug buk itoɗiak qataqak eblaih aɗit ele amu, Nug amu tola matulkkunu elele,” awa aum.

⁶ Anam aum amu da Sipsip Nag laa, Nug sia king ⌊anuqak⌋ guguittak hibaitte, hab daup waɗele Kayaknu bauklel aotteb, ikki danab ele ag Nug talilidna daaegeg, Nug ag gamagppa dayeye anidmi. Sipsip Nag amu laa ag matu qeeg mauha, eɗua hibaitte anidmi. Nug qeqeɗi eblaih aɗit ele amu ameg eblaih aɗit ele. Qeqeɗi eblaih aɗit, ameg eblaih aɗit ele, amuam Kayak Ouɗi kobol ena oh nuhigppa ambak daatte ele, Nug ippunigtte. Amu Kayak Nug me, wan ohppa ukkom.

⁷ Aria, Sipsip Nag amu Nug ukka, Kayak Nug sia king ⌊anuqak,⌋ appa eppeg naɗiap-ppa buk itoɗiak amu aɗa dayeye, Nug aɗitta awom.

⁸ Nug buk itoɗiak amu awe, hab daup waɗele Kayaknu bauklel aotteb ele, aria ikki danab 24 ele ag Sipsip Nag noobppa dup noppig. Ikki danab oh ag am harp aɗualadnana, ag ele tappiɗ golppa hattak, kalu danab ile muttuɗig enanag bette ele tappiɗppa ambak ele, amu eonna, muttuɗig oegeg aɗualadna daappig. Kalu amuam Kayaknu danab ah oppiaawak ele dilkad unuqittak aakku.

⁹ Ikki danab 24 ag anam hena, ag ahi bau laa inam edappig. “Na buk itoɗiak amu aona, qataqak oh tolakkutnu ehah ele. Aɗinu? Ag heeg, na mauhme, amu na danab ah huu ohppanu, nai ohppanu, beɗulag iɗu iɗu ohppanu, wanppan wan ohppanu ele na tiinppa hipuninnu qagaiettakppanu eɗua uhuqak hena, Kayak mettame.

¹⁰ Na he, ag ihinig Kayak waappa daan nuhig uɗat hekkulagnu ag king, amu mana mettak danab ele daatteb. Amu ag wan ele gumaglag.” Ag anam anana, ahi edappig.

¹¹ Aria, da baula neekke, daul hume, engel tausen kuɗumnab amu milion kuɗumnab ele ag sia king ⌊anuqak⌋, hab daup waɗele Kayaknu bauklel aotteb ele, ikki danab ag ele oo mattan taliliadna daaegeg, baalag doyen anadmi.

¹² Daanna ag ahi inam qalan edappig. “Sipsip Nag, ag anukka qeeg mauhom ele, Nug ɠagattag, enub, doyak dabmak ena ele, ebehi, binag amu binag amahalak oppiaawak ele, onig okkai ele aokkunu onig awom daatte,” anana edappig.

¹³ Ag anam ettaeg, da keeke oh Kayak Nug hattom, amuam keeke hab attan daatteb, wanppa daatteb, wan unuqag daatteb, amu yuppa daatteb ele baalag doomi. Keeke amu oh aben amu ohppanu ag inam ahi edappig. “Kayak Nug sia king ⌊anuqak,⌋ appa daatte, Sipsip Nag ele amu, onig okkai, binag mak, binag amahlak oppiaawak ele, amu ɠagattag oh ele ahilahppa hanhan alet ele dayaɗ!” aon appig.

¹⁴ Aria, hab daup waɗele Kayaknu bauklel aotteb ele, ag am, “Genab, anam dayaɗ!” aegeg, ikki danab ag gatelag qaun ona, ag dup nona Kayak amu Nug Bekka Jesus ele binalah meppig.