Revelesen 22 - Nobonob Baibel

Le bauklel ele

¹ Amu dimppa engel nug le laa, le amuam bauklel le, nug le amu ippuniɗom. Le amuam men onig kristal, dubuttid nakok laa iitta, amubia dubuttid nakok laa iitta ele daatte. Le amuam Kayak amu Sipsip Nag ele, ahilah sia kingppanu ba

² aab okkainu ib gamagppa gotte. Bauklel ad amu nug le amu akka laih laih tagagɗitta, tappom daatte. Nug meu amu maɗ laippu ooppa haen 12 ele niitte. Kalam ohppa meu niitte. Ad uɗug amu atu atu danab ah dilag oɗe babaittaknu ele.

³ Amu keeke oh, Kayak Nug amunu oo iinab dayom ele amu, Kayak Nug heeb, iitta mekkulag; keeke amu baula ii daamna. Kayak amu Sipsip Nag ele, ahilah sia king aab amuppa daakku. Dayeb, Kayaknu maɗi nid ag Nug waappa daan Nug oɗe dim lamidkkulag.

⁴ Ag Nug iɗu anidkkulag, Nug onig amu ag uɗalkadppa daakku.

⁵ Gatatu baula ii daama. Lamnu amahlak am aam amahlaknu uɗat ele baula ii daama. Aɗinu? Naɗi Kayak Nug amahlak mattebeb, ag haen oh king daaglag.

⁶ Amu engel nug baula da amelppa aum. “Nai imuam genabnab, danab ah oh ag oolagppa genab dooglagnu elele. Naɗi Kayak, Nug propet nuhikkud gumadtte ele amu, Nug nuhig engel me, keeke oh paha bekkulagnu daatte amu nuhikkud maɗi nid ippunadkkunu uɗiom,” awa aum.

Jesus Nug uɗikku

⁷ Amu Jesus Nug aum. “Doyeg! Da paha uɗikkul! Aun nug Kayak nainu, buk imuppa niitte amu, nug amu dim lamidtte ele amu, nug itittak awom daatte,” awa aum.

⁸ Da Jon, da nai imu doomi, keeke ele anidmi. Amu da nai doyen malen, keeke ele anitten malen, da engel nug keeke imu oh ippuniɗom ele, da dup noin nug binag mekkulnu nug noobppa gatel qaun omi,

⁹ amge nug da amelppa aum. “Na anam aib heme! Da am Kayaknu maɗi nid, na, na laipad propet danab, amu aun laa oh ag buk imuppanu nai dim lamidtteb ele, ag nuhig maɗi nid daatteb, amubia. Na Kayak aakkuib Nug noobppa dup nona binag me!” awa aum.

¹⁰ Nug anam awowa, nug da amelppa aum. “Kayaknu nai buk imuppa niitte amu, na aib toname. Aɗinu? Kayak Nug keeke imu oh hekkunu aakku haen oqiiom.

¹¹ Anam amu, laa nug kobol eheɗ hette amu, nug tuɗid eheɗ hekku; laa nug danab nau, uɗig wak ele amu, nug tuɗid danab nau, uɗig wak ele daakku. Laa nug tutukku hette amu, nug tuɗid tutukku hekku; laa nug Kayaknu oppiaawak ele daatte amu, nug tuɗid Kayaknu oppiaawak ele daakku,” awa aum.

¹² Nug anam a amu Jesus Nug aum, “Doyeg! Haen elab iitta da ana uɗikkul. Da nob ena, nob nau ele awe uɗikkul, amu da danab anen anen aɗi heppig, da amunu nob madakkul,” awa aum.

¹³ Jesus anam awowa, Nug aum. “Da haen oh daattem; da tatam daami, da hanhan daakkul. Anuqakppa, gog takppa ele da daattem. Digmakppa, batakppa ele da daattem.

¹⁴ Danab nug nuhig lamen iha oppiaawak daatte bia, aun aɗi ag Jesus tiigppa oppiaawak daatteb, amu diig amunu ag aab okkainu od oɗeppa wana, aabppa nona, ad bauklelnu meu lakkulagnu elele daatteb amu, ag itittak ena aoppig daatteb.

¹⁵ Amge baɗ mak danab, gappai danab, qe mauhak danab, kayak hambuppuak binag mak danab ele, amu laa oh ag hambuppuak kobol oolag mettan hetteb ele, ag Kayaknu aab okkai dimittim qai bia daaglag.

¹⁶ Da Jesus, da dahil engel laa mei, ahilagppa ukka, nai dahil imu tamaniak ohppa ag amelagppa mehuqkkulagnu madakkunu ukkom. Dawit nug dahilppan be, da nug buɗubppan bemi. Da hoɗopai boitinannu amahlak bia daattem,” awa aum.

¹⁷ Amu Kayak Ouɗi amu Sipsip Nag wau, aa attep. “Na do!” Am aun nug nai amu doya nug, “Na do!” anaɗ! Am laa ele, laa nug le baag diieb, am nug doaɗ! Am laa nug bauklel le lakkunu oo hette ele amu, nug doa, bauklel le lanaɗ! Kayak Nug le amu hamu medatte.

¹⁸ Danab oh ag Kayak nai buk imuppa yaak daatte amu ag ebqena dooglag ele amu, da nau aomnanu nai imu ahilagnu inam attem. Aun laa nug nai buk imuppa niitte ele amu awa, nai laa ele tuɗidkku amu keeke nau kuɗum, Kayak Nug buk imuppa amunu aum ele amu, Kayak Nug danab amu nuhigppa keeke nau amu oh qagmekku.

¹⁹ Am laa nug propet nainu buk imuppanu nai laala heeb, iitta mekku amu Kayak Nug ele heeb, danab amu nug bauklel ad meu ii lama; nug Kayaknu aab okkaippa ele ii daama. Bauklel ad, Kayaknu aab okkai ele amu, keeke aɗit amu aa attem daattep amu buk imuppa yaak daatte.

²⁰ Laa Nug nai imu oh aum amu Nug atte. “Yo, da paha eɗuen uɗikkul,” awa atte! Genab, Naɗi Jesus, na uɗie!

²¹ Naɗi Jesus Kristusnu ehanittak okkai hamu mettak, ag Kayaknu danab oh, ahilagppa dayaɗ! Genab.